نفاج

نفاج

مساحة للوصل ونفاج نفتحه..بيننا جميعا وعبره..نحكي.. نتواصل..نتعارف..نتآلف..لنكون معا..نهر الحياة الخالد

دخول

لقد نسيت كلمة السر

المواضيع الأخيرة

» أفضل وأسهل وأكثر أنواع التجارة ربحية على الإطلاق أمان 100%
الإثنين فبراير 02, 2015 6:27 am من طرف الأميرلاي

» بستـــأذنك...
الخميس يوليو 03, 2014 8:08 pm من طرف الشاعر السماني حسن

» عاش من شافك
الثلاثاء يونيو 17, 2014 3:16 pm من طرف hamadvip

» ابدأ دخولك بالصلاة علي النبي (صلي الله عليه وسلم)
الثلاثاء يونيو 17, 2014 3:11 pm من طرف hamadvip

»  كيف يفكر الرجل ؟؟ وكيف تفكر المرأه ؟؟
الإثنين يونيو 16, 2014 1:00 pm من طرف hamadvip

» قصيدة جديدة ........ دنيا
الإثنين يونيو 16, 2014 12:53 pm من طرف hamadvip

» طيارة جات بي فوق .......... قصيدة جديده لهاشم صديق .. حفظه الله
الإثنين يونيو 16, 2014 12:49 pm من طرف hamadvip

» عشة أم حجل - هاشم صديق
الإثنين يونيو 16, 2014 12:47 pm من طرف hamadvip

» هاشم صديق - ما جاب المطر بنزين
الثلاثاء يونيو 10, 2014 5:41 am من طرف عثمان تباكي


    الوصية الاخيرة

    شاطر
    avatar
    ابراهيم الصغير
    مدير عام
    مدير عام

    عدد المساهمات : 213

    الوصية الاخيرة

    مُساهمة  ابراهيم الصغير في الثلاثاء يوليو 13, 2010 2:15 am

    الوصيه الأخيره

    النص

    هديك كاسك
    وداك
    فرس القبيله هناك
    هدَه العرقي
    وديك ليلاك ... وداك
    فاسك
    جراراتك مستَّفه ستْ
    وبنوت الليالي هديل
    صبح بلح الخطيئه ملح
    ومليان بالفراغ راسك
    أكان ما كُستَ لي همك
    ودسيت منو
    إحساسك ،
    بتلقي الغم بنادي عليك
    بتلقي الهم براو كاسك ..
    أخير تشرب
    أخير تسكر
    صراط الجنه ما واضح
    هديك النار... وداك إبليس
    داك الحق ... وده الباطل
    فيا تسمع ملاكك فيك
    وتتجنب خصايل الشر ،
    يا إما ترضِّي وسواسك
    شياطين الرزيله كُتار
    ملاك الرحمه فدْ واحد
    وفدْ واحد إله الكون
    فدْ واحد ملاك الموت
    ووِحِّيدو البِهد ساسك
    دحين ....
    قبل القيامه تقوم
    وقبال ماتجي الآخره
    ويتمردغ جواك ياسك ،
    أخيرلك ترضي بالمقسوم
    وتتعايش مع الواقع
    طريق الجنه جد واضح
    وأصلاً مابدورلو دليل
    براك الكُتَّ ما شايفو
    براك غمضتَ أحساسك
    تخدِّر لا متين نفسك
    وتتغابي الفضيله الفيك
    بتهرب من جراحك ليه
    وهي الشايلاكَ فوق راسا
    بتهرب من جراحك ليه
    تقبِّل رجل من داسك ؟
    وطاك
    لامن بقيتلو ذليل
    كتل إنسانك الجواك
    وطاك لامن نسيت أهلك
    نسيت خِلاك وجلاسك ...
    هدِى الحانه
    وده الجامع
    ومابينُن
    سنين مشوار
    بتقدر تمشي في لحظات
    إذا صليت
    ورا التوبه
    وبقيت من ناسا إنت وهي
    بقت
    بي نورا من ناسك ..
    سكرت خلاص !!!
    أها إنشاءالله الجراح خفت
    وقبل تغرق
    لِفاك بالنجده غطاسك ؟!
    ولا تحاول تبرر ساي
    مابتقنع ولا نفسك
    ولابتقدر تسكِت مره حداثك
    هداك شبح العدم واقف
    وظنيتو بينادي عليك
    مقصات النهاليه معاو
    حلق لي كل جيرانك
    فأحسنلك
    تبل راسك
    هداك قبرك
    ودي الحله
    ومابين
    إنو تاني تجيها
    أو هيَّ برضو تاني تجيك ،
    حلم ممتد
    زفير وشهيق
    بحار من تيه
    وبعثِ جديد
    أخيرلك تحصي أنفاسك
    هدِي الدمعه
    وهدي الأحزان
    ترانا بكينا دون نعرف
    نحاسك وين
    ووين ماسك
    ولا أستأذنا حزنك فيك
    عشان نبكيك
    ولا دقينا باب دمعك
    ولا كلمنا حُراسك
    بكيناك ساي بدون نشعر
    بدون نعرف شنو الحاصل
    وإيه فايدة بكانا عليك
    بكيناك التَّكَنُّو
    قبل ده ما مات فينا
    قبلك زول
    ولا اتنسينا ، لا نسيناك
    ولا خلينا قُداسك
    دفناكَ التقول مزفوف
    علي بنيتك
    وشهلناك علي باكر
    حنَّناك
    وراجين بكره أعراسك ...
    هداك نعشك
    وياهم ديل مًعزِّنك
    جميعن ما بكوك بالصِح
    مع أنُّم ياما حزنو عليك
    وياما كانو بتمنُّو
    جميعُن يبقو أرماسك
    براي قدَّستَ موتك فيك
    وجداَ إحترمتَ خطاكَ
    وكتين فارقت دنيانا
    وكتين إنهدم ساسك ...
    خلاص قُتَّ الرحيل أفضل !؟؟
    أها انشاء الله احتويت جرحك
    وضوَّ العتمه نبراسك ؟؟!
    وكيفنُّم بنات الليل
    كيف الحانه والشُله !
    ووين ليلاك
    وكاسك وين !!
    وين خيلك وسيفك وين !!!
    وين جيشك وفُراسك !!!!؟
    هدول خلوك
    براك مجدوع
    تكنَّك لا لهيت بالليل
    معاهن يوم
    ولا قاسمتهُن كاسك
    تكنَّك ماضي فاضي ومات
    تكنَّك ماضي فاضي
    وفات
    تكنَّك لا كتبتُن يوم
    ولا دقيتَ أجراسك ...
    سِكرتَّ خلاص !!!؟
    !!!!
    أها إنشاء الله القبر حضنك
    ومما شاف رؤاك باسك ؟!
    تناضل ساي
    بدن معني
    بدون وعيَك ... ودون باسك
    أها إنشاء الله إسترحتَ خلاص
    ونساك الممات ناسك ؟!
    فقدناك ...
    غايتو ما عارفين
    فقدناك ليه
    ولا عارف
    شنو الخلاني رغم أسايا
    اتماسك
    هدي الكلمات
    ودي الدمعات
    بريت أقلامي شان أبكيك
    وجهزت الحروف والنم
    جهِّز يله كراسك
    وأكتب دون إذن باكر
    أكتب دون تفِط فقره
    أكتب دون تخُط شوله
    ودون نقطه
    ودون أوزان
    أكتب ...
    حتي لو هرب الكلام مني
    ودخل بالغلطه في ذاتك
    ولو حِرد الحبر قلمك
    وجافاك مره قرطاسك
    أكتب :
    إنو مهما الحله تصبح
    بي وراك خصبه ،
    مابتنجب مثيلك زول
    وعاقرات النفوس
    بي وراكا
    قاصر حتي تاريخنا
    يحفظ لينا ميراثك ...
    شوارع الحله مما فُتَّ
    ما أحترمت خطاوينا
    ولا أحترم الصباح الليل
    ولا أنكشح القمر في النيل
    ولا جات الشمس تاني
    ولا قِدر الصباح
    يدينا بعدك ضل
    ولا آوتنا أحراشك
    فتح موتك نوافذ الهم
    ومليون ألف شارع خوف
    دخل محراب وفاك عمداً
    قصيدي المُر
    وأصبح في سماك راهب
    وحتي غنايا إتناسك
    تليتلك
    كل تراتيل الغُنا الموجوع
    ودوزنتَ الحزن والآه
    عشان أقدر
    ألاقي حروف تعبِّر صاح
    إلا جيوش أساك قدرت
    تسكِّت في دماي النوح
    وباع كلماتي نخاسك
    فعُذراً
    كان رثيتك بي سيوف الحق
    وسويتك ملاك من طين
    وجرَّح ... قولي إحساسك
    أبداً
    مابكيتك ساي ترف كلمات
    ولا داير أرضِّي القول
    وأوري الناس تواريخك
    ولا قاصد أخجِّل
    بي كلامي القُتُّو مراسك
    إلا بكيت مرُوتك فيك
    وواجعاني الشهامه الشافعه
    ماتت ساي
    وكتين فُتَّ راجل جد
    ورابط للممات جاشك
    هداك قبرك ...
    .... ودي الحله ،
    علي كيفك
    هنا الرحمه وهنا الغفران
    هداك بحر السماح ممدود
    فرِّغ كل سنينك ديك
    وماتقنط من التواب
    ولا ينقص يقينك سَنت
    أكشح كل ذنوبك ديك
    وأملا من الجنان كاسك
    هداك الحق
    وده الباطل
    هديك النار
    ودي الجنه ،،
    ..... علِـي كيفك
    avatar
    نورالدين
    مشرف
    مشرف

    عدد المساهمات : 261
    العمر : 45
    الموقع : مروى

    رد: الوصية الاخيرة

    مُساهمة  نورالدين في الثلاثاء يوليو 13, 2010 2:24 am

    علي كيفك
    هنا الرحمه وهنا الغفران
    هداك بحر السماح ممدود
    فرِّغ كل سنينك ديك
    وماتقنط من التواب
    ولا ينقص يقينك سَنت
    أكشح كل ذنوبك ديك
    وأملا من الجنان كاسك
    هداك الحق
    وده الباطل
    هديك النار
    ودي الجنه ،،
    ..... علِـي كيفك
    كلام جميل ومعبر وبه نصائح تشكرو عليه
    avatar
    ود الحوش
    عضو ممتاز
    عضو ممتاز

    عدد المساهمات : 97

    رد: الوصية الاخيرة

    مُساهمة  ود الحوش في الثلاثاء يوليو 13, 2010 8:59 am

    الاخ ابراهيم قراءت كل القصائد وكلها تنافس فيك قيم وخصال
    دليل للخير وخاصة نجاة والوصية الاخيرة تاثر في كل من يقراءهما
    زدنا من هذه الروايع علنا نجد الفضيلة الفينا او نسمع ملاكنا الفينا
    ونتجنب مكان الشر
    شكرا وكتير تقديري
    avatar
    معز عوض
    شاعر
    شاعر

    عدد المساهمات : 10

    شكر خاص جداً

    مُساهمة  معز عوض في السبت يوليو 24, 2010 11:20 am

    شكراً عزيزي
    أتمنى مزيداً من النقد ،
    وليس الثناء على قصائدي
    واعدكم بمزيداً من الجميلة .

      الوقت/التاريخ الآن هو الخميس ديسمبر 14, 2017 11:18 pm