روائع ابو آمنة حامد

فرحة

بين الريد والهوى عشنا أيامنا سوى
ما قاسينا النّوى
ما أحلاك يا هوى الهم راح وإنطوى
عش ريدتنا استوى
بين إيديهُ هنايا في عينيهُ منايا
حققنا أحلامنا
والعاشق عقباله
=====
بيني وبينه حكاية ما ليها نهاية
وأحلام دنيايا
لو شفتوهُ معاي خطوُه الحالم آية
يروي محاسنُه رواية
كم ضوّت دنيايا نور دربي برايا
حقّقنا أحلامنا
والعاشق عقبالُه
=====
أنا بحبُّه أكتر ياما هواي بيكبر
ياما مشاعري بتسكر
حبه النامي الأخضر راعيناهُ وأزهر
في قلبينّا ونوّر
والعزّال كدناهم في لحظة نسيناهم
حققنا أحلامنا
والعاشق عقبالُه
======
الأحباب شافونا بالأزهار لاقونا
هنيناهم وهنونا
حبيناهم وحبونا غنوا معانا وشاركونا
بالأزهار لاقونا
يا عشاق عقبالكم قولولنا هنيّالكم
حققنا أحلامنا
والعاشق عقبالُه
====
قالوا بتحبّوا
قلت ليهم مالُه
إيدو على إيدي الهنا مشينالُه
حققنا أحلامنا
والعاشق عقبالُه

كانت معى

عمرى تجمع كله عند اللقاء الممتع
خطواتها وقع الحداء مموسقا فى أضلعى
وحديثها الممراح...
دوزنة تدغدغ مسمعى
اللحن فى الحرف الذي
فى ثغرها المتمنع
يا فرحتى بالكلمة السكرى ترف فلا أعى
لفى الضفيرة أو دعى..عمرى عليها مرتعى
يا موجة العطر المرف
على ربيع اضوع
بى شوق مغترب
الى وطن الشفاه الاينع
لملامس الخد الانيق
على المجال المترع
للحلمتين مسافر
بشراع نهد...مقلع
مراء يا حلم الليالى الحمر
لا تتمنعى
النسك ليس سجيتى
لا تسرقى حريتى
للصدر آهات تضج
ولى أنا امنيتى
لا تلبسى ثوب العفاف.....
فلست أنت نبيتى !!
قديسة الاهواء ..؟
ويحك .. إن تلك مشيتى
للغير فاكهة العناق
ولى أنا انشودتى
تتدثرين بثوب راهبة وخاشعة
وانت خطيئتى
صونى عفافك للألى..
عرفوا مكانتك التى
أقسمت اطفيء فيك..فى
في نهديك..غضبة ثورتى
لن تهربى منى
فهذى (مشاتل) ليلتى !!

بنحب من بلدنا

بنحب من بلدنا
ما برا البلد
سودانية تهوى عاشق ود بلد
بعيون المفاتن شي ما ليهو حد..

التوب المهبهب فوق أم الضفاير
والخد المعطر زي أحلى الأزاهر
والخطوة الأنيقة ترنيمة مشاعر
أنا بي كلو عمري بمشيلا وبسافر
مين في الدنيا دية أجمل من بناتنا
الليهن قلوبنا والفيهن صفاتنا
الكامنات في روحنا والعايشات في زاتنا..

في حلفا البداية أحلامي وهنايا
أنا عايش لحبي المخضر برايا
النافرة الأليفة بجروحي وهنايا
أنا لي في كريمة شايقية بشلوخا
نعتز بصفاتا ما نجهل تاريخا
ماها المابية ريدتي ومو ياها المسيخة..

في شندي العظيمة تلقى بنات جعل
وحدات في المتمة زي لون العسل
النايرات خدودن زي فجرا أطل
في سنكات بنعشق بت سمرة وأبية
ترتاح في الضريرة خصلاتا الغنية..

عاشت في شعوري أحلى هدندوية
الواردات جدودن في الجود والشجاعة
البظهر جمالن من زمن الرضاعة
سودانية مية المية في زوقا وطباعة
يا ناس أرحموني أنا قلبي فرطاعة ..

لو تلقطنا اليانعة السمحة ونضيرة
تستنى الحليوة في مشية أميرة
أجمل حب عندي في قلب الجزيرة
لي في الغرب أغيد في دار حمر والبقارة
نحميها بسيوفنا تفاحنا ونضارة
تسكرنا الليالي وتطربنا النقارة
لي في جوبا الساحر تسلم لي خدودو
يمرح في غاباتو يسرح في ورودو
حبي الغالي ليهو ما بعرف حدودو

شكرا راحيل على نشر روائع الشاعر القامة ابو امنة حامد

شكرا نور علي المرور
وينك يا غائب ؟؟
والله ليك وحشة ..
انا الايام \دي في اجازة من الفيس بوك ..
ايه الاخبار هناك ؟؟

مرحب راحيل انتى الغائبة وبعدين شنو حكاية الاجازة دى الوقع ليكى عليها منو نحن نعتبرك غياب وسوف نشكل ليكى مجلس تحقيق
لكن على كل حال الحمدلله انك بصحة

شكلك كدة ح تناقشها في اجتماع مجلس الاساتذة القادم ..
تحياتي ليك وللزملاء
ويا رب قريب اطل هناك

ود الحوش كتب:روعة المبدع ابو امنة وجمال الكلمة وحسن التعبير
احسن اختيار
في انتظار التتمة

شكرا ود الحوش
وان شاء الله ح اضيف مجموعه كبيرة من قصائد الراحل المقيم ابو امنه حامد
لك الود

راحيل ازيك نحن فى انتظار اضافة المزيد
من اشعار الشاعر الكبير ابو امنة
نسال له المغفرة والرحمة