نفاج

مساحة للوصل ونفاج نفتحه..بيننا جميعا وعبره..نحكي.. نتواصل..نتعارف..نتآلف..لنكون معا..نهر الحياة الخالد

دخول

لقد نسيت كلمة السر

مواضيع مماثلة

المواضيع الأخيرة

» دوبيت مسدار البنات
الإثنين ديسمبر 23, 2013 10:30 am من طرف الشاعر السماني حسن

» كفايه ......... كفايه
الأحد ديسمبر 30, 2012 12:35 pm من طرف عثمان تباكي

» سهر الكمنجه
الأحد ديسمبر 30, 2012 12:28 pm من طرف عثمان تباكي

» كلام عبدالله زول الله
الأحد ديسمبر 30, 2012 12:24 pm من طرف عثمان تباكي

» العجين المر
الأحد ديسمبر 30, 2012 12:19 pm من طرف عثمان تباكي

» طيارة جات بي فوق .......... قصيدة جديده لهاشم صديق .. حفظه الله
الإثنين ديسمبر 17, 2012 9:32 am من طرف عثمان تباكي

» جديد هاشم صديق
الإثنين ديسمبر 17, 2012 9:26 am من طرف عثمان تباكي

» هاشم صديق - كابوس صابر
السبت ديسمبر 15, 2012 10:19 am من طرف عثمان تباكي

» نفاج منتدى خامل للاسف الشديد !
الأربعاء نوفمبر 14, 2012 1:49 pm من طرف ابو جوان

    اشعار محمد طه القدال

    شاطر

    ابراهيم الصغير
    مدير عام
    مدير عام

    عدد المساهمات: 213

    اشعار محمد طه القدال

    مُساهمة  ابراهيم الصغير في الإثنين يوليو 19, 2010 6:28 am

    ماضهبت

    ما ضهبت اقول لقيتك
    وانتى فى كل الخواتم والمياتم
    والنجيمات والعواتم
    ما حزنت اقول بكيتك
    نحن فى حزن المخاليق
    والمغنين المطاليق
    الفرح جاييك وعد
    غنوة اولاد التحاريك
    السعد ولا البعد
    البعد ولا السعد
    كنتى فى ليل الخوابى
    تهاتى بينات الطوابى
    تحاكى جقليب السعى
    الجنيات خلو حجرك ريح يفوفى
    وعين مزرزرة من شقى الفرح المرابى
    ومنية الوعد الدعى
    يا ديارى الوين ....أنى
    تور عفين الشين .....أنى
    ما اضينة وزين انى
    تور عفين الشين انى
    وانت فى شوفك تخاتل رفة الطير والحفيف
    وانت فى خوفك تكاتل عينة الجلبت خريف
    وانت فى لالوبة مصلبة البنيات
    النسيمات الهفيف
    وانت فى لالوبة مشنقة الوليدات
    ناس نجومى ومحبس النفس الرهيف
    بطنك كرشت غى البنات نافى
    دقنك حمست جلدك خرش مافى
    وكت الوهم نافيت .. صدق الوعد جافى
    وكت العلم جافيت .. مر الصدق وافى
    وكنا بنشيل الغباين والاناشيد
    جهدية الاورطية
    جهدية الحلبونا
    شدو جمالم جونا
    حلبنا ليهم سمسم
    والسمسم ما كفاهم
    جلبنالهم سعية
    وجينا للبقعة ام قبايل
    سيل من الوادى الكبير
    الكفيف شايل الكسيح
    يا عيون ود الضكير
    واحدة من توشكى
    تقلع
    تانى تقلع فى المطامير
    يا جبة الدرويش
    البابا بسل العيش الله بسلا
    والبابا خدمة الديش الله بسلا
    البابا القول بى شويش
    يا عيون ود الضكير
    عماك فى حقك ديه
    لى زمنا مو جهدية
    جهدية الاورطية
    جهدية الحلبونا
    شدو جمالم جونا
    وحلبنا ليهم سمسم
    والسمسم ما كفاهم
    جلبنالهم سعية
    يا عيونى شن بتشوفى
    ويا امونة شن بتشوقى
    شدرا تال اليمامة
    ولا الصقر الحمامة
    ولا البطن التفوفى
    يا امونة شن بتشوفى
    ويا عيونى شن بتشوفى
    جهدية وسيف وراية
    تبروقة وخيل وشاية
    اذان بالجوع اذن لى
    ام خوفك فايت خوفى
    يا امونة شن بتشوفى
    ويا عيونى شن بتشوفى
    تلت التلاتة شلق
    تانى التلات محلق
    والتالت جا يبشرنى
    سرقوهو الدايرين حتوفى
    يا امونة شن بتشوفى
    ويا عيونى شن بتشوفى
    شايفة الدموم واللمة
    بين الدقون والعمة
    ولانى فوق معلق
    صقر الحدى مندوفى
    يا عيونى شن بتشوفى
    ويا امونة شن بتشوفى


    ابراهيم الصغير
    مدير عام
    مدير عام

    عدد المساهمات: 213

    رد: اشعار محمد طه القدال

    مُساهمة  ابراهيم الصغير في الإثنين يوليو 19, 2010 6:30 am

    احلام الحزن الفرعوني

    بحر المالح سيلاً ضرّع و موجاً فرّع من الشام
    من ناك للسهلة النجدية
    الأم البكر الزنجية
    يا وادي الزنج
    لو آخر خيمة إنقجت كانت ركزت فوق سنار
    لي ريحة القهوة العربية
    كانت فابريكة بن
    كانت مشتل أبنوس
    كانت فى الشعر القرقد قايم شتله تجامل الشتله
    التفل الروس
    كانت فى الطبع الحار
    الريد الحار
    الحزن الحار
    الحزن الجن الأحمر
    كان مهووس

    الحلم التانى
    الخيل فى الخيل
    و الخيل فى الخيل
    لي فاطمة أم حجل
    العرجون
    الخيل مرحات
    النوق مرحات
    الخيل الدفرت
    دفرت وادي صعيد أسوان
    للبت البكر الزنجية
    النوبة تصيح
    لي حلفا نبيح
    للنهد السابح فوق الريح
    للعشق الساخن رجاى
    الخيل الدفرت
    دفرت دنقلا دون لا جاى
    الحلم التانى
    المد التالت غاشي الدامر بالعطرون
    النار ما حرقت دار شنقيط
    النار ما بتحرق وادي الزنج
    النار آبنيه
    يابنية العرب الزنجية
    و بنية الزنج العربيه
    النار فى النار
    نيران ألوان
    شيتن قرأن
    و شيتن يا حليوه الحزن الجاكى يكون غبيان
    و شيتن فى الفرح التايه فيكى
    كذا الضهبان
    وشيتن فى قليب الجدى الهشة الرخص النيه
    الريد الليك متحمد
    سركى مسوكر جاك آبنيه بلا عنوان
    الحلم الثالث
    التربة الأولى الموس الشفرة الصغرى
    التربة الأولى الموس الشفره الصغرى
    التربة الكبرى الموس الشفره الكبرى
    التربة الكبرى الموس الشفره الكبرى
    الوجعه الكبرى
    الستر العار
    العار
    العار
    الشهوة انبهلت
    إن المؤوده انسألت
    يا ووب البطنه الطلعت
    يا ووب البطنه الرجعت
    يا ووب الروح الطلعت
    روحا مرقت تردح يا فرعون
    يا ووب الأم الجاضى حشاها
    العين فى السما و الليد فى جناها
    يا ووب الضاقت فى الميلاد
    أم ستراً مكشوف غطيها
    البت يا دوب بكريها
    ألحق يا الطايل باعك
    نادهاك فى الضيق
    الفا الدركان بسراعك
    سهل فى الحوبة قساى
    وبرد في الحارة حشاى
    الرحم انشقا
    و دخلت مرقت دخلت مرقت
    ..صلت ندهت سكتت كتمت
    سكلت
    إن المؤوده انسألت
    اللهب الهبله النار
    المهلة آ ناس
    المهلة تطير
    الرحم انشقا
    المهلة متين ألقاها
    و السهلة متين ألقاها
    المهلة حليل
    السهلة حليل
    البلد الشجر البحر الطير ووباى
    الريق نشفان من القوقاى
    وكان فى الحلة الناس بتجض
    و اللوز فى القطنه هناك بيجض
    و النسمة التائهة وغاشية الحلة سموم بتجض
    و البسمة انبهتت ونزلت دمعه وفوق للدمعة
    عيون بتجض
    وداك اليوم
    مسيخه حليوه يا فرعون
    لهيب بيبق
    وقالوا قبيل كمسيب الغبينه يشق
    و ألاّف الألوف رايح
    و أكّال الكتوف رايح
    و البمشى فوق زبد البحر
    الببلع السيخ و الحجر
    ويا الدمع النزل فى الحارة
    دميع الرجال غلاب
    و يا الغبن الوقف فى الحلة شوكت حوت
    يكون حزناً فدر فى رجالنا مو كضاب
    يكون حزناً فدر فى رجالنا مو كضاب

    ابراهيم الصغير
    مدير عام
    مدير عام

    عدد المساهمات: 213

    رد: اشعار محمد طه القدال

    مُساهمة  ابراهيم الصغير في الإثنين يوليو 19, 2010 6:32 am

    مسْدَار أبو السُّرة لي اليانكي


    أُمّاتِي القِبيلْ
    بي حِنّهنْ لجّـنّي
    كَرفة وقَلدة
    كيف شوق اللّبن رَجّني
    حُزناً جاني في مَيْع الصِّبا يلَجِّني
    أطلعْ مِنِّي يا جلدي المِنمِّل جِنيِّ
    واطلعْ مِنِّي يا حُزناً بِقى مكَجِّني
    خَلّني أبدا مُسداري
    وأودي قفايا لي داراً بِقَتْ مِي دَاري
    جِيتَا ..
    وجِلْدِي بينو وبين عضايا الشّحَمَة
    إلا النّار بِقَتْ قِدّامي
    جِلْدِي اللّيلة بينو وبين عَضَايَا المافي
    إلاّ تراني شَوّالْ الكِبِسْ
    نِفّيخْ جَراريب الوَرَمْ هَدّامِي
    في جِلدي الورم قُولَنْلي
    واللاّ صَحِي الورم عَضّامِي
    سفريتك مِي في النيّة
    ماها الكانت محريّة
    خابراكْ عِرِّيفْ ..
    ذم العُربانْ واللاّ قِيام الوردية
    مالكْ ؟؟؟
    تَرْيَانْ ومندِّي
    كاسي الكِتّان والهندي
    قولَكْ كِكّيفْ ترجى البيشان
    واللاّ الغُربة البي الزِّنْدي
    برقاً عِبْدِلِّي الوَزْنِ
    يا طاشْ .. يا جاب المُزْنِ
    فَرِّقْ يا الضّيفْ
    فِعْل الغَضْبان ..
    أم فِرْفيرات الحُزْنِ
    وشِنْ القَعدة
    يا أبو السُّرة
    شِنْ القَعدة في ضُل العمارات أم كمرةً برّة
    ضُقْنا الحَنْضَل اليانكي
    وبَلَعْنا المُرّة
    كِمْلَتْ كوتة التُّمبَاك
    صَقَعْنا الجِّـرّة
    ووكت إتقفّلَتْ شِقّيشْ
    قَبَلْ بي المرّة
    نَرْمي أمُرنا في بلد المعاني الحُـرّة
    الشّمْ خَوّخَتْ
    بَرَدَنْ ليالي الحّـرّة
    والبرّاق بَرَقْ ..
    مِنْ مِنّا جاب القِرّة
    شوف عيني الصِّقير بجناحو كَفَتْ الفِرّة
    تلقاها ام خدود الليلة مَرَقَتْ بَرّة
    مَرَقَتْ بَرّة ..
    مَرَقَتْ بَرّة تغلي مديدة الحِلْبة التَسَمِّن رِدْفَها
    السَمِنْ المبَسْتَرْ يانْكي
    والويقود بعيرات الدُّخان في العين
    وفي الفَشْفَاشْ يسوِّي عمايلو
    شِنْ فايدة مديدة الحلبة والويقود بشيلو اليانكي ؟؟
    يا ابو السُّرة
    قامت من دخاخين العمى تلمِّع وشِيها
    اليانكي مِسْتَنِّيهَا
    كان اليانكي مستنيها في مراية السَجَم في اللّيل
    لقيتها مِتِلْ فريخ الطّير
    مَرَقْ ود عينها من ود عينها
    رجّافة المزمّلْ حُمّى
    جَفَلَتْ مِنّو
    وَقَعَتْ عندي
    صدرها بغلي
    يا ابوالسُّرة
    شُفْتَ اليانكي في ود عينها
    سُقْتَها للبحر
    يمكن يغسِّل عينها من اليانكي
    فُتْنَا الحَجْرة بالكَتّة وغطسنا مسافة
    تبقى قَدُر مسالك الرّيدة
    وما لاقانا من يغبانا في البحر الفَدَرْ تحتاني
    ناس عارفاها
    ناس عارفاكا
    ناس عارفاني
    نادينا القعوي والبُلْطي
    قرقور السّمَك ودّانا لي دابي الخُشَشْ
    نادينا عُمّال الطّمِي
    عُمّال الطّمِي الصّارقيلا
    والقَرْمُوط
    وود الموية
    وفُتْنَا عليها
    كانت نايمة
    عَجّال البحر حارساها
    كانت نايمة بين حجرين وضُل ساسوية
    وعُمّال الطّمِي الصّحونا لّمُو حصى البحر
    قسموهو ياتْ من كان سبع جمراتْ
    دابي الخُشّة قال :
    أدُّوها في الجمرات تلات سبعاتْ
    قُلْنا :
    أدُّوها في الجمرات تلات سبعاتْ
    مَسَكْنَا دَرِبْنَا
    وعُمّال الطّمِي الصّحوها
    خابرين الدّروبْ
    مَرَقوبنا في مُشْرَعْ مسارب الضّيْ
    لقينا الدُّنيا تترجّانَا
    قُوقَا القِمْري
    خَوّى صِقيرْ
    وعَوّى حِديْ
    وعُمّال الطّمِي الصّحونَا
    لَمُّو على البعرفو الصّيْ
    حَصَى القيزان
    دوابي الدّارْقَة
    والسِّحْليّة
    والنّاسْ التِّحِتْ
    النّاسْ التِّحِتْ خابرين عَمايْل اليَانْكي
    مَرّة معونة لي اللّغّاف
    ومَرّة دَوانْكِي
    شِنْ معناهو جيبها إن كان ملوهو بوانكي
    وصوتها مكتِّمو القَرَبين سيوف وسَوانْكِي
    قولَنْ لي الأَخْلو ديارو
    دمّكْ فَرْهَدْ في نارو
    غَوّرْ في الأرض
    طارو صَقْرين
    أولاد الأرض ما طارو
    لحمي غَطّى بِنْ عَمِّي
    شو صار حالو يا إمِّي
    منديل العِرْضْ في بيت الدِّينْ
    دمِّي ما يخلِّي دمِّي
    إنّا من دير ياسينْ
    صِرْنا في جِزْر التّين
    عَمْ نسقى بعضْ
    حُبّ الزّيتونْ بدّو يرجع للطينْ
    صابرا تحت الدورية
    صابرا فوق الدورية
    صابرا فوق الدورية
    يا حال الضِّدْ
    لحم الطِّفلين نابت غُصنْ الحريّة
    جِذْري مو في شاتيلا
    ما قال حالي يا ويلا
    حِنّا في الأرضْ
    أرضِ فلسطين
    يا إمِّي هيلا هيلا
    يا إمِّي هيلا هيلا
    يا أُمِّى هيلا هيلا
    هيلا
    هيلا
    هيلا
    هيلا وهيلا يا ابو السُّرة كُجْ العين
    تخبر الشّينة من الزّينْ
    تَفُرْز الطّاري من السّاري
    يا ابو السُّرة كُجْ العينْ
    ومدُّو صباعك السّبابي
    قول لي الغَافي يا زول هويْ
    وهوي يا غافي يا زول هويْ
    أرخي الغُردة للعَنّافي
    شِدْ القمري بالحوبابي
    في مسدارنا
    شِلْنا نهارنا
    في إيدنا من ساسو البحر عقدينْ
    مَسَكْنا دَرِبْنا
    وعُمّال الطّمي الصّحونا
    خابرين الدِّروب مرقوبنا في مُشْرع مَسَارب الضّيْ
    لقينا الدُّنيا تترجّانا
    قوقا القِمري
    خَوّى صقيْر
    وعَوّى حِدَيْ
    وكُنّا جماعة
    دابّات الأرض والسّايمة
    عَوّامة البحر والطّيرْ
    وحتى الغيمة قصّاصة الأَتَرْ
    فوق راسنا شايفة الدّربْ
    ضِنيب اليَانْكي
    قال القمري لي الضُّليلة :
    خَلِّكْ صاحية زوغ اليانكي لا يودِّرنا
    قال الدّابي :
    إن يغباها ما بيغباني
    ولمّا الشّمْ مودِّعة غاربة
    وَصّتْ جملة الصّقّار عيونهنْ كَارْبة :
    أبقو أَلِفْ
    بَفوت لي المِتْلَكُنْ ناهضينْ
    وفوق ديناب عريباً غادي
    قال السِّحْلي لا تغشوهو
    ديل عُربانْ توابع اليانكي
    وخَلُّوها العريب الغايبة
    السّراقْ طبيقو معاهو
    تيجاناً عروشها الخروعْ ..
    الهَشْ ..
    العَويشْ
    الناّر تَعَلِّبْ فوق عُقَال العَرْشْ
    ولا خَسّانا بي هادي العروش الهـُرْبة
    يا ابو السُّرة .. لا عَقّالْ
    مسكنا دربنا
    وعمال الطمي الصحوها
    خابرين الدروب مرقوبنا من وادي الضلمة
    الكان
    وعقب لمينا في باقي الجمع
    قاصين دريب اليانكي
    سنور الغيب في الكونغو
    وصبراً من جنوب أمريكا
    ومن كلهاري ديباً ضاري
    والتمساح وليد أمازون
    ونمراً في النمور كمبودي
    وام رَخَمْ الله مكسيكية
    ولمّ لميمنا
    لمّ لميمنا والشّمش البتوقد فوقنا
    شدّ شديدنا لا التِّمثال مَشيّلْ روقنا
    عَالَم حُرْ يدوعِلْ فوقنا
    لي يوم سوقنا
    نبصُق فيهو .. في عينيهو جَرْ واسوقنا
    يا شمسي طِلِّي .. طِلِّي
    شاوري عَ بيتي دِليِّ
    كَيّال الكيل .. ختياري ماتْ
    ظِلِّي عَمْ يحرس ظِلِّي
    عَادِلْ عَ خَييّ ميلي
    خَييّ ما يحمل شَيلي
    ما خَفّ الشّيلْ
    تاني المرّات ناطِرْ رصّاصِي سيلي
    عيني في الفيل ما ظِلّه
    كِلْنا ندريه ما نضِلّه
    يا ويل الويلْ
    نرمي الجمرات عَدِّ المستشْهِدْ كِلّه
    نرمي الجمرات عَدِّ المستشْهِدْ كِلّه


    ابراهيم الصغير
    مدير عام
    مدير عام

    عدد المساهمات: 213

    رد: اشعار محمد طه القدال

    مُساهمة  ابراهيم الصغير في الإثنين يوليو 19, 2010 6:34 am

    شيخ تلب

    حزينة وجوفك دمدم حزين
    حزنت وقلب الحازنك خلى
    تعدى الحلم الشفتيهو قديم
    وتملا حسارك قلبك ملى
    وكل ما هبهب قاصدك نسيم
    يلهب جلدك كضباً طلى
    فطمت جناك وحضنك رحيم
    وحنـّك تب ما صابو البلى
    سمعت غناك وصوتك رخيم
    شديد اوتارك زايد حلى
    عرفت الغم الصارلك نديم
    وشفت الكون بى شوفاً جلى
    لقيت الكاتلك كافر زنيم
    وانت وحيدك قلبك ولى
    يا شيخ تلـّب انزل كبكب
    وارمى الحترب فى الميضنة
    فى الباردة تعب لى الحارة تسب
    عجمان وعرب فى المضنة
    البس خضرب وادخل قصرب
    والحس واشرب فى الميضنة
    دى الدنيا تهب شقيش ما تصب
    القبلى حرب ..
    لى سيدك حب لا تخش ضرب
    لى يوسف جب فى الميضنة
    دقنا وشنب درويشنا يسوق
    تايوتا تكب فى الميضنة
    يا شيخ تلب وين الزغلب
    الكانو تلب
    ديل صبحو غرب
    ام اضحو جنب
    فى الميضنة
    انزل كبكب وارمى الحترب
    فى الميضنة
    كبس االهم على
    والحال قبض يا سيد
    غبنا فيا كج
    وتادو جنبى معيد
    مو جنا تجيب
    سلسل جنازرو تقيد
    بلا غيبوبة البلد
    النصيحو مصيد
    كنا تلاتة ...
    ود النوق وديك وعتيد
    قلنا نكمل الفرض
    العلينا نشيـد
    جينا عليكى يا المحبوبة
    شوقنا يأيـد
    بقينا ضهابة متل زولاً
    ضرير وبليد
    ود النوق مركوبو
    العليهو يشفق
    بقى يتباطأ
    فى خبة مشيهو يلفق
    ان جاهو العلوق
    صيحة نفاقو تنفق
    اصبح جدوا وكل
    ما شافلو سلقة يصفق
    - وديك الجن
    رفيق همى وغنايا وفنى
    سوا طريقو فى نخبة
    وصبح متهنى
    ما هماهو باسط مية
    سكرة ينى
    كل ما شافلو زفة
    جديدة فوقة يغنى
    - يا عتيد الرماد
    نط الحيط بالزانة
    تفضى الخانة
    تلقى جنابو سيد الخانة
    فارش دارو لى اسيادو
    بيت كرخانة
    غافل ضبحة الفجرى
    وجرى السلخانة
    يا حميد اقيف
    شوف الخلوق محنانة
    كفكف دمعتك
    والعبرة فوت خنقانة
    عسلك سال بحر
    فوقو النحل ونانة
    ياد ان طاق غرق
    جازاك دباير دانة

    ابراهيم الصغير
    مدير عام
    مدير عام

    عدد المساهمات: 213

    رد: اشعار محمد طه القدال

    مُساهمة  ابراهيم الصغير في الإثنين يوليو 19, 2010 6:36 am

    حليوة ليلة المولد

    بقول غنوات وأقول غنوات
    فى البلد ا لبسير جنياتها لى قدام
    ولى الولد البتل ضرعاتو فى العرضة
    ويطير فى الدارة صقرية
    ولو السمحة تلت إيد ومدت جيد
    يقوم شايلاهو هاشمية
    ويشيل شبال ختفة ريد وفرحة عيد
    وريدة روح وحمرة عين وايدية
    * * *
    ويالولد البشيل مدقاقو
    قولة خير على القمره
    يقابل الجاية متحزم
    ويدارك الجاية متلزم
    كلام فاسك على أرضك
    يبقى عديلة يا بيضا
    ويبقى زفاف تزغرد ليه قمرية
    * * *
    وقبال حول تغّيم غيمة قِبلية
    ترش الدارة والحدبه الصعيد الحلة
    ويا فرحة بتطارد الصفقة فى النسمة الصعيدية
    ويا جهرة نهار الليلة بدرية
    رحيح جنياتنا فى الحدبة الصعيد الحلة
    * * *
    يا سمحاتنا هو لبلب
    ويا قمحاتنا هو لبلب
    وياللوز الفتق فى الوادى هو لبلب
    ويا سمحاتنا هو لبلب
    ويالبحر الطمح مدّادى هو لبلب
    سألتك بالذى ركز الارض معبد
    وسوى الفاس عليها مقام
    سألتك بى حشا الأُمات ودمعاتنا
    * * *
    سألتك بى كبيداتن ودعواتنا
    شليل وين راح؟؟
    يكون ضل الخريف فاتنا
    شليل وين راح؟؟
    وزى برق السماك الجابها دغشية
    وزى زغرودة البطن الكبارية
    مرق من شامة القمره
    ومقدم بالعديل يبرا
    تعالوا أبشروا آجنيات
    شليل ماراح شليل ما فات
    شليل عند المسورو حرق
    بقالو حصاد
    شليل فوق التقانت قام خدار وبلاد
    شليل مسدار شليل مشوار
    شليل أرضنا يا جنيات
    شليل قايم نصاصى الليل
    يتمتم ليلو وردية
    حرازنا شليل شليلنا دليب
    شليلنا دليل على البلدات
    بعد درب التبلدية
    شليل ما راح شليل ما فات
    شليلنا ونحنا همباتة ومهاجرية
    مزارع بات على عشقين
    تراب بلدو وسماح فوق بت مزارعية



    ابراهيم الصغير
    مدير عام
    مدير عام

    عدد المساهمات: 213

    رد: اشعار محمد طه القدال

    مُساهمة  ابراهيم الصغير في الإثنين يوليو 19, 2010 6:38 am

    صابرين

    صابرين
    ياحزن الغنا
    صابرين
    من بعد الضنا
    صابرين
    على وعد المنى
    *****
    برجاك
    يا وكت الحبيبة
    وبلقاك
    فى الفرحة القريبة
    وبشراك
    يا أم السنا
    *****
    لا ليل ولا حزن طايل
    لا صد ولا دمع سايل
    لا هم جاك يا أم نفايل
    والنيل فاض وإنحنى
    نيلين
    وحلمك أنا
    فرعين شايلين جنا
    *****
    عشرات حبابك
    سلامات
    شايل سحابك
    سلامات
    والقبلى شابك
    سلامات
    خيلك سنابك
    سلامات
    وهواك هنا
    صبـّين
    عاشقين ترابك
    سلامات





    ابراهيم الصغير
    مدير عام
    مدير عام

    عدد المساهمات: 213

    رد: اشعار محمد طه القدال

    مُساهمة  ابراهيم الصغير في الإثنين يوليو 19, 2010 6:41 am

    المدينة الفاضلة


    في هذي المدينة الفاضلة
    لبس الشعراء تيجان غار وهجوا مع النشيد .. والبوح
    وغنوا للغربة المتلتة في الزمن المكان الروح
    وما بين الرماد والنار فضا الكلمات ومعناهم
    بيمرقوا من هطيل النوح ومغناهم يشقشق للحياة والموت
    يغرد للمدائن الفاضلة جواهم جزاير دوح
    -2-
    قدر يوتوبي ترحل في مداين الناس ... مدينة
    يندلق حسك حداهم قطرة قطرة تعبي صوتك بي نداهم
    مشدود وتر صوتك ربابة مسنود عليك صوت الغلابة
    مفرود من الزمن المفتق والمرتق بالرتابة
    مولود مع الجدة المعتقة والمجرتقة بالرحابة
    ينسدل من شدوه إنشاد المزامير ينسمع في شجوه ترتيل الصحابة
    زمن يوتوبي ترحل في العتامير والمغاسل والغنى المندلي من شطر السحابة
    من عنا الأطفال وأولاد المسادير السنينهم فوق جوازات العصافير
    الحنينهم بحة الليل الطنابير الحزينهم حزنه في الجوف المطامير
    نبله يطلع زي شعاع لا ولولة لا شيل ندابة
    -3-
    ( يامطر عز الحريق ) ( كمّل الناقص وفرضو) )يا مشاوير الطريق)
    شوفي حميد وأرضو يا بلد ليلك غريق
    طولو زي طولك .. وعرضو
    إن ضلامك حر طليق
    أو سلامك أهلو قِرضو
    آه من هذا السليق
    يشتري الراجل وعرضو الفرج باقيلي ضيق
    والصحاح العندي مرضو
    كم إديريجاً حليق
    شان يعيش بي دقنو برضو
    يا مدد قشة غريق
    ( يا مشاوير الطريق) (يا وليدات الفريق )
    لملموا الصابرين تعالوا ( رقصوا البنوت أعرضوا )
    -4-
    يا نخلة المقبول ظلالك واصلة الشموس بي حريرة
    ومجدولة من طيب شمالك مروية عز الجزيرة
    من همي همك سمالك كسر همومي الجبيرة
    لحن الوليد الرمالك مشرق يجبر كسيرة
    طينك مقالد رمالك تحتك مياهك خريرة
    شعرك جريدك حلالك نمة غُناه الضريرة
    غنوة بتقرب منالك
    رعشة جروفي الخضيرة غنوة حبيباً شكالك
    هجر البنية الأميرة عند الترابلة القبالك
    ضليلة صهد الهجيرة
    يا نخلة السلفاب جمالك في الناس غناوي المسيرة
    لو جيدك الفارع بكالك موّال دموعي العسيرة
    أو نيلك السالك أمالك جيهة المشاوير الحسيرة
    أو قبلك المفجوع دنالك روح الأناشيد المنيرة
    شيليلي عِب وأمليلي شالك من غناويهُ السميرة
    شدي من صوتك حبالك نشفي العرق الدميرة
    قولي للجنيات سؤالك يا نخلة بس متكية مالك ؟
    بطنة سبايطك عضيرة ؟
    جدلة سبايبك ممالك محصورة في فد ضفيرة ؟
    ولا السلام البدالك سراب الأماني الكبيرة ؟
    لو صبري بيهدم جبالك شن تبقى غير عيني الهميرة؟
    -5-
    قدر يوتوبي ترحل يا صديق
    زمن يوتوبي ترحل في البريق
    والمدينة الفاضلة نامت في العتامة
    والعتامة تهاتي بالشعر الهيافة
    والشعر متغطي بالكلمة السلامة
    والسلام متداري في الولد الشليق
    والوليد مندسّي في الحرف القيافة
    والحروف الوردة تحلم بالرحيق
    والحلم يتجاوز المعنى الرهافة
    والمعاني تعاند الزمن الرحيل
    والزمن يوتوبي يرحل في السحيق
    والرحيل يوتوبي ترحل يا صديق ؟
    الرحيل الشفتو للناس العلامة
    الرحيل الشفتو للمتلك قيامة

    علياء
    نائب المدير العام
    نائب المدير العام

    عدد المساهمات: 152

    رد: اشعار محمد طه القدال

    مُساهمة  علياء في الإثنين يوليو 19, 2010 6:44 am

    مهاوي الصيد
    مرقن صباحا جيت من عين بروقن
    خايفات مهاوى الصيد خايفين حروقهن
    هن فوقنا متسابحات وعبوننا فوقن
    مرقن من الجايات ختمن مروقن
    جيتك كما الجمرات راجمات علوقن
    من نورى متطابقات حالفات يقوقن
    طيرتين من الجنات منحلى طوقن
    نشدن غناوى الخير طرقن حلوقهن
    من مغرب الغنوات لا عند شروقن
    تابات مع البنوت لا زمات عشوقن
    شبلنو متسابقات متساوى روقن
    شيلن بلا خيلن والعزة طوقن
    نخلن بلا شعرن والنيل عروقن
    ما بردن فاترات يوم حر سوقن
    ما قبلن حارنات خوف البسوقن
    دمرن شعاب الروح فى يوم نشوغن
    بلدن قلوب الناس والحنة شوقن
    هن عرفن الخلقن خابرات خلوقن
    تمن تمام الكيف حسبن فروقن
    ايش البلد حيكون ناقص دلوقن
    غنن بنينة الخير فوق حادى نوقن
    بنن بنن بانينة يا بنينة هى
    نبنى البنا البانينا يا بنينة هى
    باسم الله ابتديت يا ربى يا بارينى
    والصلاة والسلام للحبه بارينى يابنينة هى
    الوطن السماح الحبه بارينى
    قلبى على الولد قلب البلد بارينى يا بنينة هى
    مامنعوك من شمس الله ما منعونى
    والكلمةالحقيقة حقيقة شمس الكون يا بنينة هى
    للغبش السواد غنوة وشفا المكنون
    للظالم سياط تجلد قفا الظربونى يا بنينة هى
    ما منعونى من ريحتك ولا منعوكا
    ما كازوك لو عرفوا العنا وعرفوكا يا بنينة هى
    الغنوة البحجرا عليها بالبازوكا
    دوب سجانها فز وفرهدت فى شروكا يابنينة هى
    ما منعوها من شوفتك اذا منعوها
    تلقاك فى الارض فى امها وفى بوها يا بنينة هى
    شارياك بالنفس ما همها الباعوها
    لا نايحه بتنوح لا أذنت مندوهة يا بنينة
    ما منعوك ما منعوها ما منعونا
    شيل الناس وشم الطين وشوق أمونة يا بنينة هى
    ما شفنا البكيل نقص حوافى الشونة
    ما كبر الصغير بى نفخة البالونة يا بنينة هى
    كيف العاصمة تبقى الشاية للحرية
    والعكاز مضبب والزمن جهدية يا بنينة هى
    نحن عروسنا قولة حق نشيلها هدية
    لى ابو قدوم ونورى حليوة والمكنية يا بنينة هى
    نحن الكلمة شمس القايلة ما بنلوكا
    سن الحق على الظربونى حلق الشوكة
    جنياتا بعرفو الغنوة شدوا سلوكا
    شالوا الحق نهيض نقزى وضرب دلوكة
    نحن بلدنا راسية النيا يراضى حدوبا
    فى الغرب الجبل فى النص جبال النوبة
    فى الشرق التلال عطرون علاج القوبة
    والبركل مع الاماتونج ركايز الحوبة
    نحن بلادنا باولادها البعرفوا الراطنة
    احمد ودقرنق واسحاق اخوك وابوفاطمة
    لو ما كان قبيل حشف القبيلة الجاطنا
    كنا نهضنا لى قدام لحقنا الفاتنا
    نحن غنانا للولد البشوف قدامو
    للبنت البتسند حيلو شادة حزامو
    ونحن غنانا للبلد البراشى غمامو
    نطرى جمايلو حميدو وجميل اياموا
    جيت ناس فلتكان ختونا فى غوغايا
    قالولنا السلام زيت البلد هو الغاية
    (شيشانا) القبيل غنونا بالهوهايا
    ولدولنا السلام ولدة حبل بالداية
    المهدى القبيل ولدا قدل فوق عزة
    و(الشيشان) سكوت لا زول عرض لا هزة
    يا نص العصا اللاكرة فيك لا فزة
    بوش وبلير اخوك ختونا فى قد بزة يا بنينة هى .

    ابراهيم الصغير
    مدير عام
    مدير عام

    عدد المساهمات: 213

    رد: اشعار محمد طه القدال

    مُساهمة  ابراهيم الصغير في الإثنين يوليو 19, 2010 6:46 am

    بنترجاك

    بنترجاك بنترجاك
    بالسلوكة بالدلوكة
    بالدوباى
    تقوم يا بيتنا
    بيت الطين
    حملة يوم
    شراية يوم
    لتيبة يوم

    لبنايــتاً تخضر
    في مسورنا الجاي


    سماهر
    عضو مشارك
    عضو مشارك

    عدد المساهمات: 152

    رد: اشعار محمد طه القدال

    مُساهمة  سماهر في الإثنين يوليو 19, 2010 6:47 am

    فرحه


    نقرش صوتك همس البحة
    عشرق للعاش ريدك فرحة
    فـات الـشوق رف ورحّ
    عـلشان يسرق منك لمحة
    وريــــدك صـــحّ
    جـرحي الـكامن لمن وحّ
    رشح الفاطر بسمات سمحة
    نرجس منظوم شبه السبحة
    ونــام بــي صـفحة
    ورد الآسـل زايـد نفحة
    مكتوب أكتب عنك وامحى
    وعن حزنك ما اظن أتنحى
    أبـدع ربي فيك يا دوحة
    يا معجزة في أبيات مدحة.

    سماهر
    عضو مشارك
    عضو مشارك

    عدد المساهمات: 152

    رد: اشعار محمد طه القدال

    مُساهمة  سماهر في الإثنين يوليو 19, 2010 6:49 am

    اصطفيتك

    إصـطفيتك أغـلى سـيرة
    ولما جيت أرتاح تحت لونك
    لـقيتك شاربة مني وشاردة
    فــي جــواي مـسيرة
    **
    وأرتـجيتك بـين مسامعك
    طـرفك الـقرب مـلامحك
    والـمكان ضـل الـضفيرة
    وأرتـجيتك قـول يـشيل
    سـاسوية الـكلمة الاسيرة
    **
    وارتـجيتك فـي وقـوفنا
    مـتـين سـحاباتك تـجينا
    تـروي شوق بذرة حروفنا
    تـرقص الـوردة وتـفرهد
    تـهدي لـلأنسام عـبيرها

    علياء
    نائب المدير العام
    نائب المدير العام

    عدد المساهمات: 152

    رد: اشعار محمد طه القدال

    مُساهمة  علياء في الإثنين يوليو 19, 2010 6:51 am

    صعاب السكة

    بـتحمل صعاب السكة شان اصلك
    وبتحمل عشان عارف جذور اصلك
    مــا بـشكي الـوجع لـي زول
    بـعـد حــد الـصـبر يـفتر
    أسـيـبك لا ..لا مــا مـعقول
    عــهـودك ديــمـة بـتـذكر
    تـزيـد الالـفـة بـينا تـطول
    نــلـم أشـواقـنـا نـتـصبر
    بـالـحـنية نــروي شـتـول
    بـتـكبر كــل يــوم اكـتـر
    ظـروفـنا الـقاسية مـا بـتدوم
    مـصـيـر الـدنـيـا تـتـغير
    نـبـوح بــي سـرنا الـمكتوم
    شــمـوع آمـالـنـا تـتـنور
    تـغـرق فــي صـفاكي تـدور
    يـفـوح هـمس الـنسيم يـنشر
    ومـــا بـنـعاتب الـمـقدور
    لــو كـتـب الـزمن سـطّر.

    ابراهيم الصغير
    مدير عام
    مدير عام

    عدد المساهمات: 213

    رد: اشعار محمد طه القدال

    مُساهمة  ابراهيم الصغير في الإثنين يوليو 19, 2010 6:53 am

    افتكرتك

    افتكرتك فكرة في الذاكرة ودخرتك لي باكر
    وانـتـظرتك فــي مـساحات الـتذاكر
    فـــي حـنـين اشــواق مـهـاجر
    ولــمـا أبــقـى مـعـاك بـسـافر
    فـــي نـفـس هـمـس الـخـواطر
    ***
    إفـتـكرتك جــوه فــي الـوجـدان
    وجــدتــك ومــــا نــكـرتـك
    طـالـعـة مــن حــس الـحـناجر
    إكــتـشـفـتـك وارتــشـفـتـك
    مــن عـصـب عـمـق الـمشاعر.

    سماهر
    عضو مشارك
    عضو مشارك

    عدد المساهمات: 152

    رد: اشعار محمد طه القدال

    مُساهمة  سماهر في الإثنين يوليو 19, 2010 6:55 am

    سمحة وسمرية

    سمحة وسمرية
    محبوبتى ولفتاتا غزالة
    خضرة ومسقية
    وجنب النيل مشتولة النالة
    بهواك يا بنيـّـة كتبتو قصيد
    وبقولو مقالة
    بتفتحى فيـّـا معانى غناى
    تديلا مجالا
    *****
    زهرة وبرية
    بشوق الأرض عيونا كُحالة
    تريانة ندية
    بعرق الناس
    والناس فى بالا
    يا خوفا علىّ عقل وثبات
    ماها الولوالة
    *****
    من فرحى البيا
    قلعت الخوف وكستنى بسالة
    قت ليها النية متين نتلم
    والحال بطالة
    قالت لى غنية وإنت معاى
    مستورة الحالة
    بت سودانية
    محبوبتى ولفتاتا غزالة



    نورالدين
    مشرف
    مشرف

    عدد المساهمات: 261
    العمر: 41
    الموقع: مروى

    رد: اشعار محمد طه القدال

    مُساهمة  نورالدين في الإثنين يوليو 19, 2010 6:57 am

    إفـتـكرتك جــوه فــي الـوجـدان
    وجــدتــك ومــــا نــكـرتـك
    طـالـعـة مــن حــس الـحـناجر
    إكــتـشـفـتـك وارتــشـفـتـك
    مــن عـصـب عـمـق الـمشاعر



    كلام جميل جدانحن نتابع ونطمع فى المزيد

      الوقت/التاريخ الآن هو الأربعاء أبريل 23, 2014 10:08 am