نفاج



انضم إلى المنتدى ، فالأمر سريع وسهل

نفاج

نفاج

هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
نفاج

مساحة للوصل ونفاج نفتحه..بيننا جميعا وعبره..نحكي.. نتواصل..نتعارف..نتآلف..لنكون معا..نهر الحياة الخالد

دخول

لقد نسيت كلمة السر

المواضيع الأخيرة

» ابدأ دخولك بالصلاة علي النبي (صلي الله عليه وسلم)
من روائع خالد شقورى  Emptyالثلاثاء مايو 22, 2018 4:35 pm من طرف ابراهيم الصغير

» أفضل وأسهل وأكثر أنواع التجارة ربحية على الإطلاق أمان 100%
من روائع خالد شقورى  Emptyالإثنين فبراير 02, 2015 6:27 am من طرف الأميرلاي

» بستـــأذنك...
من روائع خالد شقورى  Emptyالخميس يوليو 03, 2014 8:08 pm من طرف الشاعر السماني حسن

» عاش من شافك
من روائع خالد شقورى  Emptyالثلاثاء يونيو 17, 2014 3:16 pm من طرف hamadvip

»  كيف يفكر الرجل ؟؟ وكيف تفكر المرأه ؟؟
من روائع خالد شقورى  Emptyالإثنين يونيو 16, 2014 1:00 pm من طرف hamadvip

» قصيدة جديدة ........ دنيا
من روائع خالد شقورى  Emptyالإثنين يونيو 16, 2014 12:53 pm من طرف hamadvip

» طيارة جات بي فوق .......... قصيدة جديده لهاشم صديق .. حفظه الله
من روائع خالد شقورى  Emptyالإثنين يونيو 16, 2014 12:49 pm من طرف hamadvip

» عشة أم حجل - هاشم صديق
من روائع خالد شقورى  Emptyالإثنين يونيو 16, 2014 12:47 pm من طرف hamadvip

» هاشم صديق - ما جاب المطر بنزين
من روائع خالد شقورى  Emptyالثلاثاء يونيو 10, 2014 5:41 am من طرف عثمان تباكي


4 مشترك

    من روائع خالد شقورى

    نورالدين
    نورالدين
    مشرف
    مشرف


    عدد المساهمات : 261
    العمر : 51
    الموقع : مروى

    من روائع خالد شقورى  Empty من روائع خالد شقورى

    مُساهمة  نورالدين الأربعاء أغسطس 04, 2010 6:09 am

    نزل غيم الوداد صبا
    غمر وديان غناي عبا
    سرى الفرح الحنين تبا
    حضر وفد الولف سايق بشاشات المطر لبا
    ***
    تعال يا العمرو ما غبا
    تعال أنا وأنت في عينيك من عينيك نتخبا
    تعال أشواقي ما قدرت تقاوم نسمك الهبا
    كان جيتك تكون أروع زمن دابو الحرف تبا
    زاهية الدنيا بالأفراح ولسة أساي ما تبا
    وكنت دخرتلك غنوات عشان أحلامنا تتربا
    كفاك طول الأمـل يا ليـل
    أخير تديني باقي الحيــل
    قبل يجرف هواي السـيل
    وألم في العمــرو ما غبــا
    معاك ببني المشاعر بيت
    معاك بحلف بقـول غنيت
    ولا بندم وأقول يــــاريت
    ولا بالجــــــــاي بتنبـــــا
    ***
    نزل غيم الوداد صبا
    غمر وديان غناي عبا
    سرى الفرح الحنين تبا
    حضر وفد الولف سايق بشاشات المطر لبا
    ***
    وكان حبل العمر ساكن
    بسيمة زولة تتحبا[b]
    نورالدين
    نورالدين
    مشرف
    مشرف


    عدد المساهمات : 261
    العمر : 51
    الموقع : مروى

    من روائع خالد شقورى  Empty رد: من روائع خالد شقورى

    مُساهمة  نورالدين الأربعاء أغسطس 04, 2010 10:35 pm

    صابريه

    طفت اطراف الفيافي
    شلت صبحي وليلي حافي
    مانسيت ارد القوافي
    زي طعم صبريه مافي
    زي عشم صبريه مافي
    زي نغم صبريه مافي
    شافعي من عربان بلدنا منها وفيها الوداعه
    شتله في قيزان بلدنا قايمي بايده وضراعه
    القديم اللافه طرقي زاهي في روعة طباعه
    البسيمات في وجيها الباهي من زمن الرضاعه
    فاقعي زي شمس العصاري في العمر باقي له ساعه
    في القليب الشايله صافي زي صفا صبريه مافي
    في الهجير راحت تدقق في النهارالحار تورق
    للهدوم بالليل تلتق ....
    في الجرف زارعه له حوض راجي قبل الحين يبتق
    والبسالمه من بلدنا هي تقولو انشالله عافي
    زي كلام صبريه مافي وزي سلام صبريه مافي
    في كريقة خاله احمد شايله ليله وايده تنبح
    شوكي لاقته في دريبه لما كان بالمعز تسرح
    نامت المسكيني تقنت والفوينيس زادو روح
    باقي تمتمه في خشيمه تسال الله المسره تنجح
    ماله مال المسره الا شان حبيب روحه يفرح
    دي البنيه الريده وافي زي غرام صبريه مافي
    زي شعور صبريه مافي زي غرام صبريه مافي
    رادت الناس السمر رادت الصفا والعكر
    رادت الموج الهدر ..........
    ردات الحله وبيوته
    في عيون صبريه طلت ريدة الخلا للبحر
    نافري من قيلة الكرارق وخايفي من قولة السفر
    والرحيل السرو خافي في قلب صبريه مافي
    في زمن صبريه مافي وفي خيال صبريه مافي
    والنهايه المن فصول سيرة البنيه
    لما عادت للبيوت الكانو قبل المغربيه
    مالقت غير الزوامل شايله احلام الصبيه
    شايلي عيدان الكرراق في الصباحات والعشيه
    ضاربي بطن الوادي زفه لمت الناس والسعيه
    والمطيره الضاربي قبلي لاقت الدمعه العصيه
    والرحيل عز البوداي الرحيل وجع البنيه
    زي رحيل صبريه مافي ِ
    زي سفر صبريه مافي
    زي حلم صبريه مافي
    نورالدين
    نورالدين
    مشرف
    مشرف


    عدد المساهمات : 261
    العمر : 51
    الموقع : مروى

    من روائع خالد شقورى  Empty رد: من روائع خالد شقورى

    مُساهمة  نورالدين الأربعاء أغسطس 04, 2010 10:36 pm

    حواء

    ضمه جسم الليل عويله وضمت الاهات زليله
    حوا ياناس ياحليله وثاني ياناس ياحليله
    ماسكي كف الثوب تخيط والدموع تنزل هميله
    كان متاكي الباب وخايفي من ابوها يشوف حويله
    مالعليهو هو ماهو هين كيف تعل روحو العليله
    كان يقول لها حوا مالك والعذاب كيفن مشى لك
    حوا لا تزيدي العليكي فوق كتيفي انا شايلو فالك
    حوا ماهميني حالي الا بس هاميني حالك
    حو ا حوا باقي نصبر ونحبس العبر الثقيله
    حوا برد الدنيا اكبر والله اكبر من عغتاها
    كان بامكانه تسرق بس ضمير الخير حماها
    زاد ازاها وزاد شقاها لمه ابوها الراجيه ودع
    وروحو دقت بوغ رحيله
    حوا قالت داير تاكل لو لقت لها لقمه نيه
    قالوا ليها ان دايري تاكلي اكلي في خاطرك شويه
    اضحكيلم وابسميلم تلقي بدل القمه ميه
    حوا قالت دايره تغمر لو حلم بالفرحه طافه
    قالو ليها الدايري تغمر الا في صدر السخافه
    بينا وبين عيشة المعزه ماخلاص بعدت مسافه
    حتى قدر الموت اباها مش حرام الموت ياعافا
    سوت الشاي للعطالي ماجنت غير الرزاله
    حامت الحلات تغسل شالو ناس الحله حاله
    مدت الايد للعمايه ختو في ايدينه لالا
    قنبت في ضل مصغر سارحة تلتق في نعالة
    في ضجيج عجلات زمانه مانست صرخة جماله
    حوا ماتت لمه ماتت امها وكانت طفيله
    ماتت لمه ابوها روحو دقت بوغ رحيله
    وماتت الف مره لمه سلبوها الفضيله
    نورالدين
    نورالدين
    مشرف
    مشرف


    عدد المساهمات : 261
    العمر : 51
    الموقع : مروى

    من روائع خالد شقورى  Empty رد: من روائع خالد شقورى

    مُساهمة  نورالدين الأربعاء أغسطس 04, 2010 10:38 pm

    الرسالة

    وقفت بعد حلبت لبينة الشاي تكورك يا الحسن
    يا ام الحسن وينو الحسن
    لمن صفت رغوة شخيبات اللبن
    في حلتا المبني من طبق السكن
    واقفي في حوش البهايم ولسع تكورك يا الحسن
    جاها حسا من بعيد مارق من القاطوع ورا
    قال ليها خير يا الحاجي خير
    قالتلو خير تعال لي جاي دايراك تعنون لي جواب
    يا الراسي لي ولدي الخدير
    لا تبقي زي شافع السرير يقول لي زين آيمة زين
    وزين تبقي بعد شهير
    وان جاني يكتب فد سطير
    اقولو يا سجم السجم انا زي قرايتك ما قريت
    لكن عويناتي بيفرزن الوريقة البيضاء من لون القلم
    بعد المغيرب بي شوي جاها الحسن تعبان يسير
    دا العشى غنمو من الدرب سرقت ندي وشو الهجير
    سوتلو شايا بي لبن قرض معاهو حرف فطير
    قالتلو بسم الله قول واكتب وصيتي انا للخدير
    الزمن يا ولدي ماحقاهو السنين
    البعيش في الدنيا ما بعيش مرتين
    العمير فاضلي بس منو اليقين
    وانت طول في البنادر يا الحبيب لا متين
    تعال اوريك حق ابوك الجم حقيق حاج اللمين
    ان عرفتو بلا عمار يقولو ولدا عندو طين
    العلاج لا تنسي رسلو لي دحين
    العوينات آجناي شوفن ضنين
    سلامنا ليك مطرز للبنيات والبنين
    ولو الارض يا ولدي تنشال في الايدين
    انا كت برسلا ليكا في لوري الخزين .
    نورالدين
    نورالدين
    مشرف
    مشرف


    عدد المساهمات : 261
    العمر : 51
    الموقع : مروى

    من روائع خالد شقورى  Empty رد: من روائع خالد شقورى

    مُساهمة  نورالدين الأربعاء أغسطس 04, 2010 10:40 pm

    المواجع


    لما نبكى من المواجع قلنا نرتاح فى بكانا
    قولى كيف نرتاح ونحن نبكى من شدة هوانا
    الليلة رحلة الأشواق بعيدة والشواطئ بعيد مكانه
    حتى فى بر الأمانى السنين هدت قوانا
    كنا نحلم بمداين فيها نرتاح من شقانا
    قولى كيف نرتاح ونحن نبكي من شدة هوانا
    القدر طاوع قلوبنا وخلى بحر الريد حدانا
    ونحن ماصدقنا قمنا نشرب فوق روانا
    دى المشاعر فينا فاضت غرقت فرحة صبانا
    ما النعم مرات بتشقى والله بالريد إبتلانا
    مرة طلت دارنا غيمة ونحن ياما الريد غشانا
    شايلة فى الخاطر محنة جات تعيش الريد معانا
    جات تصب فى الريدة ريدة لو قليل يبرد جوانا
    كيف يا غيمة نرتاح ونحن غلبنا فى هوانا
    ما غريبة على البريدو يلقوا فى الريده المهانة
    ياما كتير أحبه غرقوا فى بحور الذل عشانا
    فى الحقيقة الريدة مره ضقنا مرها فى غنانا
    ماهو قيس بكى من هواهو مانحن برضوا الريد أذانا
    يا زمن لو تصفى نصفى فى البوادى يعم صفانا
    والعيون تصبح مرافئ فيها نرتاح من عنانا
    رحلة الهم بينا طالت ملت التسيار خطانا
    نعمل آيه ما نحن غلبنا فى هوانا .
    نورالدين
    نورالدين
    مشرف
    مشرف


    عدد المساهمات : 261
    العمر : 51
    الموقع : مروى

    من روائع خالد شقورى  Empty رد: من روائع خالد شقورى

    مُساهمة  نورالدين الأربعاء أغسطس 04, 2010 10:41 pm

    جسور الدمعة


    انكسرت جسور الدمعه واندلقت منابع احزانـــه
    الله لقلوب مكلومه يوم خبر السواد الجانـــــا
    ادمنت العيون الدمعه متوالى الجفون مليانــــه
    اغرقت الخدود بى سيله طبعت فى الوجوه اشجانـه
    الله من مرارة الفرقه وآه أنا من جحيم احزانـــه
    سدت فى الحلوق العبرة لامن بالنويح شرقانـــه
    القدر اللعين فاجعنا لفح الفرحه مــــــن تالانا
    خلى صبرنا عاضى الجمرة تأكل فى الهشيم جـوانا
    الحزن الدخل اعماقنا باقى الى الازل فى حشــانا
    لا نوحنا وبكانا يزيلو لابتغسل دموعوا اســــانا
    تقودنا خطانا نحو اجلنا مو معروف محل مرســانا
    يبرانا الممات وين نمشى شقيش ما نسوقه خطــانا
    الدنيا العبوس ملعونه اوعك من تنوم فى امانــــه
    ترميلك ضليل خداعه ضامرى وراء مقيلو خيانــه
    تتفتح زهور فى روضه تجزب للفراش بالونـــه
    من قبل الثمار تتحت قبال ما تجف اغصانــــه
    أه أنا من نضارة ورده حين طل المحل بستانـــه
    ما إتمهلت تفوح طيبه تبرز للزمان الوانـــــه
    وأه أنا من سكيل الوالده وكتين ترسى اعز بطانـه
    تفتش فى الخلق كايسالو بيناتن بلا الضهبانــــه
    نورالدين
    نورالدين
    مشرف
    مشرف


    عدد المساهمات : 261
    العمر : 51
    الموقع : مروى

    من روائع خالد شقورى  Empty رد: من روائع خالد شقورى

    مُساهمة  نورالدين الأربعاء أغسطس 04, 2010 10:43 pm

    غلطان انا


    عاشق عيونك كم سنه معليش خلاص غلطان أنا
    مشيت على دربك سنين افرش دريبك بالمنى
    سرحت فى واديك زمن ناس الهموم ناس الضنى
    كتبت فيك احلى الكلام نظمتا فيك اجمل غنا
    خليت يمين كل البلاد واخترتا دنياك احضنا
    معليش خلاص غلطان أنا وكل الحصل بتحملو
    انا لى زمن متمنى يوم آخر المطاف بس اوصلو
    ويقولو لى مبروك عليك ونبدأ الفرح من أولو
    نضحك كتير جنب الصحاب فى يوم سعيد ما اجملو
    معليش خلاص غلطان أنا غلطان عشان بغلط كتير
    غلطان عشان قايلك هنا إمكن معاى تبدى المسير
    غلطان عشان من النسيم لو مس لى جسمك اغير
    غلطان عشان من دون جراح فى دنيتك داير اطير
    ماكان زمان بتقولى لى غيرك محال اعشق حبيب
    مهما قست كل الظروف أنا ليك ما ممكن اسيب
    آيه الجديد فى حبنا آيه الحصل آيه الغريب
    لو ما الزمان غير هواك ولقيتى لى جرحك طبيب
    قولى زى ما الناس تقول انو الزواج قسمه ونصيب
    معليش خلاص غلطان أنا ومن قلبى ليك كل المنى
    تتهنى بى فرح العمر ويذدان قليبك بالمنى
    ياهو القدر وانا راضى حتى لو انكتب لى الضنى
    تتهنى انت مع النصيب وانا ليك بنظم فى الغنا
    اصلوا الحصل ما منك انتى بس صحيح غلطان أنا
    سماهر
    سماهر
    عضو مشارك
    عضو مشارك


    عدد المساهمات : 152

    من روائع خالد شقورى  Empty رد: من روائع خالد شقورى

    مُساهمة  سماهر الجمعة أغسطس 06, 2010 12:46 am

    شكرا نور الدين
    خالد شقوري هو احد اجمل شعراء شمالنا الحبيب
    اقرأ له كثيرا واسمع لقصائده المغناة
    تقبل المرور
    سماهر
    سماهر
    عضو مشارك
    عضو مشارك


    عدد المساهمات : 152

    من روائع خالد شقورى  Empty رد: من روائع خالد شقورى

    مُساهمة  سماهر الجمعة أغسطس 06, 2010 12:47 am

    يلا نسافر فوق الكلمة

    يـلا نسافـر فـوق الكلمـة نشيـل الـزاد احـلام ورديـة
    نحكي حكاية الزول القيمة الـزول العـاش للخاطـر الحيـة
    عاهـد نفسـو ببـذل الـروح علـم كيـف العـزة تكـون
    شال امالو كتاب مفتوح مشروح وتروح مـن بينـو قضيـة
    كان مكتوب في اول صفحة وطن مـزروع حنيـه وقمحـة
    ومدن مصقولة عوالم سمحة وناس بتعرف الناس من لمحـة
    كان مكتوب في الصفحة التانية طفلة تقالـد الغيمـة الحانيـة
    ونخلة بتهدي قطوف الدانيـة وهـاك البلـد الغالـي هديـة
    اغنية فيهـا تلاتـة مقاطـع مقطـع شـال لـون الدوبيـت
    ومقطع شال نفس الجـراري ومقطـع طالـع مـن قمريـة
    كان مكتوب في الصفحة الرابعة طالب بيقراء وعيونو متابعه
    خريطة البلد العالـي الغالـي ومويـة النيـل المنهـا نابعـة
    وعز موصول للصفحة الرابعة وشوق موصول للصفحة المية
    يـلا نسافـر فـوق الكلمـة نشيـل الـزاد احـلام ورديـة
    ونحكي حكاية الزول القيمة الزول العـاش للخاطـر الحيـه
    سماهر
    سماهر
    عضو مشارك
    عضو مشارك


    عدد المساهمات : 152

    من روائع خالد شقورى  Empty رد: من روائع خالد شقورى

    مُساهمة  سماهر الجمعة أغسطس 06, 2010 12:49 am

    مسافة السكة

    كنت بقصِر المشوار لو عارف متين أرجع
    كنت بحدد الميعاد وأبقى من الزمن أسرع
    إلا مصيري في الأيام هي البتقول وأنا البسمع
    وما لاقاني يوم في الدنيا زولاً حظو كان فاتو
    ***
    مسافة السكة وأرجع ليك معايا الشوق وغُنواتو
    أنا البهواك وقلبي عليك وأنا الزول البِحب زاتو
    ***
    مسافة السكة مهما تطول برضي مصيري أرجع ليك
    ألم حزن السنين الفات وأقيِّل في ظلال عينيك
    ألمِّع بالحروف دنياي وأخاف أحزاني ترسى عليك
    ألِم باقي العُمر تحنان وأقول للناس حِكاياتو
    ***
    ما يهِمك كلام الناس وحاتك إنتي ما ناسي
    أنا البحسِب عشان ألقاك ثواني الفرقة وأنفاسي
    وعارف لوعتك يا روح كيفن إنتي بتقاسي
    وأعمل إيه مع الأيام مع قلبي وصباباتو
    ***
    مراسيك وين عشان أرتاح وأعِوض قلبي عن صبرو
    معاك بحصِد من الأفراح حصاد زولاً زرع عُمرو
    أنا الراجيك ولي جِراح مُناي بي إلفتك يبرو
    والآقيك في زمن نشوان تصُب للحب غماماتو
    سماهر
    سماهر
    عضو مشارك
    عضو مشارك


    عدد المساهمات : 152

    من روائع خالد شقورى  Empty رد: من روائع خالد شقورى

    مُساهمة  سماهر الجمعة أغسطس 06, 2010 12:52 am

    الزول الوفي

    لماالحروف تمرق تفتش قبلة الزول الوفي
    لما العيون تصدق تبين قوة احساسناالخفي
    حتى الاسف يهدي الكلام للبسمة والهم يختفي

    ما غاب نجمنا الا يوم غابت اغاني الكادحين
    وما مات فرحنا الا يوم جفا الوفا الساقي الحنين
    نحناالبقينا بلا عمر،، ورمينا همنا في السنين
    اصبح عشمنا حزم غنى ترمينا في الشاطي الأمين

    لما الحروف تنبض وجع وتنزف علي الصفحات اسف
    ولما العيون تبدا الطمع وما ترمي الا على الهدف
    حتى الشمس يمكن تضن وتمنع ضياها عن الصَدف

    الدنيا أيه غير امنيات منسابة في مجرى العبير
    وغير زفة من الاغنيات ممزوجة بي فرح الصغير
    وما دام صحيح انو المصايب حددت سير المصير
    كيف يحزن الزول البشوف وكيف يضحك الزول الضرير

    لما الحروف تتحدى حزن الليل تشيلو من الصباح
    ولما العيون تتمنى خير النيل يعم كل البطاح
    ما بنلقى في جوف الزمن الا الغنى الصافي المباح

    شوفو الكنار ما لاقي عيش لكنو غردوانتشى
    لمن لمح خيط الندى في صفحة الازهار مشى
    ليه ما نكون زي الطيور الفيها حب الغير نشا
    وليه ما نكون زي النسيم نهدي الزمان الوشوشة

    لما الحروف تصبح رياح وتوزع الشوق في الضفاف
    ولما العيون تمطر سماح في عزة الارض الجفاف
    حتى الزمن يزهر وفا وتلبس غنيواتنا الزفاف

    مليون عشم في الانتظار يتقلى في حر القلب
    ومليون قمر حافّي الطريق يهدينا لو الشوق ضِهب
    كل العيون تهتف تقول لازم نفي ولازم نحب
    ما الطيبة يا الناس الحنان راجانا في آخرالدرب

    لما الحروف تصبح عيون وناسة في جلسة هنا
    ولما العيون تصبح حروف افراحا فينا ومننا
    يادوب بنعرف كيف نكون ونعرف كمان معنى الغنى
    ابراهيم الصغير
    ابراهيم الصغير
    مدير عام
    مدير عام


    عدد المساهمات : 214

    من روائع خالد شقورى  Empty رد: من روائع خالد شقورى

    مُساهمة  ابراهيم الصغير الجمعة أغسطس 06, 2010 12:55 am

    نور الدين ..
    سماهر ..
    التحية لكما وانتما تتحفانا بقصائد الشاعر الرقم خالد عباس شقوري
    وفي انتظار المزيد من اشعاره
    لكما الود
    ابراهيم الصغير
    ابراهيم الصغير
    مدير عام
    مدير عام


    عدد المساهمات : 214

    من روائع خالد شقورى  Empty رد: من روائع خالد شقورى

    مُساهمة  ابراهيم الصغير الجمعة أغسطس 06, 2010 12:56 am

    امي البتصحي مع الفجر


    أمي البتصحى مع الفجر..
    وتندلى لا طرف الجرف..
    وتجينا لا عند الضُهر..
    تفرش بشنتيقا وتجُر..
    نماً تمسربو الصبر..
    وقداما لوبايات خُدر..
    تقعد قصادن للعصر..
    ولا حيلا كب تنهض تقوم..
    وبلا كسل توقد الجمر..
    وتجيب حليلتا دي الزماان..
    كانت تشد فوقا النزُر..
    وتكرد قعيرا من المكرتب فيها عاد من كم تشر..
    وترمي البليلة وتزردا..
    بي المي تب لامن تخر..
    وترميلا بصلاتا قلاد الحلة من تقلن تتُر..

    وساساقا لا عند العشا ولامن يأذن بابكُر..
    وكتين خلاص تبقى استوت..
    ترميلا فيها هوين تمر..
    وتملا الصحين للحاج أبوي..
    دايماً تقسم بالكُبر..
    وتنده علي بت الخزين..
    الحاجة أمنا أم نصر..
    وتملا الكويرية وتخب لي ود علي الحامي العزر..
    ونحنا البطان..
    تملالنا عاد قدحاً يمين ما شاف فقر..
    توقدلنا اللمبة ام ضنيب..
    وترميلنا تاني هوين تمر..
    وبلا وصية نغرفو تب..
    ونجغم الميهية ضُر..
    يغلبنا ما نقدر نقوم نافخين بطيناتنا السمر..

    فوقا السيايل والغبار تنجارى من حد السدُر..
    كاتل عويناتنا النعاس..
    نصل العناقريب بالجبر..
    وامي البتصحى مع الفجر..
    تلقاها لا عند الفجر..
    تنده علي سابل الستر..
    زيد الاجر..
    زيد الاجر..
    زيد الاجر



    عدل سابقا من قبل ابراهيم الصغير في الجمعة أغسطس 06, 2010 12:59 am عدل 1 مرات
    ابراهيم الصغير
    ابراهيم الصغير
    مدير عام
    مدير عام


    عدد المساهمات : 214

    من روائع خالد شقورى  Empty رد: من روائع خالد شقورى

    مُساهمة  ابراهيم الصغير الجمعة أغسطس 06, 2010 12:58 am

    بلد الغبش


    يا راحلى لبلد الغش شيلينى فى خاطرك نغيم كان القى لى هناك عش
    وارجع معاك انا ياطيور .. خلف الزمن كمين سنة
    اتمد فى امل الوصال .. وارحل معاك سرب المنى
    وانزل هناك انا فوق تقى ..واطاطه يابسى مشققه
    كانت مسقية بالغنا وليك ياطيور كانت وطن كانت رخا وخيرادن
    ***
    اطرا البلد وناس البلد ..ليل البلد وصبح البلد
    لو عارفى يا الفاردى الجناح انا بي شوق ماليه حد
    للنيمى والضل الرهيف .. والنسمة والسعن والبرد
    لى لوبى فى صدر الجروف .. والنيل من الحيضان شرد
    ***
    لى ابوى فوق برش الصلاة .. فرش طرف توبه ورقد
    لى مرقة القيت العصير .. قاصد سبيل الخير قصد
    لى لحظة من عمر الزمان لا حسرة لا هم لا حرد
    ***
    آهـ يا طيور واشوقى انا .. انا ياطيور مشتاق كتير
    ما لى جناح متلك انا .. لو لى جناح انا كت بطير
    وانزل قصاد بير الفريق .. لى شوفت الواردات عصير
    وامسك دلو الرايقى واجر .. واملالها وابراهن غفير
    لامن خلاص هن يوصلن .. وانا تانى اواصل للمسير
    ***
    اوصل هناك حد الترب .. واقعد قصاد جدى الكبير
    اضحك من الشبه الشديد .. بين حظى والليل والمصير
    واذكر الزمن البعيد .. وكتيت ابوى الحاج سعيد
    يقلعلو فى انتاى كانت .. قايمالها فى حوضا جديد
    ***
    وانا ذكرة الناس العزاز تلقانى فى نومة الدغش آهـ يا طيور آه

    ابراهيم الصغير
    ابراهيم الصغير
    مدير عام
    مدير عام


    عدد المساهمات : 214

    من روائع خالد شقورى  Empty رد: من روائع خالد شقورى

    مُساهمة  ابراهيم الصغير الجمعة أغسطس 06, 2010 1:00 am

    لا تنجع

    يا الشايل شمسك في جواك خليها تبين للناس تطلع
    يا النازع فرحة والدة هناك غير حس آهاتك ما بتسمع
    ***
    يا الناسي اللبقة المفتوحة دي بلاك طوريتك ما بتقرع
    المنجل في راس التمرة ناسيهو وامك ما بتطلع
    الكتقة وقعت والحملان في اللوبي بقت تجري وترتع
    والزير الفي بيت الضيفان حرمان لا نزّ ولا نقع
    ***
    يا السبت عقابك وروحت وحيات عز بلدك لا تنجع
    الشتلة تقولك لاتنجع الواطة تقولك لا تنجع
    الحوض الما رفعت سرابو ينادي يقولك لا تنجع
    الحبل الما تميت وسيرو يهاتي يقولك لا تنجع
    والنيل الفي واطاتنا ترع بيقولك ازرع ولا تنجع
    ***
    ماك فاكر يوم داير ترحل وابوك الحاج شايلو عصا
    لا حيلو وقف طقش الابريق اندفق سال فوق المصلاة
    قام بارى الحيطة واتوكل ويقوم فد مرة ومية يقع
    ويقولك يا المبروك ارجع
    ***
    ارجع ارجع يا زول ارجع غير ارضك عاد ما بتلقى بطاح
    شن داير في بلدا والناس ما فيهن حاس وما فيها صباح
    الليل الويل مليان اتراح الويل الليل مليان اتراح
    بياع بيقول افراح افراح زي البيقول تفاح تفاح
    ***
    مجلوبة الفرحة ومفروشة من ضحك الناس دايرين ارباح
    لو كان في ايدن ملك الكون كان لمّو عبير الزهر الفاح
    كان علمو نفس الزول العاش في سدر الليل داير يرتاح
    كان حجزوا الغيم في واطاتو وكان آمسكين باعو الارواح
    ***
    وين تلقى الفرحة وتتهنى في دارا ضيقي ومافي براح
    جم ناسا من عين العطشان تخطف ومضات البرق اللاح
    ***
    سايب اهلك ونخلك راحل قول وين ماشي وين آ صاح
    الشمس النايري ابت تطلع النيل يا زول اصبح رحراح
    الضل قصر ما غتى رويس ولدا ساكب عرق الكتاح
    الواطة ابت تديك الخير ولا انت عليك ما هابي رياح
    ***
    قولي وين ماشي ووين غاشي ولي شن سايب بلد الصلاح
    النسمة ان جاتك بتجيك ملياني عبير عند الفياح
    الموية ان داير تلقاها نقاعا واطيب من الراح
    ان درت نغيم الموج تلقى وان درت كمان الطير صداح
    ***
    ارجع ارجع يا زول ارجع
    الضحكة هناك من جوة الجوف الفرحة هناك ما فيها الخوف
    الشقى ارحم في ضل النيم وبعيد من ناسا واقفة صفوف
    جم ناس حبان تلقى المكسور مشيول في كتاف واحد مكفوف
    الجن الاحمر فاقد الحيل في خلوة حاج الخير مكتوف
    دكان الشيخ فوق الواطة كيمان كيمان ما فيهو رفوف

    ابراهيم الصغير
    ابراهيم الصغير
    مدير عام
    مدير عام


    عدد المساهمات : 214

    من روائع خالد شقورى  Empty رد: من روائع خالد شقورى

    مُساهمة  ابراهيم الصغير الجمعة أغسطس 06, 2010 1:03 am

    نوم العافي

    إنت ياوافي الصفات ياصافي
    نوم العافي
    يالقمر المغطي الحلة بي ضيو وسمرنا قوافي
    يا لحني البديتو معاكي قبلو الدنيا كانت مافي
    ......
    نوم العافي لامن خيل همومي تعدي
    وتصحي عوافي تلقي الدنيا لسع تدي
    ما الزمن الجديد الجاي بي طل الأماني مندي
    والريح المعانده الموجه ما بتقدر تصد مجدافي
    ......
    نوم العافي يا سر الغنا الجواني
    يامعنى السماح والطيبة والنفس الدوام غنياني
    ماالأمل الملازم الإلفة لمن تسري في وألحاني
    والشوق المحدد دربو عازم إنو بكره يوافي
    ......
    إنتي لاقي المعنى قبال الغنيوة تلاقي
    وفجي النسمة وأنزلي بي طريف الساقي
    وأوعه تغيري لما تعرفي حتى القيفة من عشاقي
    لو ما الليلة بكرة بجيكي شايل حلمي فوق أكتافي
    ......
    صحي الماضي والشوق المعاك غنيتو
    وأحلم هاني بي إنك مناك لقيتو
    باكر تلقى يازاهي المعاك بديتو
    وألقاك في عيون الغنوة زي لحن الصباح الدافي

    ابراهيم الصغير
    ابراهيم الصغير
    مدير عام
    مدير عام


    عدد المساهمات : 214

    من روائع خالد شقورى  Empty رد: من روائع خالد شقورى

    مُساهمة  ابراهيم الصغير الجمعة أغسطس 06, 2010 1:04 am

    الحاجة مبروكة

    قصاد الساقية اتلمن.. كروقه.. وجريدة.. وشوكة..
    وشقاية عويد مشقوقة كانت بدري سلوكة..
    وباقى حرازى هيل الشيخ اظن سواها فلوكة
    طلحايات.. وعيدان منقة يابسى بقت على الدوكة..
    ولا حطب السدر في الساب تقول دقولو دلوكة ..
    وكتين تم راس واقود قصاد تمر آل على الروكة..
    عقدو الإجتماع الطارئ خصوص الحاجة مبروكة
    رئيسن عود طلح سالم محزق وبالروى إنتلت
    وقال.. بسم الله.. قول موزون فيه الحكمة إتجلت
    ليها شهر واظن أكتر علينا الرايقة ما طلت
    وما مرضاني كان مرضاني كان جات بتها انسلت
    وتب ما جانا صوت صايح يعنى هى حيى ما ولت
    وما ظنينا أم الخير من الواقود تكون ملت ...
    طيب مالا يالسامعين مالا الرايقة مااندلت
    .. نطت غادي كروقة قالت يبقى انشلت
    رد عليها ساق عشرة زعلان ضمة يتفلت
    قبيل ما قلنا كان قشراني كان جات بتها انسلت...
    جريدة مزهجا الأشميق معوبسي واصلو مااتبلت
    قالت يبقى جاها سفر وفي البلد الهناك حلت
    رد عليهاعود مشقوق كيفن للديار خلت
    وهي االكانت تصيدا الرجفة لوفات يوم وما اندلت..
    ولما خلاص غياب الحاجة حير شلة الواقود
    قالو نرسل الشوكة بينات شق كراع محمود
    اصلو نسيبا وود خالا بيغشاها ومصيرو يعود
    وباكر نعرف المستور...يلقى سؤالنا الف ردود ...
    مشت الشوكة وسط الشق أبدا مالقتلو حدود
    هي خايفا تصل لحيمو الحي وينو الحي مع محمود
    تربال ضمة مابتفرز كراعو وايدو جنب العود
    وصلو مع المغيرب داك وباتت وعرفت المستور
    وجات الشوكة صبح الليل ترجف زي جني مسحور
    مشققة لا حويل لا حال ولا عن راسا اظن مكسور
    مرقت روحا من الشق ورقدت فوق كويم الصور ..
    وقالت بي حسيس مبحوح... تعالو انا جيت ملاني خبور
    وتاني اتلم راس واقود نيم و هشاب حطب وحراز
    وبدت الشوكة تحكي الحال معبورة ودميعا رزاز..
    جاها من بلاد برة وليدا الكان زمان قفاز
    أكان شفتيهو يالكروقة املس ولابس الهزاز
    .. جاهم شايل الخلاطة والتلاجة والبوتجاز
    والبوتجاز أكان شفتي النويرا الفيه شمساً ضاربي جوة قزاز
    الشاي سوا رمشة عين خلا الحلة نوما خزاز
    حليلك يالجريد الكنت أسرع من قنيص الباز ..
    في ايدا الغويشة دهب فنت في الركن حجلا
    بقت تشرب لبن برا باعت بقرتا وعجلا
    كمان الحنا ليل ياليل تلمع في بطن رجلا
    رمت في الحوش صباح الخير وقامت قلعت فجلا

    وان كان لى تكيل الشبشى فى فد يوم هوانجير
    وحتى المرق الشايلو سنين في ماسورة السقف ااتحير
    خلاص الحاجة مبروكة حالا المايل اتغير
    بعد ما نار بقينا وسخ عليك ياالكوشة نندير
    واكان لي جرارى الموية صادا الصادنا يا الحبان
    من يوم جاتن التلاجة ما طقشنها الكيزان
    وحتى القربة بس كاويق مطوطوة راقدا في الديوان
    من شدة يباسا تقول مولعى تحتها النيران
    خلت سيرة العشا في الخلوة وقولة ياستار ياهادي
    وطول ليلا مقابلي التلفزيون ما اصلو مونسا مالا الرادي
    شافتلها شفع فطر وبطر قالت اريتو دا حال أولادي
    وما عارفاها القصة دعايه دعاية تخوذق الجاي والغادي
    مسكينا الحاجة الإتغشت في الجاه الجاها بلا جيهه
    الحال يعجب صح وحالاً زين لكين لي لي بتها مو ليها
    عميرا سرح فوق الخمسين ما كانت تنساك يا ماضيها
    ماكانت أصلاً تتنكر للنار الكانت تطفيها
    بي نفخه قويه ولا مواصة ولا تلم هبودا عليها
    وينا صلاتا مع الأذان سهر الليل ماأثر فيها
    وينو مشها للجيران كأنو زمان ماكانو ذويها
    وينو قعادا مع الحبان والجبنة التنت بكريها
    الا مصيرو الحال يتغير باكر بكرة جناها بفوت
    وغازا بيكمل وجازا بيكمل وحيلا بيكمل ونارا تموت
    وترجع ليك يادرب الساقية شايلى عذابا وشوقا تعود
    تقسم قشها تحقب نصو وترفع نصو مع محمود
    تنوم في راسا كداد المعزى وتصحى على السعن المقدود
    وتبقى حياتا حليلة ويكة وقربة موية وراس واقود
    وتبقى حياتا حليلة ويكى وقربة مويه وراس واقود

    ابراهيم الصغير
    ابراهيم الصغير
    مدير عام
    مدير عام


    عدد المساهمات : 214

    من روائع خالد شقورى  Empty رد: من روائع خالد شقورى

    مُساهمة  ابراهيم الصغير الجمعة أغسطس 06, 2010 1:05 am

    الشوق عذاب

    ما كنت قايل الشوق عذاب.ما كنت قايل الريده شوق
    ما كنت فاكر الدنيا عاد محصوره بين جفن العشوق

    لاكن بعد سفر السنين ... والرحله بين أشقى واتوق
    عـرفت جبل الشـوق ألم والريده في أعـلاهـو فــوق

    تلقاني في الليل البهيم ... دايما افتش في الشـروق
    ومن ما اشوف نور الصباح ارجع اكوس الليل اروق
    ما قالوا غير حريقا عاد النار تضوي تشع دروب
    شن شفت يا لهب الغرام فيك من زمان غير الحروق

    ليلا نهار زاكي الهموم في راسي عاد تسكت تحـوم
    ما حانة لي ريدي الندي وما فاكره لي قلبي الشفـوق
    قلبي الحزين أنجب هواك كيف من هواكي المر اضوق
    يمكن غرامك ما عرف .. وريهو ايه يعني العقوق

    في سكة الصفا والوئام حجر الظنون لي بيعوق
    والشك يدور في هواي من سجنوا غالبني المروق
    فاضل لي ايه انا غير اجن والليل يجن وبالجن افوق
    اتهادى في ارض الضياع وازرع لي من احزاني روق

    ابراهيم الصغير
    ابراهيم الصغير
    مدير عام
    مدير عام


    عدد المساهمات : 214

    من روائع خالد شقورى  Empty رد: من روائع خالد شقورى

    مُساهمة  ابراهيم الصغير الجمعة أغسطس 06, 2010 1:07 am

    الغيم مطر


    مادام رزازك لي .. راضيك تطل الكل
    ياوافي قوول للناس الغيم مطر ماضل
    ***
    طلك غشاني براي من نظرة خالي ستار
    وكل الصحاب حولي ماحسوا بالمشوار
    انا كنت بهديك نور بان للجميع خيط نار
    والبيننا كان ابلغ .. من نسمة صافت فـُل
    ***
    اللحظة كانت جد فوق مستوي الادراك
    ورغم المكان محضور بس كنت عندي براك
    كان الزمن واقف بين نظرتي ومحياك
    خايف يفوت وتفوت ومانلقي بيننا رسل
    ***
    ياصافي جيت من وين زي الحلم منساب
    وانا كنت فاكر البي .. ما خلا فيني رحاب
    ما صدقت عيني .. احيا واشوف احباب
    بس جيت وجيتك لي .. زي عزة بعد الذل
    ***
    لو مالقيت منك غير بس حروف تتقال
    يسعدني اني اكون وثقت للاجيال
    اجمل كلام في الكون الجاري في الامثال
    واجمل سفر ياروح لمن اكون رحال
    في زي عينيك بيناتا القي نـُزُل
    ابراهيم الصغير
    ابراهيم الصغير
    مدير عام
    مدير عام


    عدد المساهمات : 214

    من روائع خالد شقورى  Empty رد: من روائع خالد شقورى

    مُساهمة  ابراهيم الصغير الجمعة أغسطس 06, 2010 1:08 am

    يا بانه


    يابــانه مابتصلى الســحاب بالله لاتـتطاولى
    ايه الجنيتى بلا الخراب ليك كم سنين بتحاولى
    قبال يرضرضك الزمن مش كان أخيرلك تسألى
    وتعرفى سر قلبو الصبح من الندم صليان صلى
    يابانه غشاهو الأمان خدعو المقام المخملــــى
    ورغم الزمن وراكى وين لكنو قاسى تحصلى
    ماأصلو قبلك كان بريد نجمايه فى قــلب الســمــا
    يرجاها من عصرا بعيد فى تقنت الشوق النـمـا
    يشقى ويشق صدرو الاسف تبقى دنيا مغيمه
    وكان الفرح يملاهو يوم يلقى القمر غاب وأحتمه
    ماقصدو بس داير يشوف النجمه واضحه معالمه
    يابانه كان بالجد قنوع تكفيهو شوفت الملهمه
    من الظهور حتى الإفول عينيهو ما بينومــــــه
    كان من بعيد بيسالمه فرحان سعيد بيكالمــــه
    لكن محال ينتم حـال جه الشوق ملك قلبو وعمه
    وبدا الودار يومو القال النجمه لازم يوصلـــــــه
    يابانه لاتستغربى بالله بس شوفى الحــصــــل
    حضر كليمات الحنان زادو الغنى وشوقو الرحل
    وأول محاوله للوصول داير مع النسمات يصـل
    لكنو يركب فى البساط يلقى البساط مـنو اتمصل
    فكر وقال عند المساء يرجاها فوق راس الجبل
    وفى حلكة الليل الطويل يابانه لم الليل دخــــــل
    شاف النجيمه معلقه وشاف روحو فى توب الجهل
    براحه لملم أنتو فى ليلو واندرج نــــــزل
    الشى العــجيب رغــم الفـــــــــشــــــــــل
    لامله يوم لاحتى مـــــات فيهو الأمــــــل
    وآخر محاولة للوصول كانت رحيلو مع الشعاع
    إستنى فى الليل القمر ساب الأرض مقدار ضراع
    وإستنى قارب الهم رسى فى مشرع الشوق المطاع
    مسك الشعاع وبدا الطلوع بين الغيوم كان خبرو شاع
    جات غيمه من بلد الندم سايقاها عاصفه من الوداع
    قطعت خيوطو الماسكه واتهاوا فى لجج الضــيـــــاع
    وعشان بريد من قلبو جد لقالو فوق اللجه طـــــوف
    عيدانو من شجر الوفاء وحبالو من غالى الحروف
    وداهو لى ساحل الندم وراهو فى العشاق صـنوف
    قاليهو فكر ياقلب قاليهو عيد المـــاضى طـــــــــوف
    إتواره غاب طوف النجا خلاهو فى إيــد الظــــروف
    فتح عيونو مع المساء شاف النجم دانى القــطوف
    بكى وابتسم وعرف صحيح انو البعيش لابد يشوف
    لو كان صبر يابانه يوم وإتمده فى ضـل اليـقــــان
    لو كان رجى الأقدار تجى وخلى القياده على الزمان
    لو كان عرف انو البسير فوق الدرب يوصـل ضمان
    مكان شقى القلب الودود و يابانه ماكان اللكــــــان
    وصيتى ليك لمن يقوم غصنك جــديــــد إتــمهــــلى
    أوعك تكررى محنتك أوعك كمان تستعجـــــــلى
    بلاتروحى وتتعبى الغـــيث يجيــكى من العـــــلى
    ولو انتى مــديت الصـبر حتى النجــم تتناولــــى
    سماهر
    سماهر
    عضو مشارك
    عضو مشارك


    عدد المساهمات : 152

    من روائع خالد شقورى  Empty رد: من روائع خالد شقورى

    مُساهمة  سماهر الجمعة أغسطس 06, 2010 1:10 am

    بلداً لمت الطنبور

    بلداً لمَّت الطنبور . ود لقاي . موية النيل . حاج الماحي والقمحة
    كيفن ما بغنيها ... وكيفن ما بتكون سمحة
    النسمة التجيك مِندلي ... شاقي اللوبي حين تصلك
    تدلّي رِحالا جواكا ... وتقالدك إنت بين أهلك
    تنوم لامن براك تصحى
    الدرب البسوقك لا تحت عَلاَّك
    النخل البلا تطلع لو يندلى ويقول لك هاك
    الزول البتمشي عليهو .. يمشي عليكا ما بيرجاك
    والحن البيملا براحو ... مارق منو .. دارِك جاك
    نتقالد نحِن لبعضنا ... تبقى نفوسنا منشرحة
    الخضرة المقالدي النيل
    العز البسند الحيل
    الليل البعقبو صباحو ... أبداً ليلنا ما هو طويل
    والزرق اليدردر سيدو .. ياهو حلالو .. ينجمَّالو ليهو يشيل
    خيرك كلو بين إيديكا ... مو داير لو فد سرحة
    ابراهيم الصغير
    ابراهيم الصغير
    مدير عام
    مدير عام


    عدد المساهمات : 214

    من روائع خالد شقورى  Empty رد: من روائع خالد شقورى

    مُساهمة  ابراهيم الصغير الجمعة أغسطس 06, 2010 1:12 am

    حزم شوقي

    لميت حزم شوقي وهواي شديتا فوق ضهر الحلم
    لجمتو بي حبل الصبر باريت دريبك بالنجم
    سافرت فوق املي القبيل سويت غناك غتا وهدم
    عارف بلا القاك والم .. لا زاد يهم .. لا ضل يجم
    لا فرحة يابحر الوداد جوايا تقدر تترسم
    *****
    رحلة ضياع من كم سنة يا دابو بان فوقي التعب
    خطواتي شاخت في الرحيل والموية يبست في القرب
    شايل الرحل آهات وشوقو نغيم مسافر في العصب
    شان أوصلك مليون حجاب واميال ملفحة بالجدب
    كل المداين جيتا ليل والزاد اظن كملتو تب
    *****
    باريت دريبا يا مناي لا واحة لا غيم لازروع
    لا قادر اصبر اشان اصل لا قادر اتمنى الرجوع
    كل ما يبين دربا جديدا براهن القاهن فروع
    والقى المسافة البيني بين فرحة لقاك زادت وسوع
    والقاك انتي بعيدة جد يا العايشة في قلبي الولوع
    *****
    اسباب أساي انا في زمن خلت قماريهو الهديل
    كل المشاعر ممكنة الا الفرح بس ..مستحيل
    كل المرافي معنونة .. بس لي رباك مافيش دليل
    اتهنى كيف انا يا مناي في كون حزين طاويني ليل
    وبلاخجل شوفي الزمن خات حيلو في المافيهو حيل
    *****
    يا غنوة الزمن الرحل يا مسكن الشوق والمنى
    جاييك من آخر شقاي شان القى روحك واحضنا
    جاييك كايس لي دواي ياريت يكون غير الغنا
    وعاد لا متين ؟؟
    ليلي الغنا وصبحي الغنا وعمري الغنا
    ماكل شقاي ... شارب اساي ... لابس الضنا
    ليلي السراب ... سكني السحاب ...راحتي العنا
    وماسكات رسن ... حظي المحن .... منقاد أنا

    سماهر
    سماهر
    عضو مشارك
    عضو مشارك


    عدد المساهمات : 152

    من روائع خالد شقورى  Empty رد: من روائع خالد شقورى

    مُساهمة  سماهر الجمعة أغسطس 06, 2010 1:14 am

    بلداً لمت الطنبور

    بلداً لمَّت الطنبور . ود لقاي . موية النيل . حاج الماحي والقمحة
    كيفن ما بغنيها ... وكيفن ما بتكون سمحة
    النسمة التجيك مِندلي ... شاقي اللوبي حين تصلك
    تدلّي رِحالا جواكا ... وتقالدك إنت بين أهلك
    تنوم لامن براك تصحى
    الدرب البسوقك لا تحت عَلاَّك
    النخل البلا تطلع لو يندلى ويقول لك هاك
    الزول البتمشي عليهو .. يمشي عليكا ما بيرجاك
    والحن البيملا براحو ... مارق منو .. دارِك جاك
    نتقالد نحِن لبعضنا ... تبقى نفوسنا منشرحة
    الخضرة المقالدي النيل
    العز البسند الحيل
    الليل البعقبو صباحو ... أبداً ليلنا ما هو طويل
    والزرق اليدردر سيدو .. ياهو حلالو .. ينجمَّالو ليهو يشيل
    خيرك كلو بين إيديكا ... مو داير لو فد سرحة
    علياء
    علياء
    نائب المدير العام
    نائب المدير العام


    عدد المساهمات : 152

    من روائع خالد شقورى  Empty رد: من روائع خالد شقورى

    مُساهمة  علياء الجمعة أغسطس 06, 2010 1:27 am

    نور الدين
    ابراهيم
    سماهر
    لكم التحية وبالتأكيد ليس هذا كل ما كتب الرائع خالد شقوري
    في انتظاركم لايراد اكبر قدر من قصائد هذا الشاعر
    الذي اسرنا بكلماته رغم اختلاف البيئات
    له ولكم الود كاملا

      الوقت/التاريخ الآن هو الخميس مارس 28, 2024 2:10 pm