نفاج

نفاج

مساحة للوصل ونفاج نفتحه..بيننا جميعا وعبره..نحكي.. نتواصل..نتعارف..نتآلف..لنكون معا..نهر الحياة الخالد

دخول

لقد نسيت كلمة السر

المواضيع الأخيرة

» أفضل وأسهل وأكثر أنواع التجارة ربحية على الإطلاق أمان 100%
الإثنين فبراير 02, 2015 6:27 am من طرف الأميرلاي

» بستـــأذنك...
الخميس يوليو 03, 2014 8:08 pm من طرف الشاعر السماني حسن

» عاش من شافك
الثلاثاء يونيو 17, 2014 3:16 pm من طرف hamadvip

» ابدأ دخولك بالصلاة علي النبي (صلي الله عليه وسلم)
الثلاثاء يونيو 17, 2014 3:11 pm من طرف hamadvip

»  كيف يفكر الرجل ؟؟ وكيف تفكر المرأه ؟؟
الإثنين يونيو 16, 2014 1:00 pm من طرف hamadvip

» قصيدة جديدة ........ دنيا
الإثنين يونيو 16, 2014 12:53 pm من طرف hamadvip

» طيارة جات بي فوق .......... قصيدة جديده لهاشم صديق .. حفظه الله
الإثنين يونيو 16, 2014 12:49 pm من طرف hamadvip

» عشة أم حجل - هاشم صديق
الإثنين يونيو 16, 2014 12:47 pm من طرف hamadvip

» هاشم صديق - ما جاب المطر بنزين
الثلاثاء يونيو 10, 2014 5:41 am من طرف عثمان تباكي


    نفاج الشاعر القامة ابراهيم ابنعوف

    شاطر
    avatar
    ابراهيم الصغير
    مدير عام
    مدير عام

    عدد المساهمات : 213

    نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 1:40 am

    بكتب ليك

    مالى أنا كل ما أقول فى نفسى إتلمينا
    ألقى أقدارى تضحك .. لى تقول كضِّاب
    وكل ما أعمل حساب لظروفى
    زى الما عملت حساب
    مالو فراقنا مترقبنا .. دون خلق الله
    واقف ديمة عند الباب
    وأعمل إيه .. عشان يختانا جاى أو جاى
    وبينَّا وبينو يبقى حجاب
    ونشوف الدنيا موكب فرحة
    لينا تغنى بى ترحاب
    وتدنى عليِّا آمالن .. بشوفا سراب
    ويهل سعدى .. ونجم سعدى ..
    بعد ما منِّى طوَّل غاب
    وأقيف خاشع .. وأقول يا الله
    كل النَّاس يكونوا أحباب
    ***
    بكتب ليك وأطوِّل فى كتاباتى
    يفيض إحساسى وأملا الدنيا
    بى كلمات خطاباتى
    بجمع ليك لغات الدنيا وأكتب ليك
    بى لغة العجم مرات ..
    وبالعربى الشديد وفصيح ..
    وبى لغة الملايكة أحيان ..
    وبالسريانى والتسبيح ..
    وفوق كل ذرة فى ها الكون ..
    بكتبا ليكى وارسلا فوق بساط الريح
    ***
    بكتب ليك على الأشجار .. وفى الأنهار ..
    ومحل ما تمشى قدامك
    تلاقى حروف رسالاتى
    لأنك إنتى من ذاتى .. وفى ذاتى .. يا ذاتى
    ومهما كتبت ما بقدر أعبر ليك عن الجوايا
    مهما طاوعت أقلامى كلماتى
    ***
    وليه ما أكتب وإنتى الماضى بى أحزانو
    بى أفراحو والمستقبل الآتى
    كتاباتك شوية خلاص .. ورسالاتك شوية خلاص
    علىَّ الفى منامى أحلام .. علىّ الفى صحاى وسواس
    وأنا الراجيكى تكتبى لىَّ .. كم دفتر وكم كرَّاس
    منَّها داير أفصِّل جبة وانْدروشْ ..
    وكمان طاقيِّى فوق الراس
    ومن كلماتا أسوى السبحى والبخرات وكم حجبات
    أداريبن عيون النَّاس
    كمان تقروقة .. وفى محراب هواكى اجلس مع الجُلاّس
    واخلى الباقى واتغتابو .. لو بعدك غشانى نُعاس
    ***
    أنا الراجيكى تكتبى لى ..
    كتاباتك تكون فى الظلمة لى نبراس
    أنا العايش فراقك لى ..
    بشوفك فى عيون النَّاس
    وعازرك لو كتبتى قليل ..رضيان بيهو
    ما دام بى وفا وإخلاص
    أريت يومن فرقنى معاك ..
    يكون محذوف من التاريخ ..
    وتبقى أيامنا ستة .. ونبقى فيها قراب
    أريت بلدن تحرمك منى ..
    لو ما إنتى تبقى خراب
    يسكن فى خرابا البوم ..
    ويتصايح عليها غراب
    تولِّع فيها نار الله ..
    وتصبح كوم رماد وهباب
    وتمرقى إنتى والنَّاس المعاكى قراب..
    وما دعيت خاتي الا الفراق اسباب
    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 1:42 am

    وين لاقيتك ؟!


    قبل الآن أنا وين لاقيتك .. حسة عافي وراحة بال
    إتمنيتك .. وإستنيتك .. رغم البين والأمد الطال
    ***
    من وين جيتي ولي وين ماشي ؟! قبل إذيك وكيف الحال
    قبال تملي مدارك عقلي .. وتدخلي باب الخاطره سؤال
    وتطلعي من أفكاري قصيده .. تندا أشواق عبر الأجيال
    تروي فصول أياماً ضاعت .. وسر الريده الما ينقال
    ***
    يارب وين نحن إتلاقينا ؟! .. أبدا يوم ما كنتي خيال
    ياها عيونك وصفرة لونك .. وفرة فاطر البسم الشال
    ياها هداوتك حين تتهادي , تتهادي وينهادي هلال
    كان ودرتك كنت أودر ذاتي .. ذاتي بلاكي بقاها محال
    ***
    إتذكرتك بين بنوتنا .. وناس حلتنا وساحة الفال
    الحوليك شالوك غنيوه .. وجاريه مشاعر الناس شلال
    ترقصي يا الرقصتي قلوبنا .. وميلتينا يمين وشمال
    قولة سيْ ما انقطعت منك .. إلا جنا الغزلان جفال
    ***
    إتذكرتك رغم الواقع .. وطول أحزان ما بينا مجال
    تسري سراة الليل ما تهجع .. تصبح وباقي الهم يتكال
    كان الذكري تقرب نازح .. أو من حالي .. حال
    أو قد مره يطاوع حظي .. وأصل النجم الماينطال
    ***
    أيوة عرفتك .. وأتحسستك وصوتك في الأعماق لازال
    أبداً صورتك ما بتغباني في أحلامي وفي الآمال
    في الجايات والفاتن وعدّن .. من غنواتي وفي الموال
    إلاّ كمان من يوم ما غبتي .. ما عرّج منك مرسال
    ***
    وحسع جيتي زماناً وليّ .. وباكيه شموسو علي الأطلال
    تنادّي خيوط الذكري الأولي .. أنا كم للذكري نسجت حبال
    وإسترجعت طيوف أحلامك .. إلاّ شنو الفضل في البال
    كل آمانينا وأحلامنا .. كان مويةً في غربال
    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 1:43 am

    سماحة عيون

    تشيلك تهاجر بلا إغتراب .. تثير في شعورك حلاوة العذاب
    عجيبات عيونك عيونك عجاب
    ***
    عيونك تحير عقول الشباب .. تعاين تغرود تقولك حباب
    تقودني لي عوالم الهوي المستطاب .. عيونك تعاويذ بتشفي المصاب
    ***
    عيونك تشكل فواتح كتاب .. كتاب بين سجله الدعاء المستجاب
    قلوب خاشعة تطلب جزيل الثواب .. دراويش ونوبه ومدايح شباب
    ***
    مطيراً تبشر تبل التراب .. تساري وتفرح عطيش اليباب
    يضاحك بريقا رواحل السحاب .. تصحي الأماني يخدر سراب
    ***
    عيونك تجهجة فصيح الخطاب .. يحاول يعبر يخونه الصواب
    يعاين رموشن تجذبه إنجذاب .. يصارع هواهن يكون فكره غاب
    ***
    سماحة عيونك يقولوا الصحاب .. سماحة غنانا ونغيم الرباب
    البفصل منانا وحديث كل باب .. (البشاهد) عيونك يكون غاب وجاب
    ***
    سماحة عيونك رجوع للعقاب .. وكليمة أحبك تبروز خطاب
    سمرنا وحجانا ولذيذ المطاب .. وقميرة فريقنا التتاوق الضباب
    ***
    متين لي عيونك بتصبح قراب .. وأشوف الحنين في صفاهن مذاب
    يشع فوق قليب بينه بينك حجاب .. يخاف التلاقي البعقبو الغياب
    ***
    عيون في جمالن تسام الرقاب .. وعشانن يهونن قواسي الصعاب
    سؤال لي جلالك يدور الجواب .. منو الشاف عيونك ورجع تاني تاب ؟


    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 1:46 am

    نومي قريرة فى خدرك


    نومى قــريرة فى خدرك .. إذا ما ضمـــــــاكي ليل

    وخليني أنا للدرادر .. وسهــــــــــاد الليل الطويل

    معاك قبلان التحدي .. أســــوم بيهو الروح عديل

    وأشوف لا وين لىْ يودي .. عنــــادك والمستحيل

    أعصفى شوق لا تهدِّى.. يخـُـمْ فوق راسى ويكيل

    أنسى أو اتناسى ودى.. وميلى خــــــلاف ما أميل

    هيا ادعى زبانية عذابك .. إذا شايفـــــة البى قليل

    إذا ويلك عندى جنة .. أكيد بعشــــــــــق كل ويل

    سوى سواة قوم آزر .. وقــــــــــود نارن للخليل

    ونارك برداً سلاماً .. على قلباً بيـــــــــــــــك عليل

    أدفرى قواسيك علىَّ.. مجـَــــــــــرَّبْ وليهن بشيل

    وحتى الضالات طريقن .. علىْ ببقـــــــــــالن دليل

    يسوِّن زى ما يسوِّن .. شنو الأكــــــــتر من قبيل

    شنو الفضَّل منى يرقب .. بزوغ الفـــــرح الجميل

    جفاكى هجيراً يحرِّق .. وأكوس فى حنـــــِّك بديل

    وضل الدوم يرمى غادى.. ويحرم التحتـو المقيل

    صواريخ لحظك وسهامك أفوت من ديل ألقى ديل

    وأقـــع بيناتن ممدد .. والم باقى الصبــــــــر حيل

    متل ما الله حباكى .. نواعس وطـــــــــــرفاً كحيل

    سيوف تضرب بين لواحظك تكاد تسمعك الصليل

    حبانى مواضى القوافى .. شياطين أشعـارى خيل

    أجاجيبا أمثال عيونك .. واتشرف أمــــــوت قتيل

    عشان لا بسعد بلاهن .. ولا غيـــــــرن لىْ سبيل

    ولا بقدر أفوت حِدَّاهِنْ .. ولا بيحــــــلالى الرحيل

    خصامك وشدة قساوتك.. أخير من عطـف البديل

    يقل غلطك والا يكتر.. يقابلو الشكــــر الجزي
    ل
    avatar
    مهيرة
    عضو جديد
    عضو جديد

    عدد المساهمات : 29

    رد: نفاج الشاعر القامة ابراهيم ابنعوف

    مُساهمة  مهيرة في الجمعة أغسطس 06, 2010 1:49 am

    يا سلام يا ابراهيم
    الشاعر الاستاذ العم ابراهيم ابنعوف شاعر العيون
    هو احسن من كتب عنها وله اشعار خالدة وقصائد لا تجد الا ان تحفظها
    مفردة رصينة وصدق وقوة تعبير
    متعه الله بالصحه والعافية
    وشكرا لك وانت توثق له هنا في نفاج
    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 1:57 am

    شكرا مهيرة علي مرورك
    وما قاله ابراهيم ابنعوف من اشعار اكثر من ان يحصي
    ولم يكتب شاعر عن العيون مثلما كتب
    الله اسأله له موفور الصحه والعافية
    ومعا لنورد اكبر قدر من قصائده
    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 1:58 am

    مدهشة

    الشوق غلاب .. والوعد سراب
    في بعدك يا اغلي اماني
    وآحشاني عيونك وآحشاني
    ***
    يانسمة صباحية انسرقت تتخلل من صيف أحزاني
    في أرحب واحة ريد أنزل فوق أرضها واكتب عنواني
    يا الله عليك وانتي بعيدة اعجاب ومتجددي آمال من تاني
    ***
    مدهشة يا شمساً تشرق علي قامه وابداع رباني
    لا تثيري عواقب الريد جواي لا تصحي همومي واشجاني

    وأنا بين الحاضر والماضي لا زال بتعذب إنساني
    ضميني إياب نسيني عذاب خلي الأفراح تتلقاني
    ***
    أنا جيتك من واقع مذري وعالم مليتو وملاني
    لا تسألي عن كنه حياتي أنا جسداً وروحاً غلباني
    أرسم للناس الكون بهجة وطرباني وما بينهم أغاني
    ما رمت خطاب الا وجاب أنا شاعر لو صح بياني
    ***
    تاتيت الريد لامن دفق وخايفلو من الزمن الجاني
    شيليه علي صدرك رأفة وختيه علي حنك تاني
    حجيه حجا فاطني السمحي والفارس الروياها أغاني
    وياما الأحباب يوم يبقو قراب الدنيا تزغرد من نشواني
    ***
    يا شامخي علي كل الدنيا يا وحي الشعر الإنساني
    جد روحي تفتش لي روحك وما كان لقياك في حسباني
    ما فاكرك من صبري تمرقي وتختالي علي أوتار ألحاني
    والأمل الغاب طول ما جاب الليلي ألقاه وبيلقاني .

    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:00 am

    احلى ما في الكون


    احلى مافي الكون عيونك واحلى من عينيك سروحها
    يوم تغيب تسلب رويحتي ويوم تعيد لي روحي روحها
    فيهن اتغـرب وأسافـر نفسـي تقبـل بـي نزوحهـا
    ألقى جنة شوقي فيهن الحنان مشتـول فـي سوحهـا
    داير اعيش فيهن وأفارق دنيـا كـان شاقينـي نوحهـا
    وأنسـى ايامـي العصيبـة كـل آهاتهـا وجروحهـا
    في عيونك كون بحالـو فيهـو أسـرار مـا بلوحهـا
    كل ما اتمعنـت فيهـا فيهـا اشـواق بابـل بروحهـا
    وأفضـل اتضـرع أمامـك رافـع اليـد اللحـوحـة
    أملي يرقص فوق سوادن زي بريق ياخد لـو لوحـة
    فيها كم شاهـدت واحـة الرمـوش ضالاهـا دوحـة
    وفيها كل الدنيـا ترقـص بالطـرب ناسياهـا روحـة
    صورة ماأحلاها صـورة مـن جنـان الخلـد لوحـة
    ياهو دا الخلاني أحلف مافـي زي عينيـك صبوحـة
    بالفـرح أيامـي لمـن بالفـرح كـانـت شحـوحـة
    كيف يقولو اخير تسيبن الله خلقـو دي مـا نصوحـة
    هن سعادتي وهن شقاي هن أمان روحـي الطموعـة
    كان غلطت استغفر الله باقي عقلي اخـد لـو روحة

    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:02 am



    التحـــدي (4)




    مجالس شعرانا ضجت محيرها نومك وصحاك
    وبنات أفكاري تحلق .. تتوه بين أرضك وسماك
    ***
    مدلّله يابت زمانك .. سبقتي القبلك ووراك
    مثل هارون الخليفه .. وكت يتباروا شعراك
    يشدوا غنوات القصايد .. وسنان أقلامن تحاكي
    عيونك وكتين توقل .. وتحين لي ضرري وهلاكي
    ***
    غريبة إنو يخلّوا زولن .. وغصب ينحازوا تالاكي
    ويظلموا الظالماه ديمي .. ويكوسوا عفوك ورضاك
    مع إنك ياكي الجنيتي .. ومع إني أنا يا الجيت شاكي
    ومحاضر ريدك بتشهد .. بدايتك وبعد إنتهاك
    ***
    أريت لو كانت حروفن .. تغير ميزان هواك
    وتقلل حالي العليّ .. وتزيد صبري علي جفاك
    إذا نمتي علي الخواطر .. وشغلتي أفكارن معاك
    وكت تصحي علي غرورك .. منو البدنيك من علاك
    ***
    مخيره ده يالفيي مرادك .. عناد إخلاصك ووفاك
    ومسيّره كيفن تمرقي .. من الكون الإحتواك
    جاهدي قدر ما تجاهدي .. معاي ما بتبعد خطاك
    ولا بيساعدك نفوذك .. وإرادتي تحتم لقاك
    ***
    جبرني هواك ما جبرتك .. وأعوذ بالله من هواك
    وجحيمو الواقودو صدك .. ونفورك وشدة قساك
    إذا ما إنسانك محنه .. ورجيت شن فايدة رجاك ؟!
    وإذا ما المحبوب تنكر .. علام .. علام التباكي ؟!

    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:03 am

    رؤيــة

    والله ما كذب المنام كل الرأيته لقيته صاح
    البسمة والنظرة الخجوله وقدلة الريل في البطاح
    ***
    نامت عيون العاشقين ساهرت لامن فجري لاح
    راقبت طيفك ذكريات يا رايعه زي طلة صباح
    ناحت بلابل الشوق عليك ندماني مكسورة جناح
    اتأوهت للناس قصيد صرخت من آلام الجراح
    ***
    رقصت علي النغم الحزين في غفلة العمر الي راح
    نادت عليك كل الزمان صادف نداها جفا السماح
    رجعت تجابد في الصبر وتدفن دموعا وراء المزاح
    وتتصنع البسمه الزمان مسروقه من شرف النواح
    ***
    وين إنتي والحلم الجميل وين كنتي والأشواق رياح
    ياراحله في الأزمان قدر تبخل بك أياماً شحاح
    يامعوداني الإنتظار , الإنتظار في قلبي شاح
    ***
    وين كنتي واندهدهدتي ليه وكتين لقاك كان بي متاح ؟!
    راجيك علي كل الدروب العامري والضماها واح
    دقيت أبواب الغيوب لا ارتحت لا فاطري استراح
    خايف من العمر قبال أراك يرحل متل ضل الصباح
    ***
    والليلي جيتي بلا خبر ياقدري حيا علي الفلاح
    وغنت عصافير الغرام لمن ظلام الفرقه زاح
    ما أجملك , ما أجمل صباك لما الجمال لبسك وشاح
    وما أحلي ساعات اللقا الوردية والعطر الي فاح


    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:19 am

    حبيبتي أنا


    بتسألوا عن حبيبتي أنا
    حبيبتي أنا ..
    وسعادة عمري في الدنيا
    الوراها فنا ؟؟
    ***
    دي آمالي العريضة البيها أشوف
    دنياي سرور وهنا
    وصباحي الزار بعد ليلا ً
    سهرتو ضني
    حبيبية عمري , آمالي وأعز مني
    وشعوري الفايضة في جواي
    هناك .. وهنا
    وحروفاً ديمة أفخر بيها وسط الناس
    وفي الدارات أشيلا غنا
    دي حبي البين ضلوعي
    إشراق ونور وسنا
    تسألوا عن حبيبتي انا ؟؟
    ***
    اسألوا عنها بتلقوها
    في كلمة سلام ما أتقال
    وما قالو الحبيب لحبيبو ..
    أبدأ .. وما خطر بالبال
    في رنة نغيم سلكاية ..
    وفي سيرة العديل والفال
    وفي زغرودة في الدارة
    وادين مرفوعة للشبال
    بتظهر في جلال لقيا
    وتبين في براءة أطفال
    بتسألوا عن حبيبتي أنا ؟؟
    ***
    حبيبتي نغم حنين ..
    ينساب مع موال
    من عالم بعيد جواي
    يموج بالبهجة
    ينسيك إنو لينا زوال
    فيهو أحلم وأشوف واحات
    خضرة كست تلال وجبال
    عالم في ترابو الغالية
    ما حطت رحال ورحّال
    وما عبرت سهولو أحزان
    ولا هجرت رحابو آمال
    عالم .. عندي أشوفو حقيقة
    إلا الناس تشوفو خيال
    تسألوا عن حبيبتي أنا ؟؟
    ***
    حبيبتي أنا من عهود الريدة
    عهداً باليمين أوفيهو
    وحتي ان كان شقيت في دابا
    قلبي تكون سعادة عليه
    شان لولاها ما كان ينسي
    أيام مرة من ماضيه
    شان لولاها ما كانت
    تزور البسمة يوم شفتيه
    شان لولاها ما دنياه
    باسمة والحزن ناسيه
    وشان لولاها
    ماعاش في نعيم
    الناس تحسدوا عليه
    تسألوا عن حبيبتي أنا ؟؟

    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:21 am

    من فارقت واديك


    من فارقت واديك قلت تميت حـول ..
    كيف يبقة العلى وأنا للسنيـن عديـت
    أنا صابر يا سحاب حولا وراهو الحـول
    وعارف يوم وقع فى حبـو مـا سميـت
    تراك وسط الدوع تضحك بريقك شال .
    أما انا يا حليلى العمـرى مـا فريـت
    روح يا سحاب فلـل عليـك الليـل
    وبلغ لى السـلام لـى دارو ان مريـت
    كلمو بالحصل لـو تانـى لـى يعـود
    وأوعة تعاتبو شان يزعل يقولـك أبيـت
    وبعـد الـحـول تـعـال غاشيـنـى
    برجاك فى محلى دة أنا بقيـت حييـت
    وان بقة ما لقينى ابـك علـى ونـوح .
    واعرف انى مت بى شوقـو واتفكيـت

    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:24 am

    أغنية للوطن

    يابلد عاشق ترابك ... ومن ترابك عشقي نابع
    زينة فوق ارضك طبيعتك ... جنة الله بلا منازع
    ***
    انت طيب .. ياحبيب ... وطيبة فوق صدرك منابع
    انت توتيك انت بركل ... وراسي للقاصدك يضارع
    ياتواريخ للحضارة ... يا حضارة كتابها ناصع
    ويا بطولاتاً تجلجل في ... العصور والمجد تابع
    ***
    يجري نيلك فوق عديلك ... يسري بالخير والمنافع
    شارفه جنات فوق ضفافك ... طيبها من عرق المزارع
    ياسلام عند المغيرب ... سرب طير لاوكارو راجع
    غني للأنسام شجونو ... وصفق الموج المسارع
    ***
    في خريفك زاهي ريفك ... كاسيا هضره وصيدو راتع
    وفي البعيد حد ما تعاين ... حاضن السماء للمزارع
    تلقي تربالا مشمر ... في البرد والحر يصارع
    هاشي باشي علي ديارو ... وراضي بالقسمو الله قانع
    ***
    من صفاتك جن بناتك ... ولبسن التهذيب مقانع
    بي حياهن وبي عفافن ... طششن عين المطامع
    السميحات يا حلاتن ... يشبهن لك بدر ساطع
    فتحت زهرات صباهن ... عاشقن للحسرة جارع
    ***
    مرحبابك .. بي شبابك ... وشيبك الفي حماك يدافع
    شالو اسمك في صدورن ... وسيفن اللي الفتنة رادع
    يا وطن ليك التجله ... من رجاك جفت المضاجع
    حيهم وبارك خطاهم ... ساعية للغيط والمصناع
    ***
    يا حياتي .. وذكرياتي ... ويا هواي من قمت شافع
    كم أحبك وأفدي حبك ... لا أجادل لا أمانع
    يا وطن أهواك مخاطب ... يا وطن أهواك مسامع
    يا وطن أهواك قضية ... فيها خاصم وبيها لاافع

    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:27 am

    ابكن ياعيون

    الليلة أبكن ياعيون ... كتر وحيحك ياقلب
    وينو الزمان يهدي الحنان ... من غير وداع راح محتجب
    ***
    ليه يابا راحل دون وداع ... ما قلت من دنياك تعب
    دايرنا نحن نعيش وراك ... كيف بي قليباً .. متخرب
    ولا القدر جبرك تسيب ... ناس ليها ياما كت تحب
    في الحسرة والأسي الهموم ... والعبره والدمع البكب
    ***
    غشاشة .. يا دار الزوال ... كل النعيم الفيك كذب
    كل ما تجودي الناس بخير ... يلقوه .. شرك متقلب
    يادنيا ليه بتشيلي أبوي ... يادنيا حار جرح القلب
    ما هسّ كان بيناتنا نور ... واليوم دريبو علي صعب
    ***
    مابيرحم الموت يابا زول ... دايماً .. مسلط للسلب
    أتام عيال .. خراب ديار ... بكاي عيوناً تنتحب
    هو القدر .. هو الآجل ... هو المسطّر ومتكتب
    رغم العلوم إتقدمت ... ياموت دواك ما عرفو طب
    ***
    جاني الخبر في يوم رهيب ... في نفسي أشوفو كذب كذب
    غشوني يابا وقالو لي ... راجيك أخوكي المغترب
    يابا .. ما شفت العلي ... لمن عرفتك أنت غب
    الكون ده شفتو عكس بعض ... حتي الشمس طلعت غرب
    ***
    جيت للديار مافي بال ... البال وراك تب منشطب
    جيت للديار وطعم الفراق ... في حلقي مرّ مراً كعب
    جيت للديار ابكيك ودمع العين ... يسيل يسكب سكب
    يا أبويا وآ أسفي الشديد ... ما جيت قبال .. تنترب
    ***
    روحت ما خليت غير ... ذكري المحبين للمحب
    ذكراك مقدسة في قليب ... أرضعتو حنين القلب
    ذكراك رسمتها في الخيال ... بين النجوم في ليل ضهب
    ذكراك دايماً في صحاي ... وعليها من النوم أشب
    ***
    بذكرك عند الصباح ... مندلي للمزروع تقب
    وبذكرك نصف النهار ... في نومه والنسام يهب
    بذكرك عند المغيرب ... جاي طالع بالدرب
    بذكرك في كل صلاة حتي ... الجمع حين تسمع الآذان تتب
    ***
    الهي أبوي عندك غريب ... أغفر لو كل ذله وذنب
    وارسل سحاب الرحمة يوت ... فوق قبرو يتزاحم يكب
    وتأنسو بحرواً حسان ... لا تتوصف .. لا بتحسب
    وأقبل \عاي قول لي أبوك .. في الجنة لا شقا لا تعب
    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:30 am

    زغـــرودة

    زغردي يمه في البلد البعيدي .. جابو لي وليد والليلة عيدي
    ***
    أنا الراجيهو زمناً مو قريب .. أشوفا طفولتي في وجه الرحيّب
    دا ماهو الأبله الدايماً مغيّب .. عشا أماتو قنّاع أم سبيّب
    ***
    ولداً لي أبوه يكون ضراعو .. يا سلام في روقته وأخلاقه وطباعو
    يرجّع لي سنيني المني ضاعو .. كلامو اليجبر الزول لاستماعو
    ***
    ماك الصار وشيهو ويوت مكشّر .. ومن المده كفك ما بيقصر
    عشيمك تلفا في اليوم المعسر .. وتصبح وتمسي فوق خيرك تبشّر
    ***
    إنت نسل الما بيضيمولن ولايه .. ناس الفاتحي واللوح والدوايه
    خلاويهن معمره بالتلايه .. ومريضن يشفوا بي رشة محايه
    ***
    جدودك في الفتيح راقدين سويه .. وأبوك ود موسي هوان البله
    أبوك الكنّيابي أسد البنية .. وأماتك غبيشي بتد رويه
    ***
    يجوك من أوسلي قاطعين الفيافي .. يقولوا ولدنا ما دلا وعوافي
    فوق راسك يذكروا أسم الله كافي .. وجسيمك يمسحوا ويملوهوا عافي
    ***
    تكبر أنت ياعكاز عمايا .. وراكوبة مقيل ضلي وضرايا
    تخلفلك عشرتولاد صبايا .. تعيش المية مية .. ومية جايا

    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:32 am

    كوسيلي الخلاص

    كوسي لي الخلاص من بدري في حبك ترانـي غــرق
    عارف نفسـي مابلقـــــــــــاكي سـاكت فيـك متعـلق
    قالوا الدنــيا يامحــــبوبة تجمـع يوم ويوم تفـرق
    بس نان مالا مابتجمــــعنا والله ده ماهو متحـقـــق
    صـــح ماليها أمان واللــه لي مضـيقي المشِـــــــقّ
    مادالي اليمين تضحـك لي وبي إيـدا الشـمالي تعـق
    هـــاك شكوايا يا محبــــوبة لو قلبك علي يــــــــرق
    ديل أربـع سنين متــواري من محني وشقاي ما فق
    خوفي شقايا قبل ألقــــاكي يمحق لي عميري محـق
    وأجيك ساير علي الأكتـاف عزب لا حني لا جــرتق
    آه من دنيــتي وأقــــدارها ينصـبـقن علي صـــبـــق
    وساقة الهم تسوق في راسي تتعــــاقب بلا تتـــــــق
    بس تحـريني شن سويتا غيـر زول لي عيونو عشـق
    لمن اشــوف حياتي الغالية ليلا صبحو ما بشــــرق
    ساعة الناس تنوم تتهـــني والعين للمنـام تســــــرق
    ألقي رويحتي فوق المـــلي شقيش ما انقلب بي شـق
    الله من عبرتاً ســــــــــادي وارداً للقليب بتشـــــــــق
    والله من دموعـــــاً نازلي ينجــارن بلا ميرتـــــــق
    دار انساكـي عــــارف قلبي للغير حــبو ما بطـلـــــق
    منك لو أموت كل لحظــــــة بالريد قلبي ليك يخفـــق
    ما بنساك عشان كملت صبري ولي حدودو لحـــــــق
    إلا الريد تعقبو عــــــــدواة وليكي أنا من عدواتو شفق

    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:33 am

    شديرة الحن

    لقيتك في زمن وخري بعد ما أتربت فيك رجاي
    طلعتي من القدر نفحة وسماح قدراً يجيبك جاي
    ***
    صباحك .. ياربيع مزهر نهارك .. ياخريف بكاي
    ومساك..وكت يمسي الشوق علي هدب النجوم ناجاي
    وأشيل طمبوري أنقنق لك عشان ريدك بقيت غناي
    ده ريدك ألف ليله وليل وطول الليل علي الحجاي
    ***
    رجيتك بالسنين ودنين أدودر في الصبر تالاي
    وكت ضهر الصبر يتقص أقيف وألزم همومي براي
    وأشوفك بين غيوم الشك بريق شايل الأمل ضواي
    أشابي عليك مطير ينزل يغسل في دواخلي أساي
    ***
    رجاك لا كان ميعاد بيناتنا لاعرفه ووصف هداٌي !
    سوي صورة مجهجة فكري ترسما نزعه من جواي
    وأقيف ما بين حنين رؤياك وجن العاشق الغواي
    أمد إيدي علي المجهول عساي تصدف يداك يداي
    ***
    أغنيك قبلما ألقاك وتخيل فوقك قوافي غناي
    وألاقيك ياشديرة الحن بعد دردح غناك بلاي
    شميسن في نهار واحد قدرة الخالق السَواي
    شمس ضلاً سماي فيها وشمس حجبت علي رؤاي
    ***
    لقيتك لاني حان للماضي لا ندمان عليه صباي
    محطات العمر يمضي , وكمان , عجل الزمن جرَاي
    سماحة الدنيا في عينيك ولقاك علي المودة جزَاي
    جزاي علي الأقل شفتك وكت شوفتك علي كفاي

    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:37 am

    شقيت يادنيا

    الشقي الفي الدنيا وخاتي الدنيا فيه
    خلوه اليحنس روحه كان تقبل تجيه
    ***
    اليشوفو يحسبو زي الما .. عليه !
    جوه جوفو باقي نار مطلوقه فيه
    إن سكت خايف الخلوق ما يحسوا بيه
    وان بسم شان يخفي حزنو الفوق وشيه
    ***
    يجري ورا السعاده الليلي وينها سعادتو ليه
    والأماني علي الرهاب دافقاه ميه
    الزمن لا أداه لاقدر .... جريه
    وكان حماه الجني قبلو آدم أبيه
    ***
    الناس الفرح في عيونها لوح لي إديه
    وده الهموم تابعاه ماشي علي مشيه
    ساكت بي غناه طرابه في الكلمات يتيه
    ما عارفنو بي أشعارو يكتب في نعيه
    ***
    في غرايب الدنيا تضحك لو ..وتجيه
    تونسو بي حديثها ..... البشتهيه
    وكتين يأمنا ..... ويطرح وشيه
    تحدثو بي حديث لاسمعو لا جابوه ليه
    ***
    قدر من تاني يبني تهد بنيه
    عاد تبكيه ..وتبكي الناس عليه
    تفرقو في مصايبها .....تبتليه
    التقول لا شافا لا شافت شبيه
    ***
    شقيك يادنيا أوعك ترحميه
    إنتي جوري .. وعذبيه وعذبيه
    فرحك تاني شن بيسوي ليه ..؟!
    ما دام جافاه أعز الناس لديه .

    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:39 am

    إنتظار

    البحبك مابيقوليك حقو انت تحس براكا
    الله يعلم ياحبيبى روحي تشتاق لى لقاكا
    يبقى ما عارف الحقيقة وقلبى كيف عايش هواكا
    وماكا عارف فى غيابك حالتو كيف تصبح بلاكا
    يبتسم يضحك يقابلك ويبكى بالدمعات وراكا
    ويقرا فى عينيك سعادتو وسر ودار روحو وهلاكا
    ***
    كلما أشرق ... صباحو تلقى لمّ اشواقو جاكا
    وانتظر فى لهفة يسأل فوق دريب البص رجاكا
    دار يقولك كيف صباحك ياحبيبو وطاب مساكا
    وخوفو ما يقدر يقابلك ويبقى شال اللوم معاكا
    ***
    لما جيت ليه مارجيتو ورحت فايت بى هناكا
    ولاّ إتغيرت انت وحزروكا وما براكا
    ولاّ شوقك ليه جابك إلابس خفت المعاكا
    جيت شان تشرح ظروفك عارضك خجلك حماكا
    ***
    لو صحيح قاعد تريدو متلو كان الشوق براكا
    وكت ما بتقدر تفارقو ذى ماهو دار يوت يراكا
    ممتثل خاضع يقولك ياحبيب داير رضاكا
    ليه نسيتو ورحت نايم عارفو وا سهرو ان طراكا
    ***
    تانى بعدك وين يقبّل ما بطيبلو العيش سواكا
    ما بطيق .. يحمل فراقك وما يطيق يقدر قساكا
    طرفو ساهد ربه شاهد حالو بالمر ما غباكا
    ولِسّ جارى وراء حقيقتك ما استراح من يومو داكا
    ***
    ما امتحنتو وشفت صبرو ماخلاص جرّب كفاكا
    أوعى شيشك بى بشيشك ماكا عارفو جريح تراكا
    لا تعذّبو .. ماهو مذنب أرحمو وخفف عساكا
    ولو قسيت أو كان نسيت هوّ لا زال فى رجاكا

    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:40 am

    يا بت من الماضي

    كيف اوصلك ؟! وكيف أقدر .. أنساكي وهواك ما بنترك ؟!
    أحترت فيك وأحترت في .. القلب اليفكو وينشبك
    ***
    يابت من الماضي ومأججه .. ذكريات .. تعجن تلك
    في حترب البال الموقع من .. جدار عقلاً مقرب يتسهك
    مالك علي .. راماني بين ؟! .. أخطا وأصيب آمن وأشك
    وأنا لا كفر يوم بي هواكي .. ولا دخل قلبي الشرك
    ***
    وين إنتي من طول الرجا .. وحبل الهوا الما بيتمسك
    وصبراً ألتق وبالصبر .. من تاني يرهف ويتهتك
    دليني غاب محراك علي .. وأبت المسالك تنسلك
    وين في محطات الزمان .. أصباك وعارض الشوم يفك
    ***
    اسأل عليك رجع الغنا .. المنضوم علي حنّ السلك
    والشوق يسرسف فوق .. نسيمةً راحلي جوف ليلاً حلك
    كان تلقي عندك صيبه لي زول .. يداري دموعه بي توب الضحك
    ومرات يفتش للبكا .. وما يلقي دمعه عشان يبك
    ***
    لا تتكليني علي الحظوظ .. ما لي حظاً يندرك
    والناس حظوظها تغيب تجيب .. وانا حظي في اللا شئ يسك
    أحلامي ما بين الغيوب .. فرت طيوفها أبت ترك
    وأحزاني تتعاقب فصول .. حابكاهن الأقدار حبك
    ***
    أديتك البقدر عليه .. الطالباه والغير مطلبك
    والقلب ما ملكت يداي .. طوّعتو ليك وأصبح ملك
    وما باقي شرطاً في العقاب .. يرضيك ويرضي تصورك
    غير روح خجوله من المروق ..منضاري في جسداً هلك
    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:41 am

    لا تسافري

    تسافري !؟ أوعك ما تسافري
    بلاكي الأيام .. كئيبة
    أملنا وغاية منانا وجرحنا الليهو إنتي طيبه
    ***
    تسافري بخاف يوم وداعك وأخاف اللحظة الرهيبة
    وأخاف تفضحني عيني دموعها تكتر صبيبه
    وأخاف كلمات بيها أصارحك تخوني ويقسي ترتيبه
    وأخاف روحي قبل توادعك تروح ما أقدر أجيبه
    ***
    بوادعك لو كنت بقدر قليبي عيونك يسيبه
    تجرح وحد ما تجرح يريدها وبقي مبتليبه
    يحنلا ـ بي شوقها يرزم رزيم اللتمد قضيبه
    وتجهجه فيه الليالي وبعيد للتوبه والنيبه
    ***
    بيرضيك إنك تسافري وتخلي وراك في مصيبه
    أحاولو أكلم وأوصي ووصيتي يفارق دريبه
    يصر من شدة حماقتو يتابع أفكارو الغريبه
    حماقة البقلع هدومه ويقع في النار يصطليبه
    ***
    تسافري أنا وين ألقي زيك سماحة وأخلاق عجيبه
    يا الجمعتي عيون النوافر ورشاقة النسفت سبيبه
    خدودك آه من خدودك أصيل المايلي للغيبه
    ونسيمك حين في يسري بلا الضارباه وتيبه
    ***
    إنتي سفرك يحزن بلدنا لأنك ليها الطبيبه
    ولأنك شايلي حن ناسها وقليبك ما خلا طيبه
    وتاني لا يومين لا تلاتي دي سفره وراها طول غيبه
    تبقي كيف لليوم ما يشوفك عليه تضيق الرحيبه
    ***
    كدي أخري سفرك شويه وتعالي أبقي لي قريبه
    وكمان لو هان خاطري عندك أرضي خاطر الوالده الحبيبه
    مناي تمسيني وتصابحي وأكون جنبك لا مغيبه
    وأشد قلبي وتر ربابه وحروف أسمك أغنيبه
    ***
    أنت كم زيك زهرة يانعة إرتوت في أرضنا الخصيبه
    من نقرب ننسم شذاها المدن تقطفها تنتشيبه
    وكتير فينا من المجرح قليبه ومجروح قليبه
    وفي النهاية قدرنا إنو نزرع حصادنا الندمه والخيبه
    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:47 am

    المــلامه

    إتغيرت أنا أتغير ؟! محال ياروحي أنا اتغير
    وحاتك إني لا حبيت ولايوم في سواك فكر
    ***
    خطاباتك تعاتبني وأتوه في سطورها إتحسر
    علي الأمل البنيتو عليك وعمري الخايفو يتودر
    وأكتب ليك عشان أرضيك أقبل لومي وأتعذر
    وألوم في قلبي ليه ينساك وعارفو قليبي ما بيقدر
    ***
    كيفن هان علي أنساك وأنسي العشره وإتنكر
    وكيف يجفاك قليباً لي بعد في حبك إتوكر
    أصبح كل مناي ألقاك أفرح وخاطري بيك ينسر
    ودرباً في العمر سرناه نحن وياك نفرشو زهر
    ***
    أريت ليلاً يشيلني معاك لي بلداً بعيده سفر
    بلداً لافي زول طلاها لا زولاً يجيبلو خبر
    ووكت الليل يعم الكون وفوق لرباه يتحكر
    يسدل من ضفايرو السود وإتوسد ضفايرو أسهر
    ***
    أجمع من نجومو الشارده أنظم ليك عقود ودرر
    وأهديك من رياض أشواقي باقات من ورود وزهر
    أقولك شوفي يامحبوبه روضنا بعد يباس إخضر
    ونسمات الصباح طلت تعانق زهرو تتعطر
    ***
    تخاف الليل حكاوينا ونضمها في عناق وسمر
    وتنسج توب أماسينا تظرزو من غنانا صور
    نعاين في البعيد نجمات نشد فوقن قليبي وتر
    وأعزف من ربابو نغيم زمان كان بيه يتأثر
    ***
    بسمايتك تطمني ويزيد بيها الأمل .. يكبر
    وعيونك تلهب الأشواق وداخل قلبي تتفجر
    وأتوه أنا في ظلام ليلاً تهبو النسمة يتبعثر
    ويتماوج أمام عيني يظهر من خلالو قمر
    ***
    أودع همي بي رؤياكي لا أحزن ولا أتكدر
    وأعاهدك إني أصون حباً نما وبين الضلوع خدر
    أحس إنو الزمن صافاني قربك وليّ إتأخر
    وأشعر إني نلت سعادة قبلي أنا ما لقاها بشر


    avatar
    سماهر
    عضو مشارك
    عضو مشارك

    عدد المساهمات : 152

    رد: نفاج الشاعر القامة ابراهيم ابنعوف

    مُساهمة  سماهر في الجمعة أغسطس 06, 2010 2:49 am

    المتلاشي

    أحكي ليكم قصة غريبه .. قصة زول شال غلبو وراح
    أول مره تشكك فيها .. وتتخيلا تبقالك صاح
    ***
    من شافع ما فك الأول .. وكل سنينو قضاها نجاح
    لامن دخل الجامعة تفوق .. قامت وقعدت لو الأفراح
    كان في طموحو مهندس بارع .. ولا يكون دكتور جراح
    خمسة سنين للجامعة يساسق .. لا عطلات لا يوم أرتاح
    ***
    وإتخرج .. ساعة ما أتخرج .. فكر يمشي يكوس لو وظيفة
    فوقو ديون من أمو وأبوه .. يسددا قال من مهنة شريفة
    ياكل ويشرب .. حامد شاكر .. حتي إن ما فضلت تعريفة
    وأوضة الطين وضل الراكوبة .. عندو أخير من قصر الباح
    ***
    خمسة سنين صاحبنا بيجري .. وكل الدور تقفل أبوابه
    شان لا عندو وسيط يمشيلو .. لا بالفيهن عندو قرابة
    خمسة سنين راحت من عمرو .. ويبقي معاها كتير الراح
    ***
    فوق الخامسي ردف للساتي .. همو أكشاك ومحلات شاي
    يبقي يصادفو إعلان في جريدة .. ولا من الجالسين الرأي
    قعدتو قعدة زول مشلهت .. وفكرو يدولق غادي وجاي
    فعلاً صادف شركة بتعلن .. عن أشغال ورواتب صاح
    ***
    قرب يصرخ من الفرحة .. لامن خشمو أخدلو رعيشه
    هز جيوبو عشان يشريها .. تاني اتنازل عن فتيشه
    أتذكر في أسبوع كان قوتو .. دردوم دكوة ونص العيشة
    في الآخر أكتفي بي نظرة .. وروح قابض غلبو الشاح
    ***
    ما نام لامن باكر بدر .. وزادو معاه الخرم الجوع
    سجلوا إسمو وشافوا أوراقو .. ووعدوا يجيهم بعد أسبوع
    وراح يحلم بأنو أتعين .. ورقو مدير فوق عشرة فروع
    وفجأة أستيقظ صنقع دنقر .. وقال يازول ربك فتاح
    ***
    بعد أسبوع .. وراجع للشركة .. ناقش نفسو في أمر غريب
    ليه سيد الدكان ما رد .. (صباح الخير) مع إنو قريب ؟!
    وليه كمساري الحافلة اتعدي .. وما طقطقلو وقالو تجيب ؟!
    وليه لمن واقف يتسرح .. صورتو أمامو بقت رحراح ؟!
    ***
    غايتو أتناسي وقدم ورقو .. والمسئول سامع وما شايف
    غير أوراق من مافي اتمدت .. واستقبلا استقبال خايف
    وراح مفزوع يسأل في نفسو .. (حتي الجان ما لاقي وظايف)؟!
    باكر بمشي وأخلي الشركة .. طالما الشركة أتملت أشباح
    ***
    رد عليهو الصوت من تاني .. أرجع ولا تسئ التفكير
    أنا إنسان عايش بيناتكم .. إلا اتلاشيت بالدردير
    وما دام ما لي قسمه معاكم .. هاتو أوراقي وشوفو الغير
    وظل الزول ظاهرة كونية .. وما معروف للناس وين راح !!
    avatar
    ابراهيم الصغير
    مدير عام
    مدير عام

    عدد المساهمات : 213

    رد: نفاج الشاعر القامة ابراهيم ابنعوف

    مُساهمة  ابراهيم الصغير في الجمعة أغسطس 06, 2010 2:51 am

    شكرا سماهر ..
    القصيدة دي من القصائد الناقصة عندي وبفتش عليها
    ودي الاكيد
    avatar
    سماهر
    عضو مشارك
    عضو مشارك

    عدد المساهمات : 152

    رد: نفاج الشاعر القامة ابراهيم ابنعوف

    مُساهمة  سماهر في الجمعة أغسطس 06, 2010 2:52 am

    ريح الصبا

    أمشي ليها ياريح الصبا وهبّي
    جيبي ليّ ردها لو تدور قربي
    ***
    قولي ليها أنا أن حبيت ما ذنبي
    الحب ما قصدتو هو يا هو القصد دربي
    يعلم بي الله في دافع خفي أثر بي
    وبلا أشعر لقيت رويحتي منسلبي
    ***
    من اليومو داك باقي الدموع شربي
    وباقي فراشي جمراً فوقو متكبي
    وآتعبي وشقاي .. وآحسرتي وغلبي
    مالي أنا زي يتيم بالعبرة متربي
    ***
    مع عينيها شن سويت ياربي
    كلما تشوفني تتفلت بلا سبي
    بتهددني شان عرفت ضعيف قلبي
    ولا دا من حناناً فيها بتخبي
    ***
    الله أنا من صديراً ديمة متعبي
    ويا ساتر علي لو كان قصد حربي
    طلبتك بي إله الكون وكل نبي
    أمسكي عليك لا يتفك يغدر بي
    ***
    ما أنا زولك البهواك ياحبي
    درت أعداي عشانك وليك كره صحبي
    في عطفك سعادتي ومن قساك حسبي
    يا فرحي وبكاي ويا علتي وطبي
    ***
    قلبي زمن يلاهيبك دحين خاطبي
    ولو خليتي مين غيرك بيدري البي
    عنادك سيبي وريهو أنت بتحبي
    وزيدي قليل حنانك وبالكتير طالبي

      الوقت/التاريخ الآن هو الأربعاء أكتوبر 18, 2017 3:00 am