نفاج

مساحة للوصل ونفاج نفتحه..بيننا جميعا وعبره..نحكي.. نتواصل..نتعارف..نتآلف..لنكون معا..نهر الحياة الخالد

دخول

لقد نسيت كلمة السر

مواضيع مماثلة

المواضيع الأخيرة

» دوبيت مسدار البنات
الإثنين ديسمبر 23, 2013 10:30 am من طرف الشاعر السماني حسن

» كفايه ......... كفايه
الأحد ديسمبر 30, 2012 12:35 pm من طرف عثمان تباكي

» سهر الكمنجه
الأحد ديسمبر 30, 2012 12:28 pm من طرف عثمان تباكي

» كلام عبدالله زول الله
الأحد ديسمبر 30, 2012 12:24 pm من طرف عثمان تباكي

» العجين المر
الأحد ديسمبر 30, 2012 12:19 pm من طرف عثمان تباكي

» طيارة جات بي فوق .......... قصيدة جديده لهاشم صديق .. حفظه الله
الإثنين ديسمبر 17, 2012 9:32 am من طرف عثمان تباكي

» جديد هاشم صديق
الإثنين ديسمبر 17, 2012 9:26 am من طرف عثمان تباكي

» هاشم صديق - كابوس صابر
السبت ديسمبر 15, 2012 10:19 am من طرف عثمان تباكي

» نفاج منتدى خامل للاسف الشديد !
الأربعاء نوفمبر 14, 2012 1:49 pm من طرف ابو جوان

    مختارات من اشعار محمد الحسن سالم (حميد)

    شاطر

    علياء
    نائب المدير العام
    نائب المدير العام

    عدد المساهمات: 152

    مختارات من اشعار محمد الحسن سالم (حميد)

    مُساهمة  علياء في السبت أغسطس 29, 2009 5:59 pm

    نادوس

    الحال وراك كيفن تسر باقيلك انتي بلاك في زين
    ما تهشم ابريق الرضا خنست نسيمات السمح
    والبسمه زي حبه قمح
    لفحا وطفر طيرآ كتر
    أورث غصافيري الضنى يبس غناها مع الفجر
    هطل على الشجر الهموم وشاشات نهارات العنا
    عانيت وراك جنس عنا
    بوغ سهادي كرو النجوم
    خطو المواويل ارتعش
    حرس عصاتي بنات نعش
    دومست فوق حجر البتول
    هلوست بي صلب المسيح
    دروش شردت من الضريح
    شويمت بي ظلم الحسين
    أومت على كم ميضنه
    وما بين عيونك والمغول
    ساهد بي قافله الحروف
    وايقاع ظنابير الزمن
    انصربع ايقاع الفصول
    هبطت غمامه ورا الجبل
    راحت من الليل الجروف
    شهقت شعاب انساني خوف منك عليك على أي زول
    وك نياق شوقا الضنا سرح عصا التسيار قبل
    درب الحياه المرمول فنا
    يا وقعة الواقفين هنال يا وقفه الواقعين هنا
    يا آفة الوطن الجريح اشمعنى لا وصلك دنا
    لا آفه الزمن المشيح قدرت رويحتي تيقنا
    من جيتك المرقت بسيم الدهدهك روحت وين
    يا زين مرقت مشيتي وين
    غربل عليك ليل المدائن الكان زمانك حالا زين
    ناشدتها وفتش نهارات القرى المتكيه فوق شعب الصبر
    ساندتها علم بطانا الشيطنه
    غنيت معاهم سودانا يا سودانا….
    للمتهم والدنيا ليل والقمره بت فاتا القطر
    وصف لهم حتة شليل
    ردد حروفهم ردتها
    وقف سحابي مع الدغش شهدتها
    شهدت معايا على العذاب الهد أضلاع الغبش راعفتها
    تكلت خدودا على بكاي لا قيت سجون جاهد بها
    بي جيهة الجذب القديم دخلت مكندك بالشباب خنت التراب راودتها
    فوق ها التراب واعدتها
    لا انتي جيتي ولا هي آه روحت وين
    يا وين مرقت مشيتي وين
    كل البنات جو من المللى
    هشت بكت شدت حكت وأزيارنا والمرحات خلي
    يا انتي يا مرت العدل ماك في صعيدا تترجي
    روحت وين قوليلنا بس من الغلبان تجي

    لو فينا أطلعي مننا أو بره أدخلى … أدخلى
    غنيتك البارح براي انصلبتو التانيين غناي
    والليل بتواتاك شعر دونو انعتاقك أو فناي
    هيا يا مغنين الشعر..ضد ها الزمان وطبنجتو
    شعر الشعر…شعر أيوه يلا علينا جاي
    ونكر المغني كمنجتو
    نادوس يا فجر القصائد اندلق
    ما حك جلدك مثل ظفرك فأنطلق
    انا شرحنا لك صدرك أو شرخنا فأنعتق
    يا أنت يا كل الذين لأجل خاطرهم طهوت غداه عقم زهور كلم لتنفتق
    غضبآ يؤرق موقديه كورته
    رجمآ لكل من تنازل أو تخاذل
    أو تشاعر أو تداعر
    أو تهاون أو تخاون أو تعاون ضد فتحك أو أتاني ليسترق
    تربت يداك…تبت يدا كل الذين تغامزوا
    وتهامزو وتلامزو وتقززو وتلذذو
    من فيه جرحك يا وطن
    نادوس أه … نادوس يا………
    أمسينا يا نادوس وأصبحنا بيك يا أم
    يا سوسه ضد السوس قلبآ بلاك يضم
    ليل الضياع مهووس يحلم هواك يؤم
    بعض الحصاد الروس عالم نداهو بعم
    ختيت هواك فانوس بقالي شلتو وحم
    جيت المدن باخوس لاقيتو جالب السم
    راشح هجير البوس وكل الوجود دم دم
    كوركت يا نادوس أم الغبش يا أم
    يا نخل يا أبنوس يا سامبا يا تم تم
    يالبيك غناي محروس دخري الغلابه هلم
    دهمني كم مجروس وعكمت تاني وقم
    حمرت في السحب المكبرته
    يا دخان يا ريحه يا قواده للبحر المخنس والعساكر والملمس..ما تختشى
    بيوضه يا ماخده الخريف ما طمبرت عربانا شي
    مستني في الزمن النزيف القال بجي وفات بي وشي
    رشت النهار بالصبر أبت المغارب تترشي
    دقست سواقي المتعبين كايسالا فيها عقاب عشي
    بيوضه آه أواه لو الكلمات حصى
    قالت لي الله أقرب فرج
    أواه لو الكلمات لهب نرجم به وش زمن القسا
    قالت في اطن الليل وهج هدام أمان الناس نسي
    دنقرت للأرض السربله بالسراب فرغت بي غلبي العوج
    فقدت أيادي العصا شديت حزامات الجلد تالا ضرا الواطه
    كوركت صد أرجع يا ولد
    طوريه أبوك تراها دي عاند كواريك مشيت طوريه أبويا نراها ديك
    لفحوها لمن قام يصلي خطاب بكارات الغمام مغرب صباح ليله دخلتو على البلد
    حرق عرق الفي الكلام عطشان سقيت عرق الشديره من المطيره الفي كان حس
    العساكر لا ورا قالت لي أجر شدره غنايا جريك ضرايا جريك ضرا قبل العساكر ما
    تصل قبل الدرادر ما تبين وكانوا العساكر في وشي قت أقول وقع طينه الجداول
    ما ها زي طينه جسارتك يا بلد والكل طين
    يا نبوت دقه تفوت و لا حلم يموت
    النندق نندق نندق ويفضل باقي لهيب الحق
    حق الناس ينزل في الحلق
    او ينعارض شوكه حوت
    يا كهنوت اليجي كابروت
    يا جبوت اليجي كابروت
    يا كابروت يا كابروت يا كابروت
    كابروت عشم وطن الغلابا الحال بلاك تب ما يسر
    ما بان صباح أو عسعست قدامنا ليله تزيدنا ضر
    أوتارنا يا آخر الغنا حردان عشياتا النغم
    فرغت مجالسنا البلاك عنكب على أبوابنا السأم
    أنزح كفانا كضب رياح وبكاء رعود وضحك برق
    العشب مالي حشا الأراضي جواهو لمن العش حرق
    الشعب حي بس كيفت تصد يملابك المليون عرق
    كدبنا في الثرى في رجالك ما فينا زولآ ما عرق
    ساوين عصا الأشواق مرق
    عربان ونوبا نهاتي بيك والزنج تتمناك عتق
    ورا يا وجع هيا يا طلق
    صد لي ملامحك يا حراز ريح العوارض غربت
    فرتق ضفايرك في الرذاذ جية العصافير قربت
    لاقيتا في غابه مدينتي وسط شتيلة حبحبت
    على عش صغارا الدوب حبت
    ما وقف الليل ولا الهجير كم جفت ريقآ وورتبت
    لاقت من العنت الكتير ملت الفيافي أحد أحد
    فايده جناحى بلا أطير الموت ولا العيشه النكد
    با نيل مدد
    يا غيث مدد
    ندى دمر نادوس ونشوغا
    وخلى الناس الصبحت يوم من حيات الخور ملدوغه
    خلى الصوت الكبتو الجوع يلقى براحو يضوع ويضوع
    الصوت العالي يا صوت الناس التحت الواطى ما مسموع

    علياء
    نائب المدير العام
    نائب المدير العام

    عدد المساهمات: 152

    رد: مختارات من اشعار محمد الحسن سالم (حميد)

    مُساهمة  علياء في السبت أغسطس 29, 2009 6:03 pm

    يا متخبية خلف وضوحك


    يا متخبية ...
    خلف وضوحك
    أمرقي داخُل ..
    تلقي الغيم الطاش
    إتلقط
    لمّه وربَّط ..
    ربَّط ونقّط
    نقّط ورشّى
    الغبن إتفشّى
    القابض طينك
    وطاب في دوحك

    يصحى الشجر اليابس
    أخضر
    يضحى الأخضر
    زائد وأنضر
    يرجع طيراً
    غِصب إتهجر
    وشوش ..
    عشعش ..
    وعمَّر روحك .

    يترى الحلم
    الفينا إتحجّر
    وندرأ نزوحك
    تالا المدن ..
    المصّت دمِّك
    ودسَّت فوحك
    قسّت همِّك
    وقصَّت موحك ..

    يا متخبية ...
    وأنا مفضوحك
    رنّة فرحك ..
    صنّة ترحك ..
    وين ما أقبِّل
    ياني بروحك
    أي مرتكب الصاح
    ونصوحك ..

    كَجَر الصمتِ
    وكت داهمني
    كنت متلبِّس ...
    بي غنواتاً ليك
    إتكرمن
    من سر بوحك
    للأطفال
    بالزمن الجايي
    الزمن الطيِّب
    زمن الخير
    الجالبة فتوحك
    يقفل حرباً ..
    باحتة جروحك
    وطوفان جدباً
    محّن نوحك ..

    كبّر طفلك
    ونشّن حجرو
    قام الصمتِ وكجرو ..
    إنكجروا ..؟
    إنعدِّيتي ..
    وشبّت أزمة

    بين فرقات
    الضو والعتمة
    شقَّ نسيم
    لي عِرْق الكتمة
    خالَ النخل
    العاول طوّل
    قال وإستشهد
    بي عمَنَوَّل
    "المنحوس ..
    هجّر تربالك
    والمجروس ...
    يا الردم الجدول
    ودكَّ أطفالك
    تحت الردمة

    وقامت طلقة ..
    تجاه النسمة ..
    الساكنة النخل
    العالي الأسمى ..
    حاض الطير الحامل ..
    هجمة
    طرح الغيم الشايل ..
    صدمة
    داخ النحل العامل ..
    صُرمة

    رجمة ورجمة
    في حلقَ الليل
    إنشرقت نجمة
    رقد النيل هبّود
    بالوجمة
    نفدت شيمة
    بقدرة قادر
    طارت غيمة
    وصارت باكر
    باكر رحمة
    مدّت
    وندّت
    وشدّت
    خيل الحيل
    بالبسمة
    نخل الغبش
    الدغش إتلمَّا
    الأبنوس الجاسر
    يمّة ....؟
    هبَّ تبلدي
    تحدي وهمّة
    وبحر المالح
    كبّر وسمَّا
    "الأديان
    في القلب
    يا أمّة
    والإنسان
    في الدربِ
    أهمَّ"

    البلد إتحول
    بي مسموحك
    ناس بتكاتل
    لأجل سفوحك
    ما يسقيهن
    غير فد جدول
    جدول
    خيرو الخاوي
    نضوحك
    لا أشواك
    تحميك تتجوّل
    لا أسلاك
    تنصلبط سوحك

    يا ممتلية
    كجوفي فجيعة
    وآخرك أوّل
    أو معتلية
    كطمي الشوق
    القلب الماحل
    راحل طوّل
    زي دعوات
    الناس الظُلَّم
    لمّا عليها الغول
    إنغوّل

    حلمي مدردح
    دخري فقارى
    إرثو ...
    ضكارة
    جسارة
    بصارة
    بإيد كرّاسو
    وبي إيد فأسو
    لو لا إحساسو
    بعزّة ناسو
    كان تكَى راسو
    زمان وإتسوّل
    زولاً طبعو
    يفجِّر نبعو
    بدّع زرعو
    وماسك الأول

    سوَّى حضارة
    وشرَّف لوحك
    شرحو ..
    شروحك
    مسحو ..
    مسوحك
    يفقد عطفك
    ويأبى ينوحك
    غامل يوم
    راح ترجعي فيهو
    ومجد بنيهو يلاقي
    صروحك

    جهراً ترجعي
    ياوضّاحة
    يا مرفوع للقوّة
    صمودك
    صبر الناس
    اليوت كدّاحة
    لنضرة عودك

    المارقين
    الذمّة هجائر
    الساكتين
    فوق رأي
    وبصائر
    مطر الحق
    بالحيل سحّاحة
    ناراً بق
    لليل صحّاحة
    شالت وجع الحال
    في أصفاحه
    وتنزف شان
    ما تبرى جروحك
    وتعبك راحة

    شدِّي النيل الأبيض
    فرسك
    وفيض الأزرق
    فينا جموحك
    مقداف فألك
    ومرسى طموحك
    الإنسان اليسمع
    بالك
    يعرف مالك
    يفتح خِزَنو
    و يستر حالك
    يلفح إجنو
    ويقلع نالك
    يكتل حزنو
    ويروي قموحك
    رافع رسنو
    وراتعة أمبوحك

    تنمسيبو
    هديراً طيِّب
    وتصحي
    خرير الفجر
    صبوحك

    عشتي آواضحة
    وراء مخباكي
    ويا متخبية
    خلف وضوحك
    عشتي أصيلة
    كأرضك ونيله
    ومرتع واحد
    لألفِ قبيلة

    يا ال لبنايتِك ..
    من غنمايتِك
    يوم ما إنطفت النار
    في لدايتِك
    غيَّر زيرك
    ولاّ ملوحك

    قدمك قاشر
    قطع الفاشر
    سمسم باكر
    باهي مسوحك

    سترة بدنك
    قطنة وطنك
    طينك سكنك
    نبضك مكنك
    عرفك فطَنك
    تبري جروحك
    يا الطوفانك
    صدراً ماهل
    وشرف العزّة
    الأحمر
    نوحك
    من دعتاية الزمن
    الكافر
    ينصر دينك
    وتسلم روحك

    تسلمي واضحة
    وراء مخباكي
    أو متخبية
    خلفِ وضوحك ؟

    علياء
    نائب المدير العام
    نائب المدير العام

    عدد المساهمات: 152

    رد: مختارات من اشعار محمد الحسن سالم (حميد)

    مُساهمة  علياء في السبت أغسطس 29, 2009 6:06 pm

    صياعة مع الغفاري وأهل الله في زمن غلط



    [size=24]تستغرب يا رسول الله
    يا أول وتاني الخلفاء
    تستغرب يا أبذر لو جيت
    في هذا الزمن الجهجاه
    لو فيكم حد يا حنفاء
    إتجاسر وقال ما معناه:
    (في الدين الطيب لا إكراه)
    وبني آدم أدرى بدنياه
    أو أن العالم شركاء
    في الكلاء ..النار ... وفي الماء
    أو حاول ينصح وينطاول
    لي حاكم ظالم وقال لا
    يا لاقى جهنم مأواه
    فتحولو ترابيس شالا
    يا راجع نفسه أقلاه
    السيف فوق رأسو مخاواة
    بالذات الزيك يا أب ذر
    بالذات الزيك لو جاء
    راكب دغريتو العرجاء
    دايماً غلباوي وغالاط
    لخباط للعيشة الخمجاء
    بالذات الزيك لو جاء
    في زمن الزيف المنشر
    والتشريعات العوجاء
    يا إنباع يا راجي الراجا
    يا واقف فوق عمق الدين
    يا شايف لي آخر دنياه
    يا طيب ... يا إبن الغبراء
    الشركة يسارك يا أب ذر
    من إسمك واللا من الذر
    الكسحت ديكا كريسيدا
    داك سيدا أب دقنا شمطاء
    وجيب إيدك يلا النيلين
    لو درت تشوف العنقاء
    يا صاحب النفس الأمارة
    بالوعي الديني المحتارة
    دا الدين ... المقلعة ده الدين
    والمزرعة من فضل الله
    سال سيفك داقش شقيش
    قدامك عاين كم ديش
    الزمن إندقش دقيش
    الأمن .. محاكم التفتيش
    في كل المدن العربية
    حا تلاقي شدرتك مسبية
    يا إنتحرت بي بترودين
    وعصفورك منزوع الريش
    أجلاف كنزوها بلايين
    والناس بي الله ويا آمين
    بتحلحل دين الكنتين
    تنلفت كايس لي مين
    الأمن ... محاكم التفتيش
    وأصحابك جوة زنازين
    وأسيافن صقروا ما فيش
    ما إنبعنا وباعتنا قريش
    ولأمريكا وبي حبة عيش
    والحاكم قبض البقشيش
    سال سيفك داقش شقيش
    الأمن ... محاكم التفتيش
    جنسيتك...بظبورتك...الفيش
    في كل المدن العربية
    حا تلاقي النفس العربية
    في مصحة أمراض عصبية
    بين الحجبات والأرتيل
    تنململ شاحبة وصفراء
    وقافلاها متاريس الديش
    والكضبة عمايل الأمراء
    سال سيفك داقش شقيش
    إتراجع يا أبن الغبراء
    يا صاحب النفس الأمارة
    بالثورة القادرة الجبارة
    إتراجع وأنسى الفقرا
    أمثال العسكر غدارة
    زراعك تنفد تتنفض
    عمالك منك تتجارى
    وكل الكادحين الشرفاء
    وراح تفضل وحدك في الدارة
    راح تفضل وحدك في البر
    لا زوجة لا قطة ولا غطاء
    لا تكتل نفس يا أب ذر
    سيب خونة مكة وتجارا
    إتراجع يا إبن الغبراء
    في لجة انكسرت بي السارة
    زلقتني عجالة الشعراء
    فلقتني من الربذة حجارة
    سرقتني بدمي الصحراء
    أب ذر لا سمعني ولا تبعني
    طبطب على همي بيسراه
    وكان دمي إنماذج بدماه
    بي دم الغبش الشهداء
    من اول وتاني الخلفاء
    إتجمع في رسول الله
    زي نهر بيحفر مجراه
    مصلوب فوق عتب الفيحاء
    مجلوب في السوق السوداء
    وما صرخت بنت أبي بكر
    وا إسلاماه ... وا إسلاماه
    كانت هي الأخرى وراء القصر
    تنململ بين الدهماء
    تجار الدين الساقطين
    الجنرالات الجبناء
    مكتوفة الأرجل والأيدي
    مكفوفة الأعين عمياء
    [/size]

    سماهر
    عضو مشارك
    عضو مشارك

    عدد المساهمات: 152

    رد: مختارات من اشعار محمد الحسن سالم (حميد)

    مُساهمة  سماهر في السبت أغسطس 29, 2009 6:09 pm

    شكرا علياء وانت تنتقين بعضا من قصائد القامة حميد..
    وفي انتظارك..

    سماهر
    عضو مشارك
    عضو مشارك

    عدد المساهمات: 152

    رد: مختارات من اشعار محمد الحسن سالم (حميد)

    مُساهمة  سماهر في السبت أغسطس 29, 2009 6:11 pm

    خوفي من تلحق رفيقك

    خوفي من تلحق رفيقك
    يا بريق نجم الحيارى
    وإنت لا نّور طريقك
    لا شرق فجر السهارى
    من زمن يا صحوة طلعك
    غصة في حلق الصحارى
    حتى شال النمة فرعك
    دودى زي وهج البشارة
    قلنا يا سعد المواسم
    عودك المليان جسارة
    عودك الفجري المصادم
    بالبصيرات والبصارى
    مستحيل يرضخ يساوم
    مهما كان الريح حصارا
    يفضل النخل البقاوم
    في السقوط نخل الفقارى
    يااندلاع صوت الغفاري
    في حلق دغش الغلابا
    لو خريفك تاني يطرح
    آه يا اخر سحابة
    لمايا شرف المواكب
    يبقى هم الناس إمارة
    تندحر كل المناصب
    ينكسر كرسي الوزراة
    كنتو وين وين إنتو كنتو
    كنتو وين
    لما الشوارع ما ثبت قداما مرتق
    نفضّت صمت المسافة
    مّدت الشوق المضارع
    للصباحات التجرتق
    كف شهيدا البق مارق
    من فرقة الظلمة فجرًا
    تم بي دموّ الشرافة وضم حضن الارض عاشق
    كنتو وين وين انتو كنتو
    لما كان في سجنو ثائر
    بي جلابة السونكي نومتو
    ويصحى بي امر العساكر
    قومتو في الزنزانة يمحى
    ويفتح الاف الحناجر
    ت.. الاطفال ويكتب انبل الاشعار لباكر
    تشطب السجان وصوتو ويبقى فنانا البساسق
    كنتو وين . وين انتو كنتو
    لما فضل الدين عباية
    تربي فوق كتف الغنايا
    تنتصب في الجو طوابق
    تنقلب في التو بنوكة
    للبداهن
    والبنافق
    والبوافق
    لما كان نفس العبايا
    تتنفخ بي قدرةحبلا
    لي قصار عمر الكحايا
    من جُنب تنسلا سيفًا
    عبّر السواهو سارق
    شدة الفقر الخرافي
    حدة الشغل اللي مافي
    رُغم الاف المتاجر
    والخوازيق والمرافق
    كنتو وين انتو كتو
    لما البيوت في الشمال قامت خنادق
    بالكتابات البتنزل فوق ضهاريهم
    مطارق
    لما طلاب الحقيقة كانو بختارو المشانق
    ولما لسة الله بموت في الجنوب
    بين البنادق
    كنتو وين وين انتو كنتو
    آه يا وطني المستف
    في المطارات القصية
    آه يا كفني المنتف
    في مدارات القضية
    آه يا صمتي المكتف في العبارات الندية
    آهي يا نفسي الملطف بالنهارات الصبية
    آهٍ من رفع المصاحف بالرماح الاجنبية
    المعاطف اجنبية
    العواطف اجنبية
    الجلاليب اجنبية
    الدولايب اجنبية
    الدهاليز اجنبية
    السراير اجنبية
    المساير اجنبية
    صبة الكآس اجنبية
    ختت الراس اجنبية
    رشة الدلكة اجنبية
    رعشة الفركة اجنبية
    طفية النور اجنبية
    والخوازيق
    عربية
    عربية
    عربية
    فضي نارك يا محارب
    ولا هات البندقية
    غني عشقك يا صبية
    احنا قدامك مدارك
    غني للوطن المفارق
    عشت يا وطني المبرق
    بالندى ولون المشارق
    يامحرق
    يامحرّق
    يا مجرب
    عشت بي شرف البنادق
    ويسقط
    العفن ال بتلب فوقنا من شُرف الفنادق
    يسقط
    يسقط
    يسقط

    سوهندا
    عضو ممتاز
    عضو ممتاز

    عدد المساهمات: 77

    رد: مختارات من اشعار محمد الحسن سالم (حميد)

    مُساهمة  سوهندا في السبت أغسطس 29, 2009 6:40 pm

    كم هو رائع هذا الحميد..
    شكرا العزيزات علياء وسماهر.
    وعليييييكم الله ما تبخلوا علينا بالمزيد من شعر هذا القامه
    تسلموووو

    جالوص
    مشرف
    مشرف

    عدد المساهمات: 86

    رد: مختارات من اشعار محمد الحسن سالم (حميد)

    مُساهمة  جالوص في الإثنين سبتمبر 14, 2009 1:49 pm

    [center]رسائل ست الدار بت احمد جابر
    للزين ود حامد
    ( تلغرافات )


    محمد الحسن حسن سالم (حميد )

    ( جواب أول )


    باسم الحاضر والمستقبل
    ست الدار بت أحمد قالت :
    ليك يا الزين ود حامد شوقنا
    أما بعد ،
    المبعوتة المنك .. وصلت
    ورُح فكيت الطلب الفوقنا
    باقي الدين يا الزين خلصتو
    قدر الفاضل .. مصروف راشد والتومات
    والجايات من جاي .. لا جاي
    زي ما قت لك قبال ده
    شهر إتنين حا نطهر راشد
    شهر إتنين المدرسة تأجز
    الله يبعد العارضي تجينا
    وراشد حالف ما يطهر
    إلا أبوهو وعمتو تحضر
    وإلا يجيبو الغنايين
    شان الشوق بت سرنا ترقص
    قلنا نجيب المداحين
    طنطن .. أنا جاي من الحج
    وعارف راشد لما يطنطن
    كل الدنيا الفيي تطنطن
    غايتو بشر .. بس ربو يهون
    ما كلمتك بالتومات
    أول البارح جني يرطنن
    قالن نحنا الخواجات
    بسم الله .. مرق حصلت
    لقيت لك جعفر زارد البيت بالخواجات
    يبقى حداشر وخواجية
    ناس البلد الكسرو عليهن
    صدو يقلبو في إيديهن
    عدمانين من إسم حكيم
    ولا خبيراً للمشروع
    علماء آثار .. فضلت في آثار
    ما خموها الجونا قبلكن .. شن خلولنا بلا حجار
    الله يصرف الخواجات
    بينات جعفر والمحجوب .. والمحجوب والخواجات
    طقت حجي .. العمدة طفاها
    باقي الناس الجات للفرجي ..
    قنبو قيلو شبعو لحوم .. والخواجة يصور ساكت
    ستة خرفن وتيس ما كفن
    ستة خرفن في فد يوم
    المعدوم أشكال وألوان
    أي خدار في اليوم داك في
    كملن رف كمين دكان
    أول كفو الخواجات
    بعدو العمدة وصمد الساقية
    ناس المجلس والمشروع
    بعدو الطلبة وباقي الناس
    حتى الشفع والحروم
    ستة خرفن وتيس إنصفن
    ستة خرفن في فد يوم
    جات من صالح بت كلتوم
    تسكت تخبز طول اليوم
    لمن حرقت الدولاب
    قنبت المسكينة تدعي
    الله يصرف الخواجات
    غاية الليلة السقا يشولق
    واطات الله دي ست رشاها
    ما في غنوتاً ما غناها
    ما في مدحتاً ما سواها
    حمارو صبح لحق أمات طه
    سب الدين والأمريكان
    جنس بدع
    زولك ده يحير
    عند الجد كان أده ينقنق
    عند الفارغة يشيل ويبعزق
    إذكرت كلامك ليا ..
    إنو في ناس لاعبين بالدين
    وناس لاعبابا الأمريكان
    الله يصرف الأمريكان
    الله يصرف الصرفيكان
    ما خلوني نشدتك منك
    كيفن حالك والخرتوم
    كيف المصنع والعمال
    حالم لسع نفس الحال ؟
    وما رقوك سووك باشكاتب ؟
    يورينا الله زيادة الراتب
    كيف الناس والحالة عموم ؟
    والعزابة الكحيانين
    سيد البيت عل ما زكاكم
    لسع تقعو تقومو براكم ؟
    قلبي معاكم
    ربي يخدر عود ضرعاتكم
    بالي معاك يا الزين ود حامد
    بالي هناك والشوق الشوق
    خلى شدير الجوف محروق
    راجي مطيرة الزين ود حامد
    نحنا نصاحاً زي واطاتنا
    نحنا نصاح إلا القراص والتجار والحاصل البحصل كل صباح
    شتلاتك قبضن
    الحملان كبرن بلحيل
    العضمين الروكة إنزرعن
    اوعك تشفق من تالانا
    ولا نبقالك مشغولية
    زيك واحد مستورين وما ناسين المسئولية
    هي يا الزين زغرد
    بت ام زين جابت لها بت
    ستة أولاد حتان البت
    المحجوب ينشد من خبرك
    شافعو محسب من يومين
    التومات طيبات ونصاح
    إلا غباش بلحيل آ الزين
    راشد كرر .. شهر اتنين كان ما جيت أنا ما بطهر
    الله يبعد العارضي تعال
    كان فد دور يدوك يا تعال
    كان بالخصم إن شاء الله تعال
    وما تتوصى .. وداعة الله
    أوعى البشغل والعربات والحيكومة السمها فاير

    أم أولادك ست الدار بت أحمد جابر

    ست الدار بت أحمد كيفك
    جاني جوابك مفتوح شارع
    جاني جوابك وانا بتذكر في ناس راشد والتومات
    في الشتلات والحالة عموم
    ناس حلتنا التحت .. الفوق
    الليهم الله وعيشة السوق
    جاني جوابك وانا بتصور
    في المشروع وعمايل جعفر
    ولما بكيت .. يا ست الدار
    أيوة بكيت .. يا ست الدار
    لما قريت علماء آثار
    علماء إيه يا بت الناس
    سواح إيه .. ما عندك راس
    ست الدار تتوهدبي ليه
    ديلا جماعة السي آي إيه
    تعرفي إيه السي آي إيه ؟؟
    امريكان في كل مكان
    ديل مالين الدنيا ملي
    ديل قالين الخلق قلي
    باسم الدين والأمريكان أي عوج مبدي ومختوم
    صوتنا هناك وهنا مكتوم
    ومافي فرق في الوقت الراهن بين واشنطن والخرطوم
    أنا مأزوم .. مأزوم .. مأزوم
    يا خرطوم وينك وينك
    يا خرطوم شن شبّ وقلبك وسلبك
    حلبك ؟ زنجك ؟ بجتك ؟ نوبتك ؟ عربك ؟
    أنا مأزوم .. مأزوم .. مأزوم
    يا خرطوم أزمني الصلبك فوق الطلحة الأمريكية
    يا خرطوم .. أوه خرطوم .. أوه واشنطوم
    طن .. لفتك فجراً يقطع رحطك
    ست الدار سامعاني يا اخيتي ومرتي وامي وأم الكل
    أنا بندهلك من شارع الله .. فوقي هجير والتحتي بقل
    سبي معايا الشردو راجلك .. والحرمونا شوية الضل
    سبي الحالة العالة علينا .. حتى احكيلك بالتفصيل
    حاصل الحاصل يا بت أحمد
    جاني وفد في المصنع زاير .. وكان الوفد ده أمريكاني
    لفّ وفات اليوم التاني
    جانا مدير المصنع فاير
    وشو حمار العمدة العاير
    نف المصنع فيهو خساير
    وقالوا يخفضوا مئتين عامل
    مئتي عامل في فد مرة
    مائتين عامل .. مائتين عامل
    يبقوا هوامل .. يبقوا هوامل ؟؟
    ما يهموش .. الهم المصنع
    تفّ قراروا وفات في حالو
    مسئولين ونقابيين مافي العارض واللا اترجى
    العمال من سمعوا احتجوا ... سيرو موكب صامد وصامت
    إتضامنا معاهم سرنا ..
    أب عرام دور عربيتو .. العربية الامريكية
    زنقح خلا الموكب ثابت
    احتجينا مع الإحتجو
    إتكلمنا كلام موضوعي
    قلنا المصنع حق الدولة .. والعمال أصحاب الحق
    هي اللي تقرر والتتولى
    هي البتحدد سير المصنع
    إيد العامل هي العاد تنتج
    ما المكنات الأمريكية
    زيت العامل ياهو البطلع .. مو المكنات الأمريكية
    ودرن الأيدي العمالية
    أنضف من لسنات الفجرة
    ودين الدقن الشيطانية
    ومن كرفتة البنك الدولي .. وكل وجوه الراسمالية
    وأشرف من ..............
    داك الحين المصنع هاج
    جات عربات اللات بوليس .. فضوا العالم بالكرباج
    والبمبان الأمريكاني
    شرقت شمس اليوم التاني
    كنا حداشر ونوباوية
    متهمنا بالتخريب والتحريض والشيوعية
    البوليس صاقع شيوعية
    وفاكر نفسو بنبذ فينا
    هي آ بوليس أمك مسكينة
    البوليس عمدني شيوعي
    التحقيق طلعني مدان
    التحقيق طبعاً تحقيقهم أو تحقيق الأمريكان
    اسبوعين عشناهم جوه
    اسبوعين زادننا قوة
    ست الدار ما تشفقي خالص
    ست الدار أنا ياني الزين
    ست الدار سامعاني كويس ؟
    كل الهم ما يغشى الغم بيتنا وراشد والتومات
    وكل الناس الحالهم شاهد
    ست الدار الشوق الواحد
    لي حلتنا وليكم ليكم
    وللإشراق في عينيكم
    وكل الناس الزولهم صامد
    شوق وسلام .
    الزين ود حامد
    ردي سريع .. باليد .. باليد
    في دورين موعود بي شغلة
    لمت لمت .. كان ما لمت أنا جاييكم وما ندمان

    ( بعد الحاصل والإتحصل ست الدار بت أحمد تكتب ) :
    زيني الزين .. أب حالاً زين
    جاني جوابك .. يا المبروك
    وسابني أشوف الدنيا كويس
    وأعرف غلط الصاح مظبوط
    سابني أميز .. وأقدر أفرز .. أرجع أميز
    فرحانابك يا أحزان
    فرح النار بي لوح الزان
    مبسوطابك يا المبسوط
    ما هزاني مصيرك
    قدر ما هزوني الميتين عامل
    ميتين عامل في فد مرة
    ميتين اسرة تروح وين
    في الأيام النجسة المرة
    ميتين عامل؟؟
    والله مهازل
    والله عمايل
    يا أوغاد .. وينا نقابة السجم الشوم
    وين عمال السكة رماد
    وين الطلبة ووين الوين
    بعتو شفيعكم يا عمال
    بعتو وجيعكم للراسمال
    وشن راجين يا تعسا الحال
    هاكم دي ..
    والله مهازل
    ميتين عامل ؟
    والله عمايل
    عامل ساكن في آخر الدنيا
    وصل المصنع بآخر بنية
    ينتج كيف؟ شغال بي فونيا؟
    عامل ينتج عشرين حتة
    تلحقو منها قيمة إتنين
    ستة بغطوا المنصرفات
    سبعة.. تمانية .. تسعة بغطوا
    أدها تسعة المنصرفات
    كل الفايض .. بدخل وين؟
    قولوا البفضل بمشي لي مين؟
    وبرضو خساير؟
    والله مهازل
    يا مضغوط .. خفض ميزك حبة تين
    تنك القعدة تلاتة خطوط
    خفف مرتك توب مضغوط
    من التمسحبو كبابي الصين
    خفض عمرك يا ابن الفانية
    وبي نظارتك واجه ثانية
    ثانية عيون الشغالين
    ثانية وبس
    والله مهازل
    ميتين عامل ؟
    ميتين بيت ؟
    ميتين اسرة بلا راس خيط؟
    ميتين اسرة ملوها جراح
    ميتين اسرة حا تولد صاح
    وليكم يوم يا أولاد الهرمة
    ليه يا الزين بتوصي عليّ
    وانا بت احمد ست الدار
    ام اولادك وهم صغار .. ام اولادك وهم كبار
    وياك الزين ود حامد داك
    كان متوظف .. ياكا الزين
    كان متوقف .. ياكا الزين
    ليش يا الدخري توصي عليا
    اسبوعين قضيتن جوه
    يبقى غصب .. زادنك قوة
    ليش يا الزين بتوصي عليا
    ليش يا الدخري توصي عليا
    وعارف ام راشد والتومات .. مرتاً دغري وغلباوية
    آه يا الزين .. لو كنت معاكم .. كنت بقيت النوباوية
    ما تهتم يا الزين بالحاصل
    واصل سعيك .. واصل واصل
    واصل سيرك
    كان ما كنت الزين ود حامد كان حا يكونك واحد غيرك
    في فضاء فالك يا إنسان
    نسمة تقولك في الإمكان
    أبدع واحسن من ما كان
    ياتو مطرتاً سوت شو .. فرقو غيما الأمريكان
    ياتو رصاص ما عقبو خلاص
    ياتو سجن يا الزين ود حامد
    ياتو محن تمحى الإحساس
    لما يكون في الساس والرأس
    ياتو وطن يا الزين ود حامد
    ياتو زمن دام للأنجاس
    طه ترابلتو راحو الديش
    غزّا بكانا اتنين رطانة
    صاقع كلو من اسماعين
    هو الفسر لهن الشغلانة
    ويا اسماعين
    ما كان الديش شقّ مسيمعك بالجبخانة
    لو المجلس قبل اوراقك .. أو في الثانوي لقيت لك خانة
    لكن قدرك يا إنسان .. بلداً هاص هيصة جبانة
    طالو الناس التريانين .. ضلو الله الما ضلانا
    أخّدو نورة الحاج بالدق
    باكر دور ما خشّ عليها
    خاتي اللوم قطع التمرات الفوق راس بيتو
    الخلفاء شكوهو وما لقو حق
    المحجوب إتلقى اخبارك وقال جاييك في أول بص
    البرسيم طهرنا البارح
    نعجة راشد صبحت والدة
    الحيضان سقناهن لوبي
    التومات طيبات ونصاح
    راشد طيب
    وانا طيبين
    كل الناس يا الزين طيبين
    ينشدو منك في الأفراح
    وفي الأتراح .. الزين الزين
    ما تشغل بالك
    بس يا الزين كان درت مشورتي
    اصلو كتالك ياهو كتالك
    تجي مندلي
    الواطة تراها
    وبي جاي جاي .. بندبر حالك
    ما الحيكومة الضاقت دمك
    عينا محل قبلت قبالك
    شورتك عندك
    عندك شورتك
    والببقالك .. الببقالك
    التمرات بعناها آ الزين
    خفنا السوس ونزالة السوق
    مبعوتالك عشرة جنيه
    والأشواق من هنا لا عندك
    ست الدار أحمد جابر
    تلغرافات :
    تلغرفين في وقت واحد :
    نوري . السوق .. ست الدار بت أحمد جابر
    المحجوب في قطر اليوم
    عفش الزين
    النوباوية
    الخرطوم .. الخرطوم بحري .. كشك الشعلة .. الزين ود حامد
    راشد راقد والواطة جعفر طالق فيها بهايمو
    ست الدار بت احمد جابر
    نوري السوق المحجوب ود أحمد جابر
    كتب الزين .. كل الاوراق .. راشد كيف
    النوباوية
    الخرطوم .. الخرطوم بحري .. كشك الشعلة
    النوباوية
    أنا في السكة وست الدار
    راشد ود الزين ود حامد

    [/center]

    سماهر
    عضو مشارك
    عضو مشارك

    عدد المساهمات: 152

    رد: مختارات من اشعار محمد الحسن سالم (حميد)

    مُساهمة  سماهر في الإثنين سبتمبر 14, 2009 11:56 pm

    شكرا نادر النادر
    شكرا ليك وانت تورد هذه القصيدة
    حميد شاعر لايشق له غبار
    واكيد كل حاجة نطق بيها جميلة
    ويكفي انو خير من عبر عن الغبش التعافي لقاطة القطن..الفتلو الحبال الفطن الفرن
    لك التحية وانت تشاركنا حب هذا الرائع
    وتاني مرحب بيك

    ابراهيم الصغير
    مدير عام
    مدير عام

    عدد المساهمات: 213

    رد: مختارات من اشعار محمد الحسن سالم (حميد)

    مُساهمة  ابراهيم الصغير في الجمعة سبتمبر 18, 2009 10:39 pm

    كابروت عشم وطن الغلابا الحال بلاك تب ما يسر
    ما بان صباح أو عسعست قدامنا ليله تزيدنا ضر
    أوتارنا يا آخر الغنا حردان عشياتا النغم
    فرغت مجالسنا البلاك عنكب على أبوابنا السأم
    أنزح كفانا كضب رياح وبكاء رعود وضحك برق
    العشب مالي حشا الأراضي جواهو لمن العش حرق
    الشعب حي بس كيفت تصد يملابك المليون عرق



    شكرا علياء..
    شكرا.. سماهر..
    شكرا نادر ..
    شكرا جميعا وانتم تزينون صفحات النفاج بدرر الرائع القامة حميد
    ذلك الرجل الذي حمل العامية ما لاتطيق كما قال البروفيسور عبدالله الطيب

    ود الحوش
    عضو ممتاز
    عضو ممتاز

    عدد المساهمات: 97

    الجابرية

    مُساهمة  ود الحوش في السبت مايو 08, 2010 4:48 pm

    الجابرية قصيدة للكادح شاعر الكادحين محمد الحسن
    بتحكي عن قرية اسمها الجابرية في الشمالية قاست
    ما قاست من وعود السياسين والحكومات العسكرية والاحزاب
    واهلها يفتقدوا ابسط مقومات الحياة
    انا كنت حافظها بس ضاعت من الذاكرة مع هموم الحياة
    وارجوا من الاخوة والاخوات ان ينزلوها لينا فهي تحكي عن
    واقع وحقيقة بمنتها الابداع
    وده جزوء منها امكن يكون ما مرتب بس ده البستحضره الان
    ---------
    كان ضحوية وكانت عين شمس الله قوية
    وكنا نسند في المحروت
    وفجاة اضوي فينا مكبر صوت
    قالوا الريس مار بفوقنا
    قالوا الريس ماري علينا
    تكيناله حبال واسوقنا
    ونجمعنا يطمن روعنا
    والبشوفنا يقول واشوقنا
    وتعبينا هتافا واحد
    سحقا سحقا للرجعية
    لا تفريط في قوت الشعب
    الجابرية تحي الثورة
    دايرين بسط ومدرسة اسطة
    والشفخانة وسوق منضبطة
    والتومين زيات الحصة
    وكان الريس فوق عربية
    تر عبايته وهز عصايته
    هزوا بنادقهم الضابتية
    وقام خاطبنا بنهج الثورة الصارم وحازم
    اما اللازم من شفخانة ومدرسة اسطة
    اما البسطة بنظر فيها
    اما السوق السوق منضبطة
    الاسعار للتجار باينة وواضحة
    وان فرطتوا بتبقا القلطة
    القصيدةطويلة وزي ماقلت ما بستحضرها كاملة
    والوفود الحكومية تروح وتجي بقول فيها
    وفد في وفد امشي وجينا
    مرة عربي ومرة رطانة
    مدرسة اسطة واجراءت
    مدرسة بسطة وحاحاات
    وتذكرنا العون الزاتي
    وقلنا نقوم للشفخانة
    طوبة في طوبة لامن تمت
    وجات السلطة
    انتو بنيتوا الشفخانة محل النقطة
    وقومتوها بدون زنزانة
    فجاة تنشك بينا الشرطة
    ونحنا اهل ودنا صافي
    وان قامت عكة في شيخ الحلة
    وقصبا عنك يالجابرية وقصبا عنك يا احوالها
    الجابرية حلة تعافر مقطوع راسها
    ماسي شيوخها قواسي اطفالها
    من قراسها لي قراسة
    صبيا تساسك عشرين كيلو بكراسها
    تاني بقول ما معناه
    فات العسكر وجا الاحزاب
    وشيخ الحلة لما الناس وقال ليهم
    جايهم زول مساول كبير وده البصلح الاحوال
    ولازم اصوتوا ليه واصلن الزول منهم بس قراء
    في الخارج وزوج مصرية
    المهم ارجو منكم ان تنزلوها لينا كاملة واكيد حتعجبكم
    ولكم مني كل الود

    نورالدين
    مشرف
    مشرف

    عدد المساهمات: 261
    العمر: 41
    الموقع: مروى

    رد: مختارات من اشعار محمد الحسن سالم (حميد)

    مُساهمة  نورالدين في السبت يونيو 26, 2010 4:28 pm

    شكرا لكم ولحميد الذى كتب شعره وهو بين الجناين والخضرة شايل هم السودان ونطلب منكم المزيد منشعره

    ود الحوش
    عضو ممتاز
    عضو ممتاز

    عدد المساهمات: 97

    رد: مختارات من اشعار محمد الحسن سالم (حميد)

    مُساهمة  ود الحوش في السبت يونيو 26, 2010 6:26 pm

    عمنا الحاج ود عجبنا
    للشاعر محمد الحسن حميد


    عمنا الحاج ود عجبنا ديما في اخر صلاته
    بسأل المولة السلامة وسترت الحال والكرامة
    وعشاء الضيف عنده زي فريضة وفي البيوت ياهو الركيزة
    في ليلة من ذات الليالي جاه ضيف في راس حداشر
    رحبوبه وفرشله فتشوا العشاء ما لقوهوا
    الرقيف ممحوق مقصر والبلد في حال معسر
    جاته فكرة امشي الفرم المجاور لرجال العيش يشاور
    بس عشاء الضيف يا جماعة ضيفي نازل ليه ساعة
    شاكله ودفروه ودوه محكمة الطواري
    اهله جنو بي وراهو لي الصباح ما عرفوا حاجة
    جاهم الخبر الماكد ود عجبنا بايت في الحراصة
    حاكمه الولد المنصب كتفه بالدبور مقصب
    ده شنو يا راجل يا مخالف
    زول مخرب عقله تالف
    انت ما داري بزلت الناس في الطواري
    اجلدوه قرموه نفذوا الحكم البهينه
    شان يفتح تاني عينه
    تسمع السوط في ضهر الحاج ليه خاوية
    كل جلدة جبل مزلة في ضمير الحاج الف علة
    وفجة رفع راسه شاف بنات ولده وبناته
    دمعتن في الخد تسرب وجعتن في الجوف تحرق
    نفذوا حكمه راح بيوته
    النفس مكسورة وحزينة كيف ملاقات الحليلة
    وفي البويتات الوره قادي عمنا الحاج ما عتيادي
    وفجة السكيلي ضرب حزاين ود عجبنا ناداه المنادي
    وتسمع من يوصي في فراش ود عجبنا
    قفلوا الحيشان يا جماعة
    اطفوا انوار الرتاين
    قفلوا الحيشان يا جماعة
    اطفوا انوار الرتاين
    داك حرس حصر التجول من بعيد ليكم بعاين
    يا زمن حصر التجول
    يا زمن حصر التجول
    يا زمن حصر التجول


    ومعليش لو نسيت بيت لانه زي ماقلت حفظ قديم
    وحاسي اني نسيت بيت ولا بيتين
    وما انسا غناء الفنان مصطفى سيد احمد
    اسأل الله له المغفرة

      الوقت/التاريخ الآن هو الأربعاء أبريل 16, 2014 10:20 pm