والشال المنام ووصالو مابي يصلنا
ما يفرح كتير وإن شاء الله ما يتهنأ
سايل ربي بي نص الكتاب والسنة
لايشوف الجحيم لا يوم يخش الجنة
والبت الجميلة القالوا اسمها نهلة
بالريد والحنان عينيها ست مكتحلة
انا الخلاني قول البت دي امها نحلة
إن ختوها جمب كارينا تطلع احلي
ويا طارق أخوي شكلك نويت القومة
والسويتو اكعب من تسوي حكومة
دي الجامعات مستفة بالبنات مردومة
وإت زي التقول ما شفته غير فطومة
سمحة وفنجرية وبت ملوك واصول
وفاهمة وبالفهم بتمنطق المسوؤل
رقة وطيب وفي تحنانا شوق معسول
وعندها جوز عيون حرررم بتقتل زول
ويا روحي العزاب والله تب مو فايتك
ودا الردتيهو جت قبل مولي وفايتك
احسن ليك تساهري مع النجيم الفايتك
ارقدي بالقفأ واتغطي بيها ملايتك
ويا روحي الغرام حبلن طويل ومزفتن
وماف بتن تدورك وبي هواك تتكفن
اسألي ربك التوبة وعليك إترأفن
احسن من تكوسي بدون تلاقي المسكن
ويا روحي البنات سلبن رويحتك وروحك
وسكنن الوجع من فوق اساك وجروحك
اصبري والصبر ممكن يقوي صروحك
إلا البيك كتييير يا روحي ارحمي روحك
@@@@
وإتعارفنا يوم بالصدفة قلتي ملاذ
وراجيك بالحنين والشوق يكون إنقاذ
لما تقربي اليوم داك بكون إنجاز
ولما تغيبي فيني تقوم حريقة جاز
وده التلفون شغلنا من الأهل والحله
غير كل صفاتنا مرقنا من المله
من كتر التفسبك فكري زاتو اتشلا
برمي القطعة فوق الموية ما بتتبله
وبت في الفيس مسجلة بي حنين الضو
رسالتا ساي بتملأ الشاشة كلها ضو
دا البتسوي كلو الفيس وراها بسو
وتعليقات في الإشعار بتعمل كو
والقعدت قصادي وبالعلي ما حاسة
جيدا قسم تقول بانا وعليو ملاسا
بت في خشيمة بسمة وبي تحتها الماسة
حلت قلبي شغال زي وكالة ناسا
والقعدت قصادي وشايلا لي جواله
بشتنت الوضع والحافلة كشفت حالة
دي ان جادت علي ان شاءالله بس برسالة
بفتح قلبي ليها واعرضو في بقالة
@@@
والسرقت منامي دي كيف تجيدا وصوف
بنية جمالا نادر وما بتجيدا حروف
إن ختوها توزن من بناتنا الوف
وفيها سماح عجييب رموش تمانية رفوف
ودقات قلبي وقفن من قعدته حداهو
اه انا من سنونو ومن سماحة فاهو
اليوم الكحلتك فيهو ما بنساهو
محفور في القلب وحافر مكانو براهو
رافع قرني بي فوق لي سماي وسحابي
والبت ان عسل في الوجعة ميها اسبابي
ديل باكيات وراي دايرات يكسرن بابي
حالف باليمين زي الكأني صحابي
@@@
واريد الفي البنات سمحة وهدية رضية
واريد الفي البنات بتقوم من الدغشية
اريد ست الحسان مليانة طيب وندية
اريدك يا ام عدن وريدك
موووهض فيا
وبت في الدفعة واحدة وريدا والله هلكني
من دون البنات شوقا وقليبا ملكني
في النوم ما بتغيب ديمة بتخفف حزني
برجا بالسلام والله زي جوع بطني
وبت في الدفعة واحدة وبي غراما غرقتة
منها إرتويت ومن فيض حنانا شربتة
بفتش ليها في كل البيوت والحتة
شالت روحي فاتت وقلبي اصبح جتة
وبت في الدفعة واحدة وبي غراما سبتني
ما زي البنات بي القوة ست خشتني
من شدة بكاي اصبحت سرجا متني
احنس فيها لي شهرين عشان تخلطني
وبت في الدفعة واحدة وبي عيونا رمتني
ما ضليت معاها ولا طريقا هدتني
ومن وريتا في نص الارض جدعتني
غابت عني يومين بالفراق شلتني
وإتوكلتي قلتي الليلة إسمك ساجدة
يا النورتي قلبي وكل اماكني الخالدة
اديني الأمان برسالة منك واردة
بي شوقن متل شوق الطفل للوالده
السماني حسن محمد أحمد (ودالحوش)
» أفضل وأسهل وأكثر أنواع التجارة ربحية على الإطلاق أمان 100%
» بستـــأذنك...
» عاش من شافك
» كيف يفكر الرجل ؟؟ وكيف تفكر المرأه ؟؟
» قصيدة جديدة ........ دنيا
» طيارة جات بي فوق .......... قصيدة جديده لهاشم صديق .. حفظه الله
» عشة أم حجل - هاشم صديق
» هاشم صديق - ما جاب المطر بنزين