ضحكة الموجوع تبكي

الحقيقة حقيقة مرة
والجرح في بدايتو قاسي
والبواسيك في مصابك
ما بيستاهل تأسي
ولو حبيبك خان عهودك
ببقي خان شرف الأماسي
وقدر ما بتعرف تجرح
حقو تتعلم تواسي
وأعرف إنو الحب مذاهب
والجرح في العزة قاسي
وزول بحبك ما بخونك
وما بجافيك ويبقي ناسي
وديمة إتعلم تكون
إنسان مسالم وطبعو راسي
وأبقي ذي الطير حنين
وكون عطوف ورؤف مواسي
وأبقي إنسان همو غيرو
وبالحواليك أبقي حاسي
ما كتير تلقي السعادة
ولا العواطف شي وراثي
وأوعي تنسي الداري حزنك
وكان في جرحك زول أساسي
زول وحاتك عاني شانك
وجاك علي إيديهو جاثي
وياما ساهر شان عيونك
وكان لأشرعتك مراسي
الفرح بجي مرة واحدة
ودنيتك لعبة كراسي
أوعي تضعف يوم وتبكي
ولي عزول حذراك تشكي
ما دوام الضعف قوة وسرك
أحفظو أوعي تحكي
الصبر في الوجعة عزة
وضحكة الموجوع تبكي
والقدر لو دار تعاستك
بي إيديك قلبك بتتكي
ولو كمان قدرو السعادة
مافي زول بقدر ببكي
أبقي أكبر من مواجعك
وإحترم هيبة مدامعك
ولو حبيبك جد حبيبك
مهما يبعد ببقي سامعك
ومهما بينك وبينو أميال
ببقي حاسس بي مواجعك
هو الوحيد الأقوي منك
وهو البيزرف سيل مدامعك
وهو البكون أول مرافيك
لما تجتاحك مواجعك
وهو الوحيد القلبو عندك
وما بيقدر يوم يوادعك
هو الهواك عاش شان سعادتك
وهو الفضل طول عمرو راجيك
هو الوحيد الإنته عندو
وهو الوحيد الكان بناجيك
السهام طعناتا قاسية
وجرح قلبك هو البيضنيك
لو مسح زمنك مدامعك
قدر ما تضحك ببكيك
لو تخون تتخان مؤكد
ولو وفيت حبك بيوفيك
إنت كون أحسن عليهم
وأمشي في الدرب البيعنيك
لا يهمك قول عوازال
ولا تخاف من زول معاديك
الثريا إذا مرامك
إي خطوة أكيد بتدنيك
وإنته لو دائمآ بتضحك
مافي وجعة في يوم تبكيك
كون كذا النبت البيزهر
وعزتك بالعزة تغنيك
يا قلب حاول تصدق
وأقتنع وأنسي الجراحات
ما بتطفي النار شرارة
ولا بتشفي الجرح أهات
لامتين حتكون موجع
وسلسبيلك في المناحات
الطريق مفتوح أمامك
سوي ليك شان بكرة جنحات
حاول إتعلم تحلق
رغم الاف الجراحات
وأستمر حتمآ حتوصل
لو في بالك إقتراحات
إنته عارف إنو ليلك
ليلو طول في المناحات
والصباح دائمآ بيشرق
وياما كم فاتن صباحات
بكرة أجمل بي كتير
من أول أمبارح تأكد
إنته بس حدد مسارك
وأمشي في درب النجاحات
مافي فاشل بي السجية
ومافي ناجح دون صعوبات
مافي معجزة غير عزيمتك
راح خلاص زمن النبوات
يا ضعيف ما تكون أسيرا
ولا أسير الإحتمالات
ليه تعيش بينين وعارف
إنو بينك وبينا سنوات
الحزن حيظل معلق
بين لهاتك والمسرات
الفرح دون ما تكوس ليو
ما بجيك هيهات هيهات
أي حاجة مصيرا زايلة
وكل فرحة وراها دمعات
إحتمال يا قلبي تسعد
لو حفظت الإحتمالات
الغلط ما عيب وحاتك
عيب تصر علي غلطك الفات