وعدك رهاب

يعني نسيتي
ما بتتذكري
يوم ما وقفنا قصاد النيل
والكبري شهيدنا
يوم أبرمنا عهود الإلفة
وإنو نراعي ونحفظ ريدنا
يوم أقسمتي بإنك لي
وإتقسمنا الدم في وريدنا
وقلنا نشيل التضحية مبدأ
نموت فد مرة ويحي قصيدنا
يوم عينيك إبتسمت وضحكت
وكنا قصاد الكبري حبياب
يوم كلمتك عن مستقبل
فيهو مأسي وشوك وضرايب
وكم كلمتك عن أمالي
وعن أحلام في عالم غايب
جاوب قلبك إنو حنفضل مهمآ
كان يا غالي حبايب
وإنو هواك يا روحي بداية
وحبك باقي الفرح الآيب
وأنا صدقتك وشلتك ذاتي
وما قصرت عملت الواجب
وكنت بخاف من هجرك وصدك
وعارف إنو هواك مصائب
وفعلآ فأول عقبة قسيتي
سبتي قليبي يعاني لوحدو
وكل الكان بيناتنا نسيتي
ياخي حرام وين عهد الريدة
ووين الدرب الكنتي مشيتي
وين مستقبل كل أحلامنا
ياخ معقولة ده كلو نسيتي
ترمي قيلبي أسير ومعذب
وتنسي البيت الكنتي بنيتي
وتظلمي زول حباك وقاوم
وإنتي زمان الكنتي هويتي
بس في الأخر الله يسامحك
في المسكين الإنتي نسيتي
ولو في يوم حبيتك صادق
الله يجازي القلب الحبة
ولو خنتيني عشان حبيتك
يبقي الحب كان أصلآ كذبة
ولو بنساك ما كنت حزنت
ولا حلفتك ودمعي أنصبا
أنا يوم جيتك كنت مكبل
وكنت ضعيف وأسير في نكبة
ولو في قلبك ذرة رحمة كنتي
رحمتي فؤادي الحبة
وكنتي عطفتي علي أقلو
كنتي تحسي وترحمي حبة
لكن عمر الضل ما دائم
والافراح ما كلهآ ربة
ياها حياتنا وحالا الأشتر
يوم أحزان ودموع وخيانة
ويوم أفراح وهيام ومحبة
يوم الحزن صديق لي قلبك
ويوم أفراحك ياها الصحبة
عادي الحزن بقالي ملازم
أنا والحزن كأنو أحبة
وما زعلان منك يا غالية
بس زعلان من جرح الغربة
ياخ أنا بعدك ضقت مآسي
تشيب راس الطفل الشبة
شفت الحيرة وضقت النار
الهم والغيرة
وضقت مآسي عديدة كتيرة
إلا وحاتك لسة بحبك
وكل افراحي معاك أسيرة
وبحلم لسة بإنو مناسك
تلعب بين شطأن وجزيرة
وكل أحلامنا معاي موجودة
وحافظ لسة معالم سيرا
أسمرا والفستان الابيض
يوم الزفة وبكسي السيرة
وأول بت حتكون أمورة
تسرحي ليها شتات وضفيرة
وتملأ علينا حياتنا أماني
وتقرا وتكبر وتبقي سفيرة
وكنت وحاتك عارف إنها
بس أحلام حيسافر طيرا
ورغمآ عن أحزان الآهة
وعن تجريح الريد بالغيرة
حأفضل أحبك
وأوعدك إنو أحقق حبك
وأنجب ذات الطفلة مناسك
أسرح ليها شتات وضفيرة
وتقرا وتكبر وتجري وتلعب
وتبقى عشان أحلامي سفيرة