كل سنه وانتو والوطن طيبين

كل سنه وانتو والوطن طيبين وسالمين وتامين وماناقصين وموحدين وانشاءالله بلدنا ماتتقطع والله لو الابنوس خلانا حنزعل واهديكم البقصيده
لِمٌّوا الوطن بالحب ودالمامور
سويتو فَنِّكْ
القريض والمهجه جَنّكْ ..
وتاني تَاوَرْنِي الُهيَامْ
شَانْ عيونك ..
وشَانْ عصير كاكاوَّيْ لونِكْ
وشَانْ جمالك والقوام
الله يعِلَمْ مِشْتَهِيكَّيْ
ومِشْتَهَّي يوم إِشْتَهِيكّي
وليكيَّ مِتْقَرْيِّفْ كلام
مِشْتَهِيكَّي
ومِشْتَهِي أبنوسة فيكي
ومشتهي الفَدُو والزُمَامْ
ومشتهيك في قَدْلَه زينه
الله يِعْلَمْ يوم تجينا
تَقِدْلي زَيّْ قَدْلَ الحَمَامْ
بي مشيك الحَبَّه..... حَبَّه
والصدير القَامْ وهَبَّ
في جلوسك والقيام
هي المدافع شن تخلِّفْ غير ما تخَلِّفْ حطام
ما غريبه اصْطَفِيِكَّي
و أَنْشَدِه في الدنيا بيكيَّ
واهدي ليك أجمل كلام
نسأل الخالق يصونك
دي اللآلي الفي سنونك
يوم يِبُرْقَنْ في الضَلاَمْ
سِنِّكْ البَرَّاقَه قِبْلِى
مصَرَّتْ ثدي الغمام
والكلام اللَكْنَه فيهو
حلاتك إنتَّي تَغَنِّي بيهو
وفي شفايفك إبتسام
أُ مْ مَلاَحَه ..
الله أداكِّي السَمَاحَه
وإنتي تدينا السِقَامْ ؟؟
مخلوقه رَوْعَه ..
لوحه بين أبنوسْ وشمعه
شمعه تَرقُصْ في الضلام
وجيهك الأسمر وضاوي
نِنْ عيونك لي شَاوِّي
يا حلات نِنَّ الارام
أسمعيني ....
وهاك قصايدي عشان تليني
لأنِّي فيك مَكْتُول غرام
أصلِّي مِنِّكْ ..
حِتَّه من كَبْدِكْ ودمَّكْ
نُضْفَة أجدادنا الكرام
بالَمَحَنَّه
نوحد الوطن يبقي جنه
ايه لزوم الإنقسام ؟
و للوطن أهديكي فَنَّي ..
إنتي بَسْ بي لَكْنَه غَنِّي
رَطنِّي الصُول والمَقَاْم
ا لمُهْجَه عندي .
.بي حروفا السايله تَنْدِى
تغني ليك أحلي الكلام
ليك نَغَنِّي و إنتِ أَوْلى
بالمحنه نعيش في دوله
دوله حَافِيهَا الوئام
وتحيا أجيالنا الجديده
في رَخَا وسلام و ريده
في محبه وإحترام
ويِسْمَعْ العالم إذاعي
غنانا والرَقْصَ الجماعي
ويسمع الحان السلام
يليَّ هَلِلُّو للبريده ..
ولحِنُّو الغُنَا والقصيده
وشِيلُو صفقوا للسلام