نفاج

نفاج

مساحة للوصل ونفاج نفتحه..بيننا جميعا وعبره..نحكي.. نتواصل..نتعارف..نتآلف..لنكون معا..نهر الحياة الخالد

دخول

لقد نسيت كلمة السر

المواضيع الأخيرة

» أفضل وأسهل وأكثر أنواع التجارة ربحية على الإطلاق أمان 100%
الإثنين فبراير 02, 2015 6:27 am من طرف الأميرلاي

» بستـــأذنك...
الخميس يوليو 03, 2014 8:08 pm من طرف الشاعر السماني حسن

» عاش من شافك
الثلاثاء يونيو 17, 2014 3:16 pm من طرف hamadvip

» ابدأ دخولك بالصلاة علي النبي (صلي الله عليه وسلم)
الثلاثاء يونيو 17, 2014 3:11 pm من طرف hamadvip

»  كيف يفكر الرجل ؟؟ وكيف تفكر المرأه ؟؟
الإثنين يونيو 16, 2014 1:00 pm من طرف hamadvip

» قصيدة جديدة ........ دنيا
الإثنين يونيو 16, 2014 12:53 pm من طرف hamadvip

» طيارة جات بي فوق .......... قصيدة جديده لهاشم صديق .. حفظه الله
الإثنين يونيو 16, 2014 12:49 pm من طرف hamadvip

» عشة أم حجل - هاشم صديق
الإثنين يونيو 16, 2014 12:47 pm من طرف hamadvip

» هاشم صديق - ما جاب المطر بنزين
الثلاثاء يونيو 10, 2014 5:41 am من طرف عثمان تباكي


    مسدار القشاش .. الجزء الاول

    شاطر
    avatar
    ابراهيم الصغير
    مدير عام
    مدير عام

    عدد المساهمات : 213

    مسدار القشاش .. الجزء الاول

    مُساهمة  ابراهيم الصغير في الخميس يوليو 15, 2010 6:19 pm


    1
    يا لزّام تقايلي وفوكَّا يوت مُتسدِّر
    مخبور آبتعايفني إن أجيكَ مجدِّر
    الدّود آ بيبقى ضَبْعَة والوِرِيلْ ما بلدِّر
    تجي في القسمة يابسة ومن نداكَ تخدِّر
    2
    شقْ الخودة والدِرِع أب حديد بتخبرو
    وباعك في أم لفيخ العوبة ما بتعبرو
    الباسطني منك يا المَنَّجّضْ كبرو
    الشَّرك البقُبْضَ الفَيَلَه غمزة تهبرو
    3
    إتنين في فرستك أصلو ما بنتغالتْ
    يا التِعِلْ الملتْ مويتو الوَدِّينْ وسالتْ
    واحدين رفقتُن مِتلْ الحَكومة إن طالتْ
    آ بتقضي الغرد لكن بنسمعا قالتْ
    4
    وقِبْلِيكْ شالِع آ بْ شمَّة وسماكَ خريفْ
    تِيلادْ المُكوكْ عُقبانْ رِبايتكْ ريفْ
    هو موج سونامي يوم هدم صلابة القيفْ
    قصدو يقلدك ساعة معانا تقيفْ
    5
    ومِتلك يا نمر الزول بعاشرو ويخبْرو
    خي دَهَب المناصير فوق سماحتو وتَبْرو
    الزول بعد مايشقَى في الزّايله وغبينتو تعبرو
    شن بيسو خلاف ما ساكت يلزم صبرو
    5
    عن خيت الفجر يا مك قمز متكدِّر
    من غرداً لزوم الواجبة أقوملو مبدِّر
    الخلاني موجوع راس وجلدي مخدِّر
    هم واجبه أن رقدْبُو الفيل يقومْبُو مُودِّر
    6
    ومن الزارِدْني نَغَّاسات جزمْ لا يفضي
    شِلتَ الركعتين ختفه ومرّقْ مِتوضِي
    يا العوز الوَقفت علي وقفلك برضِي
    بختف روحك إن كتلك مِوجِّب قرضي
    7
    حميدت الله وشُكُرْتُو والفضيلة لباسْ
    والضِرعَات قواسي علي القواسي وباسْ
    تخبرنا المحاصات وكتين يجنْ عُبَّاسْ
    تريانين فعايل والجتت يباسْ
    8
    تسلم بِتْ عُمَر هي الجابت الفُرَّاسْ
    والحُرَّات بناتا علي العرض حرَّاسْ
    باقيه علي جناها من العَوَجْ ترَّاسْ
    دقت بُنَّها وستلي البِعدلْ الرَّاسْ
    9
    صِنِيت طليس وكِوَيرة ود لقّاي
    ومن حطب السنط مِتقعِّدة القلاي
    فنجان أب نِجَيمة وحُقْ بخور رَارَاي
    يا أم المَقنَّعة يحفظك مولاي
    10
    مراتاً توصي ومرة بالدعواتْ
    ومراتاً تلزْ تحت الحطب جمراتْ
    يا صقر البِرِزَّن ويا عشا البايتاتْ
    سدْ فَرَقة كُباركْ والوِلد ما ماتْ
    11
    وعهدي مع الصََّلاتَه أنا من خِلِقْ ما إتبدَّلْ
    رِضِعتَ مع الأُسودَة أمات ضفور وجدَدَّلْ
    الخلاني أخوجل في البلد وأتقدَّلْ
    عرض أماتي سابِل وتوب عقابي مسدَّل
    12
    والمركوب نمر عُقبانْ برمْتَ الشَّال
    وست ضرعات ونص قيفتهن سروال
    سديريتي صوف حِجبات وعود شوتال
    وحُقَّة وخيدرانة وفص عقيق وخلال
    13

    خاتم الفضة والتاج المَوَشَّى عقيق
    فضلك فوقي يالدخري البِفُرج الضِّيق
    بنوت شندي عز خلق الله والبرقيق
    فوكن تحكر الضامرة الوضيبها طبيق
    14
    مرقتَ مع الحَمَارْ قاصد رفاعة وغادي
    وبي سِبحت بقِسْ دليتهَ جت أورادي
    يا سيد الضَّريح الوسَّدُوك الوادي
    تجمع شملي بي الضامرة أم خديداً نادي
    15
    والدروب هي جت وِزِّينْ بنات العالي
    ومنهن قارِعني هم الزايلة شاغل بالي
    يا سيد المسيد أب قبةً بتلالي
    تجمع شملي بالسمحة البِتَسْتُر حالي
    17
    ولا موقِفْ رُفاعة البَي قفى المستشفى
    كارب الخطوة مركوز في السَّلطْ والنشفة
    خيت الحد رهيف بين الستر والكشفة
    مارضاني أم ضمير وأنا غير ألِمْ ما بشفى
    18
    وراكِز سيدو فوق سلّطَة ويباس وغباش
    مِسِيلو شبكْ حديد يتلولحْ اللطَّاش
    البُكسي النَّزلْ سنة التمرُّد هاش
    مكتوب في قفاهو وجبهتو القشاش
    19
    ألكعْ يا نمر دا أياهو بُوكسي رفاعه
    قدام فدّ نفر شاحننو ساهي بضاعه
    قشاش الدروب هبَّاش محل أوجاعه
    يا السوق الكبير يا خُدْلو فد نص ساعه
    20
    قام ود يحي نقر البوكسي حالاً دفَّر
    والقشاش طلق من الدَّرِب ما جفَّر
    شاق كُتر الجِنَيد الدَّربو كلو محفَّر
    خلا المكنة تقنت والحديد إتنفر
    21
    والضابطية جيناها وعليها خترنا
    ولا البنك الزراعي عجاجنا ودَّر أترنا
    في رغني وعزاز آ بشمة ما إتخترنا
    أكنا بننقرض إلا المِغتِّي سترنا
    22
    وناس عَيْ والمعوز وألبل المتابعه
    في الحنتوت تقرجِمْ والسَّعَوّنْ ناقعه
    عن ترس المقابر الفي رحمتو القابعه
    داسلو كلتشِ حالاً جاب نِمرتو الرَّابعه
    23
    وهديلك كم تِرِلات القصب ساتفها
    إلا الشيل تقيل والحمل كاتفها
    القشاش زنقها وتب بِقَى مكاتفها
    شال شبالو من جيدها التقول خاتفها
    24
    وراديهو أب نويرات جدع الخبار
    نضماً بنفز واحداً درادمو كبار
    ود ود طه عن ساعة النضم خبار
    وفي نيفاشا كم كم للكسور جبار
    25
    أخبار العيوش في النشرة والمطار
    ونصايب الخلوق وتقلب القطار
    مرات الغناء ناساً فياقى بطار
    والعجب المديح ساعة نقرة الطار
    26
    بي مصرو المؤمنة الشرايف أبالو
    النضم المقعد في المدايح قالو
    راعي الهاملة في الصي البنادي تعالو
    ختا مقامنا فوق راس القصار والطالو
    27
    أسوَدْ مِن صباح الله الصباح دامعفر
    وقلبي من الدغش مابي أم بسايط جفر
    رُحتَ بلا سبب ساهي أتعرط وأتنفر
    أشوف البضحك إبكي والمبارِك كفر
    28
    صنيت الفطور جابوها شُتَّها غادي
    وأب صَهَلِي ولِجَام إتوارى ليَّ مكادي
    القلب البريدك يا البشير متصادي
    زاع لي الخبر قبال يجيبو الرادي
    29
    تعال قُجْ الدَّسَاكي وفرتِق الحُوليه
    أرح هِدْ البلد كل زول إشيللو شليه
    إن قِرضُو الرجال حكمت عقابنا وليه
    ما بندي البشير للمحكمة الدولية
    30
    تمساحنا الختف تور الهنيشة وعامبو
    (سام السبعة) وِكتْ إخَفِسْ وإدلي الجامبو
    الضُرسْ البَرَك لبلدنا لا من قامبو
    بالني والنجيض آ بندي ناس أوكامبو
    31
    من هسي النقولَّك والنضم لي باقي
    دارعين العوج والشر شنقنا طواقي
    الضرس البهمك أمات مشاش ويلاقي
    ما بتحاكمو كان الدم بقالنا تراقي
    32
    أبا ليك بالكديسة ونحنا نديك تاجنا
    يبقى علي الكبر خبنا ويخيب إنتاجنا
    يا كامبو إن ركزّ ساعت يعلي عجاجنا
    خليلنا الطرح نحنا وخلاخل عاجنا
    33
    يالقايم سُنُط فوق راسنا ماكْ عُشِّيب
    مَصَعِي وهنقرابه وقج صوي ونشيب
    إن قامت البتوقد فوق جهالنا الشيب
    مابنديك وأنت ابيتا بي كوشيب
    34
    ود السِّيد القشَّاشْ هدا إتقبلها
    والحِلة الجِنَيدْ والعُكْ تقول سبلها
    حاسَينا العزيبة عديل بقينا قبلها
    يات من حلة جيناها أب زويق شبلها
    35
    حواشات صفوف ومستفات تراعه
    وأب عشرين كشف حال التقنَّتْ راعه
    إتصبقن تقول نسوان بكى الفجاعه
    في هالحالة يامن تب دخلنا رفاعة
    36
    ولا عند المدارس زي هَجَسْ بُكسينا
    ومن هالنقزي يا أبعاجات شوية رسينا
    بنوت المدارس قادر البيسينا
    زي عسكر مصر ساعت دخولن سينا
    37
    هيا بنوت رفاعة الزيكن محنَّا
    قدر ما تقلب أم قداد تزيدها مِحنَّا
    الزول من واحده فيكن أكان لقالو مَحنَّه
    عقباتن أريت الجدري كان إطحنَّا
    38
    وفي السوق الكبير آ مهدي ختا قطرنا
    إتقهينا تب عند الطريفي فطرنا
    إتبردنا عندو وجابلنا إتعطرنا
    نحنا بَرِضْنا عاد بي حقنا إتبطرنا
    39
    وإتلمو العرب جات الخليقة تسالم
    كيفن آب زرد إنشاء الله طيب وسالم
    ود حاج العبيد عتمان وود أم سالم
    جالبين الجزر واحدن مفقه وسالم
    40
    وأحمدو فوق نعم مبسوط وخيري موافي
    ما قت للكريم أديني قال لي مافي
    البتدغي عندي وفي أم خوار متكافي
    وفوكه تلات صهب ومولدة وعنافي
    40
    وما خلينا في أم قداد عقايب سيرة
    الكاس والمحاص والبطان والسيرة
    أم ديس والمسيد والنشوق والديرة
    أسياد كل شي وفوق كلو عندنا خِيرة
    42

    عقباتن بكيسي علي البحر ودانا
    ختى صفيتة بي صفحة الكتر حدانا
    حليل وكتين إبلنا محجبين وردانا
    بنقدل فوقها كان الله الكريم أدانا
    43
    ولا المشرع هداك عسكر مصر بارينا
    محرومين خلاس من السماح تارينا
    قدر الزايلة ما تدي وسماح تكرينا
    متل الشفنا فيك آ رفاعة ما بتورينا
    44
    وزين العزيبة مصاقر التراي
    والبنطون يخب في الموج مقبل جاي
    عند القيف سندته شوية عن ست شاي
    إتقهيت قبيل عِلاّ القعاد فوق راي
    45
    وعين المك تلقط في الصعيد والسافل
    والوزين فرادي ومرة مرة غوافل
    وقعت عيني في جدي البطانة الجافل
    البت متل الفرض ساعة تحوشو نوافل
    46
    والبنطون ركز بي سقالتو دقش القيفة
    من وش البحر ختفت سمومتو الزيفة
    وقفت بي طرف راسية وتقيلة نضيفة
    خدرة وكاربة ديسها وعن حشاها رهيفة
    47
    وزي يوم النشور شبو الخلوق في العالي
    والكمسنجي صاح فوق السميحة تعالي
    ها الساق المتبَّر والسدير العالي
    دا إياهو المبهدلني ومبشتن حالي
    48
    قصد صبقتني بت أم ساق شقيقة الخيل
    دارعة شنيطه بي صفحة وطوت منديل
    لتيبة الحقنة تتنى وعويدها طويل
    مداينه الشمْ وجيها وسارقة ديس الليل
    49
    وأتسارقته لامن تب وقفته حداها
    اتشيوم عليها البتلصف حداها
    بنوت البنادر شن بكونو حداها
    تاجوج إن بقت بالصح بتتحداها
    50
    مالقيت لي سبب أنضم ولاغي معاها
    خلاف ما ساهي زي بهم العناق أبراها
    هالجديه البتسرح في قليبي براها
    داقه رويحتي في الفندك عقب شاراها
    51
    يامسخِّر حديدك لي نبيك داؤود
    ويامكافينا من شر أم شراع والعود
    أنا والديسها كابي الضامره نيه عود
    نقضي غرضنا في البندر وبدري نعود
    52
    والقادت رسيني آ مك نمر في رفاعه
    ما بتنشاف عقب يامن تقوم الساعه
    إن شفت النضم خنقة وقنيت ومياعه
    توقد بالسجارة وتشرب الولاعه
    53
    وزي خمسين بنيه آ مهدي ولا زياده
    أم شلاخ معاهن والمندية ساده
    شايلات فوق سدورهن من لظى الوقاده
    والمعنيه فوكِّن جمرة خارق العاده
    54
    وقفت وسطهن يا مك وحات أسيادي
    زي جمل الصبق وسط البهم في الوادي
    رتينت عتمة الليل المكتم وهادي
    بقت نور وضوت لا مراكش وغادي

    55
    لتيبة سته يوم بعد الكديب والحشه
    من الطرفه جاد ليها الكريم بي رشه
    هالشافعه المتل بهم الخريف البشه
    فوقها غبينتي بي ناس روبي ما بتنفشه
    56
    أم ديساً مرَدَّف بي قفاها موضَّب
    يهابش في الكفيل ماهو القصير ومجضَّب
    أم خشماً سغيرون بي حلاتو مرضَّب
    القال شفته زيها في الخلايق كضَّب
    57
    الديس مندلق والكتوف مليانه
    والعينين نششاشيب تفضح الجبخانه
    في السدر البشابي ولا الردف غنيانه
    ياكين في الضمير عادمه اللضى وفلسانه
    58
    عقباتن قلب بنطونّها كاسر الموج
    يامن خته تقال حملو تب بالهوج
    أنا واللفعوها البي الدهب منسوج
    يختا دربنا هدا القاسي والمعووّج
    59
    نحمدو بالسلامة نزلنا في الحصاحيصا
    أنا والخاتى في الأرداف مطبق ديسا
    لتيبة حقنة الطرف المعلا تريسا
    كان شافها البشير يابه الحكم والريسه
    60
    قدلت فوق عدل زينها الرديفه ونيه
    البطحاني ديسها ومن وسط شكريه
    زي نخل الشوايقه منقحه ومسقيه
    حرة وبت الرجال الظن تكون جعليه
    61
    إخيت أبان صهيل المضمر هافها
    أيدي على الكتاب مافي راجل شافها
    أنا نضمي إنقطع عن مايقها وكتافها
    عنتر وبن زيدون ما بجيبو أوصافها
    62
    وقلته أناضمه إمكن علي ترقْ
    دقيت بالنميم طارين موَتَّر ورِِقْ
    متل ما بي تمام زينا وسماحتو شرِِقْْ
    برضك من نفورو ومن جفلتو حرِقْ
    63
    قدر جدعتلها النضم المغفى قصيد
    هبرت كفتي الكجامه مابيه تصيد
    بعد قندولها فرَّك قاوى للحصيد
    جفلت مني عاد إياهو حال الصيد
    64
    مراتاً رطانة ومرة مرة فصيح
    ومرات يابى لي تمرق غبينتي وحيح
    هيا جبل السماحة المابتهزك ريح
    يا ناضميني هسع ولا هسي بصيح
    65
    بندق فوق بحر مرقن نمايمي عليها
    تسرح في التراب متل الحديس مو ليها
    هيا الروح القبل طب ما إنطلع عاليها
    ليمك راح فقيرها وعمدتا وواليها
    66
    سلام آجدية الوادي المحدَّر سيلو
    يا أم عرقاً يبز أشراف قريش نسيلو
    نمراً من نمر فوق النمور فصيلو
    إن جاك شايلو شوق آ السمحه شن بتسيلو

    67
    ويابزيد ما غزيت ولا خيولك هاشن
    العنافي والدبزاوي في الصيات ولا بتماشن
    يا راعي الحمير في السهله ما بنحاشن
    والقانص النجوم بالحربه ما بتناشن
    68
    والنفس الأبت يا مك تعود بالخيبه
    متيامنه الوصول القادرة ماك داريبا
    عاد الليله مهما تبقى قاسيه صعيبه
    باصل حدها إن بقى للمطاح والغيبه
    69
    وأخدر كطعي ما غنيتلا نمة زول
    درعتك فقيرك تنضم آ أبوالهول
    وصفت الموايق والضمير والطول
    صرت وشها وقاتلي نم لا الحول
    70
    الحول مو بعيد آ بنيه باصل حدو
    والجمل البهيج إياني لباب شدو
    يات من نطّ من القاسيه نفض يدو
    قولت يا نمر بلقاني عن حد حدو
    71
    حكرت النضم خوجلت في الدوبيت
    وزت علي العبار من عندي مية بيت
    درعتك كطاعت ربي سيد البيت
    قبال ما أتم قاتلي ياخي أبيت
    72
    وضحكت...
    ضحكت لا الشرق قادر الله السيد
    وأنا في الساعة ديك الواجبه أسيلي مسيد
    زي نمر الحراشه نترته واقف سيد
    هدا ترى الفرق بين العبد والسيد
    73
    الله يجازي محنك يا المغير سادر
    من بحر الملح لامن تصل لا أم بادر
    شقيت البلد ضُهري وهويد وبنادر
    ما لاقاني متلك يا المسلط وقادر

    74
    وقلبت فوقي عينين التقول بتكاون
    وفتقت لي جروحاً تاني ما بتداون
    في الدين الحنيف الزول أكان بتهاون
    هن والكعبه عند الما بخاف من الكريم بتساون
    75
    بعد عينيها قلبت لي صفحت أحوالا
    حفيدت المك نمر جنيات دكين أخوالا
    الشكريه عند الندهه سند المايلة والأباله
    وعندها في البطاحين خيت عقاب وأصاله
    76
    وقالت تفتح الباب القبيل ما إنسده
    وإنسندت فريع سوت ضراعها مخده
    يا البتبرّدولك محرمين من جده
    لمني بيها بعدين السماء الإنقده
    77
    حارياك من قبيل آ ود عم باريني
    عرفت من قبل ولا بتشبه فيني
    نوارة رفاعه إن كته ماك داريني
    حارسني السماح من راسي لا كرعيني
    78
    الدار في رفاعه وتاني عد لا شندي
    بت حرة وكفى متل المنسج هندي
    إن درت الرفق زندك بجاور زندي
    إلا ان درت شين آ ود عم موعندي
    79
    كدي وناضمتها ومتلي النضم ما بكوسلو
    خبّارن بفك عقد العوج في أوسلو
    بنتكِّي العشار لي ضيفنا ما بنعوسلو
    كايدنا بنقرِّنلو الحديد وندوسلو
    80
    ها البارياك دي روحي المن ساعة شلتيها
    وعرفت من قبل كيفن بكون ناسيها
    متلك ما بظن آ لضامرة ليها شبيها
    شبهك في السماح الساها ما بتنيها
    81
    حبابك تسلمي آ الضامره العزيزه وحره
    وانا بالحق منسل من خزاعه ومره
    في السيال وحاتك ود قبايل غره
    في دارنا الاسد زي الجداده وبره
    82
    من شندي الأهل يا الحره والمكنيه
    ود ود أبنعوف أهلي البخلفو الكيه
    مطاميرهم مقلعه لي البشيلو تكيه
    وكت الراي كمل سوّها بالزنديه
    83
    أدبرة والعبيدية الدرب لا الباوقه
    في الترى والمحل جت البيوت متضاوقه
    لا كلي والجوير الروح بقت متشاوقه
    نمور أرواحنا إلا علي الأهل متناوقه
    84
    شافعنا البتربل وبمسك الحواشه
    بقابل أم جنزر البجض رشاشه
    نحنا أولاد نمر نجض عساكر الباشا
    خلف كيها وما ساها (زي نيفاشا)
    85
    كم شقينا هناشه ودقشنا بطيره
    كم فوق صي عرضنا وفي أم دوي وقصطيره
    ضقنا سلقنا مقدتها وشوي حنيطيره
    ضقنا الدود موالفنو وحلبنا الطيره
    86
    مفروزين وكت يعلا العجاج ويعفر
    ومهيوبين وكت ما الخيل تهيج وتدفر
    سيوفنا مجربات هبشة قفاها تسفر
    شماخين وحاتك فوقنا عزة تكفر
    87
    شعرة جلدي كلبت آ نمر سارقني
    ما تفركني في عودي الصبر ورقني
    إتبارد قليل نارك كدي بتحرقني
    متيامنه الكريم بي نيه ماك فارقني
    88
    والزنود بقن من حيستن جيران
    وفي الحساد ورانا متقبه النيران
    إنّفخن ودايجي وإنجعصْ بطران
    شفته رقبتي شيخ والدنيا جت حيران
    89
    وحيداً يوسوس في إضينة خيو
    قال في معنات حديثو وفي قلبتو وطيو
    هادا العريبي الدرع أم سماح في غيو
    ما أخير ليو يشوف بهمو وصرارو وعيو
    90
    قصد طنشت نضمو وكت كرشتو عنيه
    وانا سيد خسلات تلاته مركزات وقويه
    بتخاته الهويّن وما بقع في الخيه
    قلب مكجنو الولد اب مشيتاً نيه
    91
    وحيدتن رهيفه مجربنه ومسلوله
    كملت من لحيمة الزايله تب مغسوله
    نضمت فوق حديس لو بخصها ولو هولا
    شن قدّر متيلك هالغزيلة يطولا
    92
    تب أصبحنا بي الله وعقدنا حبال
    يا موشاًً منقر زي قفى الغربال
    في الداره أم صققّر مابتخشي البال
    تحلقي يا الدغش ما يجيكي سيد شبال
    93
    خاتي عليك أكان أداك ها الوش المطرم بوزو
    شبهك فنه في الدهر الحمار ما بحوزو
    قردة طلحة الصي النبيقه تعوزو
    ود تمار أكان شافك بضاير موزو
    94
    وخترنا علي الدرب إلا البتختر زلت
    عترت فوق حجر قاسي وصعيب مصلط
    مرقت شهقه لا الحلقوم وعقب أتدلت
    أنا أخو (نضال) خلاص عُقدة نصايبي إنحلت
    95
    تسلم ختاك الشر بعيد لا يطولك
    ويختى جميع من في عقابك وعولك
    بتساعل عليك آ خي تفوق مسعولك
    منو الشهقْبها ومرقت غسب في قولك

    96
    ساهي سعال وحات الشيخ يمين مي غيره
    لا تكون بت أعم ليك قبل في الخيره
    شايفاك إنشهق بيها وقصد فخِّيرا
    حتي نا بت رجال آ خي ونفسي كبيره
    97
    (نضال) آ بنيه أقسى من القصيد وأوصافو
    مهما شبَّه فوق صوف السنام وصافو
    هي وتومته النهي يا أم ديس سعت يتصافو
    شن خسَّانا في الشتو النضم والصافو
    98
    حره وفنجريه وفوق أخوها حنينه
    ميها رهيفه متل العود وميها بدينه
    رافعه رويس أخوها وضاويه لينا رتينه
    كل ما يخفن البنوت نشوفها رزينه
    99
    إتنين فوق رويسي وفوق تلاته رجال
    ما مرقت تكشكش ودقت الخلخال
    رزانه وتوب عفاف وسماح وسترة حال
    شرفت القبيله من العم لا خال
    100
    نضال الشم وكت تبقى الضلمه رفيق
    نضال فسحتنا وقت الواسعة بينَّا تضيق
    نضال الحق محققه في الحقيقيه حقيق
    عشم داخرنو للسغبه ونشاف الريق
    101
    كفاك شكرتها وقدامنا باقي دريب
    وتسلم خيتك حاشاها من الريب
    الكمون أكان ببقالي هسى قريب
    اكنت ببخرا من الحسود ومريب
    102
    وشقينا الفراريش لا الظليط ووقفنا
    بضاع الصعيد المتلهن ما شفنا
    بالكيل والوزن تلقى العبار والحفنه
    نجي لي أهلنا صادين منو نملا قففنا
    103
    (بص أفراس) وقف حاسانا شخّر وفوفا
    بالديزل مكنتو معنفه ومعلوفه
    جواهو الخلوق آب شمه ضاربه كيوفا
    تحمد سيدها لا لباب ولا مخلوفه
    104
    كرسيين سوا وعقبان رفعلو تلاته
    وأدونا التذاكر ستها في مخلاته
    أليلت جلد زرقه وتلالي حلاته
    بس عشرين جنيه لا حجه لافي غلاته
    105
    دوَّر وسالو واحد واتنين وخته تلاته
    وبص أفراس خرت كل المدوره فاته
    واحدات (مارتيدس) واحدات هوينات (تاتا)
    البقدر بسوق إلا البخاف بتخاته
    106
    وعدلت قعتتا وسرحت جديتي مساااافه
    قلبت لي حديسن كلو زوق ولطافه
    الشافعه أم سديراً شبَّا فوق أكتافه
    بتتر بالضمير وبتسدي فوق أردافه
    107
    في الأفرنجي تنضم وفوق فصيحه ودارج
    وفي كافه علم السمحه شابه مدارج
    القطع العشم في الزايله والمتدارج
    كايس لي طريقتن تبقى ليها مدارج
    108
    نضمت في الحكومه وجابت المسدار
    في المك والرئيس الباشا والسردار
    في الدين والفلك كسرت عقيق وعدار
    أوسلو وكوكدام أم خفه والكدار
    109
    حلبت وصررت وراحت الحوكاره
    لعبت بستليشن وساقت الترتاره
    الروك آند رول الوازا والنقاره
    شفت الريكه بدري وحلقت في الداره
    110
    وفي وسط الحديس سكتت ظنانه وشك
    ورجيت نص عمر عقد اللسان تنفك
    إنفك اللجام وسمعته حسو جلك
    أصيح للمك منو؟؟ ولا أقول يا مك
    111
    وأدتني إسمها وحفظتو خمسه حروف
    أعلا علي السما وأخدر مندي جروف
    الهاكعه المهو أم تنايا ودوف
    ليك بتكوها حرارة التكنها خروف
    112
    والزول البريدو انا ما بجيب سيرة إسمو
    محور كيو في الخاتر مخلف وسمو
    العجب العجيب إن سوى ليك فر بسمو
    أمر الفي الحبل بي نظره منو بحسمو
    113
    قاتلي الصداقه آ مك متين نوصلها
    شال الغي رويحتي ومن جتيتي فصلها
    حلال الدرب وريتها جت فصلها
    قبال لا أتم ألقى البرز حصلها
    114
    الحله الصداقه وابفروع والكوع
    والبنده عليهم في المحل ملكوع
    والشاقه المهو والفي السهل هكوع
    ساكت في مراحن يا أم سماح سكوع
    115
    قنب الحلاوين أهلي البتكو أم دوف
    الله أداهن إلا من البخل والخوف
    بلفو الواقعه عن ساعت حرقت الجوف
    ومطرقهن براها تسكت القرنوف
    116
    ودخان مصنع السكر مسيلو ضباب
    ويا أهلي البطاحين الشرافه حباب
    كان الزايله بالخاطر تجيك في الباب
    أكت باخد سنيدة شويه في الطالباب
    117
    حبابك يا أب عشر إنتي الحنينه وجاره
    وكفاك في الربح (بت الخليف) تجاره
    يا بلد البخمجوها أم صياح وعجاره
    ركّز في المحاص وقت الخيول تتجاره

    118
    والقباب هديلك قبه عاقبه القبه
    يناطحن في السحاب تقوى وصلاح ومحبه
    ها النضم البتاخدو الريح سويعت الهبه
    مهما أحكرو في وصفك قليل وحبه
    119
    من عند المشيرع لا المسيد والسوق
    هورك في القلب ما بدفنن واسوق
    أنا الكتفني غيها بي المسد موسوق
    خالف ليمها في الزرقه وعيونها تسوق
    120
    حجة وصوم سنه في دير هواك مي عباده
    يا دار حرقة القلب الخرقبي العاده
    تسعه سنين قضن ماسكلهن عداده
    غيك نارو يا هسع توج وقاده
    121
    أحيييييي الفرقتك جديه ما بتملاها
    علا المولى بي رحماتو يتولاها
    علي الشرع فروتو وفي البحر دلاها
    ناذر لي عقدتك قبه كان حلاها
    122
    شفته سماح فرنجه وليم عرب وبرابره
    وضقته مجال مع بنوت ملوك وجبابره
    الراكبه السماء والملازمه الجابره
    واحد عندي بعدك يا الجفلتي مكابره
    123
    وبعد فرقتنا عقبان مغسه ما بتقنت
    واحده الزايله عندي إن سكلت وإن غنت
    تركت الهبه ليها من الصعيد وإتْنّت
    شربت ريدي بكري إتكيفتبو وتنت
    124
    ود الماجدي ودى علي أم دقرسي خبرنا
    وشوق أم زين خلاس خنَّق علينا عبرنا
    بصيصاً كان بصابق فينا منو هبرنا
    واحدات زغرتن ونحنا الرجال كبرنا
    125
    عسكور المرور أدو البسوقو إشاره
    وقف وناضمهم ضحكوا وغمتلو صراره
    أنا والقاعده جنبي الغية ما بتضاره
    قالت فوق قصد غايتو المعيشه بصاره

    (هذاهو الجزء الأول من مسدار القشاش الذي يصل محطته النهائية عند مدينة الباوقة في البيت رقم 3312)
    avatar
    طارق عبد العزيز
    عضو نشيط
    عضو نشيط

    عدد المساهمات : 34

    رد: مسدار القشاش .. الجزء الاول

    مُساهمة  طارق عبد العزيز في السبت يوليو 17, 2010 12:25 am

    قمة الابداع والله ..
    جميل المسدار وما كتير علي محمد الحسن ابنعوف ذلك الرائع الذي لم نكل يوما من متابعته في المنتديات والفعاليات الثقافية بالجامعات بل اصبح واحدا من عوامل انجاحها
    له التحية ويا ابراهيم منتظرين المزيد من اعمالة واشعاره
    وسيرة ذاتية تكون مثبته في مكتبته ليس من اجل التعريف به فهو اشهر من علم علي رأسه نار
    ولكن لنشعر اننا في بيته ..
    لك الود
    avatar
    روان
    عضو مشارك
    عضو مشارك

    عدد المساهمات : 115

    رد: مسدار القشاش .. الجزء الاول

    مُساهمة  روان في السبت يوليو 17, 2010 12:33 am

    هو الجمال في ابهي صوره ..
    رائع المسدار و لا يقل في روعته عن مسدار الصيد او المطيرق او الهضليم او الصباغ
    محمد الحسن ابنعوف شاعر متمكن حقيقة بل هو امير الشعراء الشباب الان
    احتفظ له باشعار كثيرة المسدار واحد من اعماله التي اقرأها دائما
    شكرا ابراهيم وانت تزين المنتدي ب محمد الحسن ابنعوف
    والتحية له اينما كان
    avatar
    نورالدين
    مشرف
    مشرف

    عدد المساهمات : 261
    العمر : 45
    الموقع : مروى

    رد: مسدار القشاش .. الجزء الاول

    مُساهمة  نورالدين في السبت يوليو 17, 2010 1:19 am

    مسدار جميل لشاعر كبير
    واصل ابراهيم نحن متابعون
    avatar
    طارق عبد العزيز
    عضو نشيط
    عضو نشيط

    عدد المساهمات : 34

    رد: مسدار القشاش .. الجزء الاول

    مُساهمة  طارق عبد العزيز في السبت يوليو 17, 2010 1:43 am

    في انتظار باقي المسدار
    تحايا وحب
    avatar
    ابراهيم الصغير
    مدير عام
    مدير عام

    عدد المساهمات : 213

    رد: مسدار القشاش .. الجزء الاول

    مُساهمة  ابراهيم الصغير في السبت يوليو 17, 2010 1:47 am

    شكرا نور الدين ..
    شكرا طارق
    علي المرور الجميل والاهتمام
    بعد انضمام الشاعر نفسه لنفاج لن ينقصنا شئ ..
    كل اشعاره وابداعاته
    كل ما يخصه
    من لقاءات مع اجهزة الاعلام المختلفة ستكون هنا في مكتبته
    مرحبا به في بيته نفاج
    وكلنا شوق لمعانقته علي صفحات المنتدي
    وجاي بي باقي المسدار
    انتظروني
    avatar
    ود الحوش
    عضو ممتاز
    عضو ممتاز

    عدد المساهمات : 97

    رد: مسدار القشاش .. الجزء الاول

    مُساهمة  ود الحوش في السبت يوليو 17, 2010 4:13 am

    شكرا اخي ابراهيم انا بضم صوتي للاخوان القبلي
    واطالب بالمزيد من شعر الاستاذ محمد الحسن ابنعوف
    في الانتظار
    فائق تقديري
    avatar
    ابراهيم الصغير
    مدير عام
    مدير عام

    عدد المساهمات : 213

    رد: مسدار القشاش .. الجزء الاول

    مُساهمة  ابراهيم الصغير في السبت يوليو 17, 2010 4:49 am

    ود الحوش كتب:شكرا اخي ابراهيم انا بضم صوتي للاخوان القبلي
    واطالب بالمزيد من شعر الاستاذ محمد الحسن ابنعوف
    في الانتظار
    فائق تقديري

    ود الحوش سلام وشوق ومحبة
    الان الشاعر محمد الحسن ابنعوف واحد من اعضاء نفاج ..
    ولن يبخل علينا بروائع اشعاره ..
    لك الود

      الوقت/التاريخ الآن هو الإثنين نوفمبر 20, 2017 7:24 pm