النص
سمعت صوتك فى الأثير
من الدغش بنده بقول
أصبحت كيف ..؟
فكرت قُت حلمان أنا..؟
وقبلت لى عالم مخيف
عالم مشبع بى أساى
وأشباح بحر ماليها قيف
والطير يزغرد فى الصباح
ماحزنو مات فى ليل وزيف
قنّبت أعاين فى الصباح
جرحى المغور والنزيف
هدّ العمير الباقى لى
أنا غيرك إنتى حياتى كيف ؟
عبره وعذاب.....
أحلام سراب.....
عمرى الودر قول يالطيف
كل الدِمُوع النازله شوق
كُل المآسى الحولى طوق
شايلك تزاكر لى سفر
حزمة شعاع قبل الشروق
ردّد صدى الصوت القبيل
قال لىّ هوى أصبحت كيف..؟
قال لىّ هوى أنا ماحلم!
عاين عديل أنا فينى طيف
كورك شديد أسمعنى هوى
أحسن تقيف..
حكّيت عيونى من النعاس
رتّبت باقى الذكريات
عاينت لى تالا السحاب
كان شفت طيف...
طيف المعذب بيو سنين
قُت ليهو كيف..!
نزلت دموعو على رزاز
قال لى تمام ! بس إنت كيف
قُت ليهو ما زيك أنا..
زىّ اليباب راجى الخريف
وأشواقى ليك ماليها حد
شوق المهاجر للوليف
قال لىّ إتصبّر شوى
أنا بكره جاييك الخريف
والله من فُتّك مشيت
حيران أردد هل؟ وكيف؟
والله زيّك فى السهاد
راجيك تظهر عندى طيف
أرجوك لا تقول لى نسيت
أنساك لو ينسى المطر
أصل السحاب المِنّو جا
أنساك لو ينسى القمر
عرس النجوم والبهرجه
قُت ليهو عارفك زول أصيل
لكنو شوقى عليك غلب
خايف مواعيدنا الزمان
ننساها فى عالم صعب
عالم موشح بالفراق
ما قدّر البيناتنا حُب
قال لىّ خليك زول أصيل
عمرو التراب ما غيّر أشكال الدهب
ردّد صداهو على كتير
لكن خلاص الصوت بِعِد
غطاهو منى شروق شمس
ورجعت لى عالم أساى
نزلت دموعى على الأرض
وقعدت أردّد فى غناى
أنا بكره جاييك الخريف...
» أفضل وأسهل وأكثر أنواع التجارة ربحية على الإطلاق أمان 100%
» بستـــأذنك...
» عاش من شافك
» كيف يفكر الرجل ؟؟ وكيف تفكر المرأه ؟؟
» قصيدة جديدة ........ دنيا
» طيارة جات بي فوق .......... قصيدة جديده لهاشم صديق .. حفظه الله
» عشة أم حجل - هاشم صديق
» هاشم صديق - ما جاب المطر بنزين