ابراهيم الصغير الجمعة يونيو 25, 2010 4:53 pm
استاذ مصطي سلامات ..
واستأذنك في نشر هذه القصيدة هنا ..
أمانه زمنَّا ياما كان
مصطفي عبد الماجد المأمور
إسكندريه 1977م
مباراه مع بعض الشعراء أن نكتب في نموذج سودانية زميله إسمها
( بت الِمِنى) ربنا يطراها بالخير و هذا دلوي. (المدخل من الشاعر )
النص
لما نعود لأوطانا
ونعيد أيامنا والتذكار
علي أولادنا وأحفادنا
حنحكيلهم عن الأيام
وكيف عشناها في صبانا
وكيفن كان دربنا طويل
وكمين فيه رَتَعْ الريل
مها وظبيات وغزلانا
حنحكيلهم عن الأيام
لما الشَادِّي وَتَرَهُ يِرِّنْ
وينزف نَغَمُه ألحانا
وكان شهرينا عشره جنيه
وكان الحَالَه سَارَّانَا
نأجِّرْ شقه قَدْرَ الحال
وحالنا الفينا بغبانا
ونَدْفَعْ مِنَهِّنْ للميز
ونَكْرِمْ كل من جانا
وفينا المِنْ همومه كتير
نقاسم هَمُّه شِرْكَانَا
وكان رابطانا خوه ودين
ودائما كان رباطنا متين
وطِيبْةَ النَفْسِّ رابطانا
ورغم تَنَافُرْ الأفكار
ديما الحارَّه لامانَّا
فينا الكان شجاع وبَطَّلْ
وكم بي مواقفه هَزَّانَا
وفينا الكان زعيم وشجاع
وحبيناهو حبانا ..
وفينا الكان روائي أديب
وفَضْلِ فنونه عمانَّا
وفينا الكان غناهو دوام
علي امْزَاجْنَا وأهْوَانَا
وفينا الجايِّ هَاجِّي شديد
وقضي سنينه بهتانا
وفينا الجانا زول الله
ولمن فاتْ مولانّا
وعندنا كان بنات طيبات
أمانه زَمَنَّا ما كَانَا
نديات زيّْ نَدَي الإصباح
وطيبات زي نوايانا ..
وما شَيّْ كان جديد فيهن
ده أصلاً في سجايانا ..
وكان القلبه فينا رهيف
يقضِّي سنينه ولهانا
وكنت أنا الرهيف القَالْ
سحابِّي الشَّالْ ..
مَطَّرْ كله (سوزانا)
(وسوزان) في بنات شِعْرِي
جميع من كانوا سلطانا
وربنا أدري بي حالتي
وهو العَالِمْ بلايانا
وعارِف كل جَهْرَ القول
وبِعْلَمْ بي نوايانا
لا بْنَنْهَكْ عروض الناس
ولا بنسوي بهتانا
إلا الشيء الجميل وبديع
بِنَتْقِّنْ وصفهُ إتقانا
وما بنقول كلام ساكت
شِعِرْنَا نجيبه برهانا
أسمحو لي أقول قولي
و قالوا نقول في سودانَّا
نموذج من بنات بلدي
جمال و كمال و إنسانه
أول مَرَّه شفناهو
حيناهو حَيَّانَا ..
وكانت إيده قُطْنَ النِيلْ
طرِّيهَ وبرضو دفيانه
وشِّدَة إيدا ما لوينه
وراحتا فيها نديانه
جاني شعور بأني كَسَرْتَّ لي بَنَانَا
قال (اهلاً) ..
نَسَّي الدنيا وأحزانا
وما زَوَّدْنَا من أهلاً
وسَبَكْ القافية وأوزانا
* * * *
وأقول ليك إنت يا (محمد)
وإنت الزِّي ولهانا
أكمَا جِبْتَّ فيها كلام
وفَاقْ القبْله أوزانا
تَوَّلعْ في قليبي النار
وتَصَلَكْ إنت نيرانا
* * * *
أسمع قولي يا (محمد)
وطبعا شُفْتَ (سوزانا)
لو (سوزان) بِقَتْ الشمعه في قلبي
ومولعه فوقه نعسانه
تبقي الجايه من بلدي
مَفَجَّرَه فيهو بركانا
ولو (سوزان) بقت تهجين
وصَادَتْ قلبي سرعانا
شيل الزين وخُتَّ الدَّالْ
تكون الكلمه سودانا
ياها سِمَاتْنَا والخُدْرَه
وياهو تراثنا وغنانا
وياها (مهيره بت عبود)
وسط الدَّمْ تَضُرْبَ التُّمْ
تغني حماس وطربانه
وياها فلانه بت عمي
وهي الفي بعادا شاويانا
وهسَّعْ تلقي عِزَّ الصيف
تَقُشْ وتْرُشْ في حيشانا
وتَصْحَي فَجُرْ تسِّوي الشاي
مَنَعْنَعْ و فيه قُنَّانَه ..
ولما تْسَّوي ليك تبيخْ
حتاكل و ما حترجانا ..
حليلك بِتْ مُنَاي و غُنَاي
حليلك إنتِ يا فلانا
إيه (سوزان) وإيه تهجين
سِيبَكْ من خَبَرْ كَانَا
وشوفوا أصالة التاريخ
سيوف مرصوصه أجفانا
تراثنا قبيل ... وسنَّ الفيل
عَاجْ بيضِّوي أسنانا
ده الليمون..
وسمرة لون ... وطيبة أَرْضِّ لامَانَّا
* * * * * *
وأسمحوا لي أَتِمْ قولي
عشان ما تَطْرُوا (سوزانا )
لاَمِنْ تانِّي كَلَمْتُه
وسمعتَ
حديثه أشجانا
لقيتا بسيطه في الكلمات
لقيت أخلاقا إنسانا ..
كلاما رصين ... كمان موزون
تقول في خشيما ميزانا
وصوتها جريس ..
تَحِسُّه حَسِيسْ ..
لأَنّه أصيل ورنَّانَا ..
وليها عقيل رجيح وفسيح
وليها مبادئ ..
مؤمنه بيها إيمانا ..
وأسمحوا لي أَتِمْ قولي
عشان ما تَطْرُوا سوزانا
لو (سوزان) بِقَتْ تهجين
وشايله خليط من الدَمَيِّنْ
من الإهرام ويونانا
فلانه الفونج ..
خليط من زُنْج وعربانا
لونا قميح ..
فيِّ عيِنِّيكْ جميل و مريح
مِنِّور (مصر) يوم جانا
وبرضو تقول لي يا (محمد)
تاني أغني (سوزانا ) ؟؟؟
الثلاثاء مايو 22, 2018 4:35 pm من طرف ابراهيم الصغير
» أفضل وأسهل وأكثر أنواع التجارة ربحية على الإطلاق أمان 100%
الإثنين فبراير 02, 2015 6:27 am من طرف الأميرلاي
» بستـــأذنك...
الخميس يوليو 03, 2014 8:08 pm من طرف الشاعر السماني حسن
» عاش من شافك
الثلاثاء يونيو 17, 2014 3:16 pm من طرف hamadvip
» كيف يفكر الرجل ؟؟ وكيف تفكر المرأه ؟؟
الإثنين يونيو 16, 2014 1:00 pm من طرف hamadvip
» قصيدة جديدة ........ دنيا
الإثنين يونيو 16, 2014 12:53 pm من طرف hamadvip
» طيارة جات بي فوق .......... قصيدة جديده لهاشم صديق .. حفظه الله
الإثنين يونيو 16, 2014 12:49 pm من طرف hamadvip
» عشة أم حجل - هاشم صديق
الإثنين يونيو 16, 2014 12:47 pm من طرف hamadvip
» هاشم صديق - ما جاب المطر بنزين
الثلاثاء يونيو 10, 2014 5:41 am من طرف عثمان تباكي