النص
كل ماالهموم تعصر
قاليها لاتخافى
لاتشيلى هم بكره
بكره الصباح ابيض
بكره الحزن مافى
بكره الخزين إكبر
نصبح كمان اسياد
والدخرى فينا ملك
ذى كل والد كان
همو الكبير ولدو
كان عمنا الصديق
همو الكبير أحمد
والحاجه بت عدلان
عدت معاهو المُر
قاست مع الصديق
رحلة عذاب وفقر
كل ماالهموم تعصر
شان الوليد تصبر
بتقولو لاتمرق
عزَ الهجير والحر
ماالوالده صادقه شديد
بتخافلو من الشَر
وأحمد كمان طايع
مارد ليها امُر
مرت سنين وأيام
وأحمد خلاص ازهر
كمَل دراستو هنا
داير يقرأ فى البندر
والحاجه بت عدلان
نزلت دموعه مطر
بين الفرح والخوف
من زحمة البندر
كان بى مرادا تقول
من عينى مايرحل
ماأصلو ليها وحيد
كان فيهو مابتحمل
إلا الغدر مكتوب
حتَم عليهو سفر
بيغادى حاج صديق
قالد خلاص البر
حضن الجنا ويبكى
حمد الاله وشكر
فوق الجنا الناجح
الجابو فوق البر
وأحمد كمان مبسوط
كان بالنجاح اكتر
قام عمنا الصديق
باع القصب والعيش
وآخر عتود اشقر
ساق أحمد الدكان
يعزل هدوم وعطر
والحاجه بت عدلان
باعت سفير الفول
واخدت كمان حاجات
من ضمنهن سكر
أحمد هناك بضحك
ياحاجه ماممكن
انا اصلى راحل وين ؟
بتقولو لاتنضم
امكن يجيك سهر
وقفت من الحاجات
نادت وليدا قريب
ودموعه تتقطر
قالتلو أوع جناى
اوعاك تعدى شهر
قالتلو لاتطول
عارفنى مابقدر
من غيرك انت اعيش
عارف الزمن اغبر
بتخيلك ولدى
عزَ الهجير والحر
تقدح تلف تايه
فى زحمة البندر
كان عمنا الصديق
نزلت دموعو تخر
ماعمنا المجروح
كان شاهد المنظر
قال ليهو ياولدى
لايغشك المظهر
لازم تكون ثابت
وقت المحن اكتر
قال ليهو يابه عفوك
وانا بى عفوك بكبر
قال ليهو عافى عليك
تب لايصيبك شر
تب لايخشك هم
بسقيك من دمى
كان باقى لى عمر
وأحمد خلاص راحل
من بكره للبندر
رتب هدومو خلاص
الريحه والسكر
والحاجه بت عدلان
خايفه الشمس تظهر
مابكره أحمد ماش
كان بكره فيها سفر
بكره الشمس طلعت
واحمد خلاص راحل
والحاجه بت عدلان
مامصدقه الحاصل
كيف ياجناى تفوت
دابك بقيت راجل
يايمه زيدى عفوك
عفوكى ماساهل
واحمد خلاص سافر
قدامو كان البيت
أوضه وتكل من طين
زيرين وشدرة نيم
ماسوره جنب الباب
راكوبه شان الحر
صوت امو فى المغرب
وابوهو لما يصر
واحمد خلاص ابعد
خشا المدينه عصر
وزحمه وخلوق بتلف
عربات ملانه بشر
المويه بالدرهم
والحاله مابتسر
يومك فطور وعشا
شاى الصباح بالغب
مرات تعدى شهر
واحمد اصيل ود ريف
لاكلا لا اتغير
شايل طبايع الريف
الخلقه والمظهر
رغم الولد طالب
كان مره جيتو غريب
بحلف عليك تفطر
كل همو بت عدلان
الجابتو البندر
الكان حداها خليل
لما القمر يظهر
داير عشانه يكون
فوق الوزير واكتر
كل مايعصرو الشوق
بتذكر البلدات
وابوهو جاى عصر
شايل معاهو القش
الخُدره والقنقر
تعبان وكان مبسوط
ماهدا حيلو فقر
واحمد يذيد اصرار
فى كُل يوم اكتر
مرت سنين الهم
واحمد خلاص كمَل
باقيلو ذى شهرين
والحاله تتحول
من العذاب والويل
لى زول حواهو امل
وصل البلد خبرو
والحاجه دايره تطير
وشافت خلاص احمد
فى الحله قادل أمير
حلحل مشاكل الناس
قاسم هموم الغير
ساق المدينه تحج
والحاله فى تغيير
اليوما ديك احمد
قاعد مع الاصحاب
والدنيا كانت ليل
قالولو بكره نفوت
نعرف حدود النيل
ننسى العذاب الكان
امكن نلاقى شليل
واحمد يمين سباح
ذى الكلاب والخيل
الا البحر غدار
ماشفنا ليهو خليل
مهما بقيت عوام
لابد ليك يشيل
وصلو البحر بدرى
واحمد نزل أول
تبعوهو بالتهليل
قدف يمين وشمال
قايل بيجارى النيل
الا الغدر كان جاك
عزَ الشمس والحر
بتشوف نجوم الليل
ضربت خلاص احمد
الخاينه بت النيل
حاول يلاوى الموج
غطاهو باقى السيل
كملت حياة احمد
واصبح مكانو سبيل
من الطيور والقش
تسمع صياح وعويل
ليه يابحر تقلع
زولاً دريبو طويل
جاك يدفن الآهات
واياهو ليك خليل
كل الصحاب تصرخ
تجرى ودموعه تسيل
احمد متين نلقاك
كيفن نلاقى الليل
واحمد خلاص روَح
سافر يلاقى شليل
والحاجه بت عدلان
جاها الخبر بكره
شافت حياته سواد
مخنوقه بالعبره
تتذكر احمد داك
الضحكه والصرَه
كيف ياجناى تموت
دايراك لى ستره
بلسم جراحى عليك
الدابه دار تبره
تصحى وتنوم احمد
ترقد تقوم احمد
تمشى وتحوم احمد
وحياته محتضره
فقدة صوابه خلاص
عاشت على الذكره
احمد وليدى تعال
انا لسه منتظره
ترجع حياتى معاك
تقعد حداى مره
نتلمه شان نفطر
تاكل معاى كسره
الثلاثاء مايو 22, 2018 4:35 pm من طرف ابراهيم الصغير
» أفضل وأسهل وأكثر أنواع التجارة ربحية على الإطلاق أمان 100%
الإثنين فبراير 02, 2015 6:27 am من طرف الأميرلاي
» بستـــأذنك...
الخميس يوليو 03, 2014 8:08 pm من طرف الشاعر السماني حسن
» عاش من شافك
الثلاثاء يونيو 17, 2014 3:16 pm من طرف hamadvip
» كيف يفكر الرجل ؟؟ وكيف تفكر المرأه ؟؟
الإثنين يونيو 16, 2014 1:00 pm من طرف hamadvip
» قصيدة جديدة ........ دنيا
الإثنين يونيو 16, 2014 12:53 pm من طرف hamadvip
» طيارة جات بي فوق .......... قصيدة جديده لهاشم صديق .. حفظه الله
الإثنين يونيو 16, 2014 12:49 pm من طرف hamadvip
» عشة أم حجل - هاشم صديق
الإثنين يونيو 16, 2014 12:47 pm من طرف hamadvip
» هاشم صديق - ما جاب المطر بنزين
الثلاثاء يونيو 10, 2014 5:41 am من طرف عثمان تباكي