النص
اشتقت ليكم ياعزاز
وانا هسه مالينى الألم
واشتقت ليكم يامعاى
فى كل كتابات القلم
اشتقت ليك انا يابلد
كل ماالصباح طل ونضم
مصلوب على الواقع المخيف
مجبور على الواقع السجم
واشتقت لى حاجات كتار
فى قلبى طاويها الالم
ليك يابلد منى السلام
لى كل زول زارع وراجى الفى السما
احساسو يكرم اى زول
والحاله ربك يعلما
من الصباح قايم فجر
يتفقد الزرع النما
واقف على السادره ويحش
لاغش لابيعرف يغش
لااتمد لا نام فى برش
وتحيه للعرق الهما
اشتقت ليك انا يابلد
اشتقت للماضى البعيد
الحله والناس العصر
حبوبتى والجبنه الفجر
وبيوت مفتحه فى الدروب
ديوان بنادى على الضيوف
المطره والطين والكسر
امك تنادى عليك ورح
هوى ياولد يلا الفطور
الكسره بردت والملاح
اخوانك الفاطرين معاك
راجعين على البلدات ضهر
اسرع تعال شان تانى تتمدا وتقوم
لسه البلاد مااتكلمت وتقول ابيت
ياود تعال بتقول اببيت
تسمع بدينا وسريع ورح
بى كل خوف تلقاك جيت
والنعمه راقده على البيوت
اللمه والجبنه الضحى
والونسه والقلب النضيف
أمك وأبوك .. أختك وأخوك
خالك وخالتك والجدود
عمك وعماتك وضيف
فى عنقريب واحد مجلد حبلو قد
والنيمه ترقص همبريب
والناس أهل مافيش غريب
كل البنيات زى بعض
زى ماالبنيات زى بعض
راكوبه والبيت الكبير
المطبخ التكل الصغير
وزريبه فى حوش القصب
وعتود مربط جبو زير
والحاجه تضفر فى البروش
والحاج ممدد فى سرير
كل التفاصيل زى بعض مافى اختلاف
كم عنقريب من غير لحاف والحاله زين
كل البشر تشفق عليك لامن تغيب
ياولدى وين؟ روحت وين
كل التفاصيل فى البلد مافيها شين
وانا لسه حارقنى الكلام
فى داخلى لسة القول كتير
عن قمره بتحجى الصغار
عن والده تضحك ليل نهار
عن عمَك الاللَعمى وبكوس
شايل عشا وكايسلو جار
والحاله كان شفت الشباب
فراس عديل والعين شرار
صارمين على البينم يخش
طيبين بميزوا للهظار
طيبين قلوبم زى بعض
لى كل غريب تلقاهو دار
اما البنيات فى البلد
اكتب شنو ؟ وانا شن اقول
ماكلو بالفطره و..نضيف
رقه ورشاقه مكملات
بى عينا ساى تملاك كيف
متعففات من كل شى
ماضاقن الحب السخيف
لاضاقن القعده العصر
لاجالسن واحد حريف
لكن شهامه مأصلات
تضبح عديل كان.. جيتا ضيف
كل البنيات زى بعض
زى ماالبنيات زى بعض
لكن سؤال بالجد مهم
ليه يابلد فتك مشيت
شان الألم ولا العلم
غايتو المهم جينا وخلاص
باكر سنين وشهور تتم
من تانى نرجع للبلد
جوانا افراح تترسم
تقدل تخوجل فى البلد
نملص خواجات الهدم
نلبس من الحاج ود عمر
سروال وعراقى ونمر
ونخش على البلدات نحش
ونَجَض القنقر عصر
بعد المغيب نرجع نجى
نحلم مع الضحوه الفجر
» أفضل وأسهل وأكثر أنواع التجارة ربحية على الإطلاق أمان 100%
» بستـــأذنك...
» عاش من شافك
» كيف يفكر الرجل ؟؟ وكيف تفكر المرأه ؟؟
» قصيدة جديدة ........ دنيا
» طيارة جات بي فوق .......... قصيدة جديده لهاشم صديق .. حفظه الله
» عشة أم حجل - هاشم صديق
» هاشم صديق - ما جاب المطر بنزين