الجنة من باب الخروج..
من ديون الشعر الفاتحة فينى علي البحر ..
للشاعر :
محمد احمد نقد الله ..
اقرينى كل ماالطير نضم
واتونسك شدرى الحزين
ابنيلي في جواك وطن
ساعة ازدحامك بالحنين
ضمينى في السما في الفراغ
اوفي بيوت الكادحين
نادينى كان صوتك بدا
واعفينى كان ماجاكى رد
اوجاوبك منى المدى
ماالدنيا في فهمى البسيط
صوتا بلف زمنى وبلاك
يرجع صدى
وانا ماصدى
شان صوتى ترميهو الجبال
تكتل ضميرى الاهتدا
مابين اديمى وبين سماى
كتى الخبر والمبتدا
ومابين مضخاتى ودماى
كتى الختام المابدا
غنيلى كان طال الغياب
او طل بين البين ردى
سأزلزل المنفى غدا وأتيك شوقا او حدا
طلينى من كل الشرف
الفاتحة فينى بتندهك
حى الدروب التشتهيك وتشبهك
حى التراب حى البحر حى السحاب
حى الخريف
حى الخريف العمرو ماهطل
علينا كلام مغلف بالنزيف
حى الرصيف
حى الرصيف الما انتهت احزانو
والوطن النضيف
حى الصباح
حى الغيوم الجهجهت شمس الكضب
حييها صاح
حى البيوت الراكزة عشقك بالنواح
حى الطريق حى الفريق
حى الطيور الراجعة ليك بعد حريق
شان تسكنك واهديها فوق صمتك براح
ياغايبة والناس غايبة فيك
لمتين معاك النيل اسير
والامنيات مسجونة والزمن الكسير
اتنفضي وشيلى الثبات
خشينى من كل الجهات
واستوطنينى كما الخيال
كما الرموش الرامية فوق عينيك ظلال
خشينى من كل الملاحم مهرجان
تستقبلك جواى حمامة ودنيتين
مصلاية للدين الصحيح
شمس الله بتجيك مرتين
ترحيبة الغبش الكرام
قبليها جدول ووردتين
راكوبة في الوطن الغمام
عصرية راقدة على البحر
قمرية بتصليى الفرض
حرية بي قدر الارض
واقرينى كل ماالطير نضم
واتونسك شدري الحزين
ابنيلى فى جواك وطن
ساعة ازدحامك بالحنين
ضمينى في السما في الفراغ
او فى بيوت الكادحين ..
ميمى النحلة ..
» أفضل وأسهل وأكثر أنواع التجارة ربحية على الإطلاق أمان 100%
» بستـــأذنك...
» عاش من شافك
» كيف يفكر الرجل ؟؟ وكيف تفكر المرأه ؟؟
» قصيدة جديدة ........ دنيا
» طيارة جات بي فوق .......... قصيدة جديده لهاشم صديق .. حفظه الله
» عشة أم حجل - هاشم صديق
» هاشم صديق - ما جاب المطر بنزين