الفوانيس والمداخل !!

ومانسيتكم يشهد الله
ولانسيت ريحة دروبكم الجداول التصحى بدرى
المسيد الديمة عامر
القلوب الطيبة هيبة
فوقا مابتدخل صغاير
يشهد الله انا مانسيتكم
لانسيت روعة جروفكم
البرسيم دابو قايم جمبو منجل جمبو واسوق
جمبو جدول مويتو جارية
وفوق لى طويتا تصلح
فى الأرض كم زهرة نايرة
الحمام الساقى يسرح
النخيل ميل جريدو
فوق لى قمريتين يقوقن
تحتو عصفورتين يغنن
ومن بعيد شوقى بيعاين
لمت الناس فى الجناين
ياخى قرب دة الفطور بى غادى جاهز
لا لا فاطر
لا لا حرم تانى تفطر
والشهامة الفى كلامن
اصلو مابتشبة مداين
والفوانيس والرتاين
كلو ليل تلقاها ضوت
وليلنا يشلع من نهارا
قعدت الناس التكيف
وقهوة البن والعة نارا
العناقريب مالية حوشنا
الدواوين والسهارة
النجيمات فوقنا تلمع
البيوت الساترة حالا
طينا من ارض القناعة
ودينا دين اسلام ومصحف
عالية بالايمان تطابق
فى الكرم مليون عمارة
ومانسيتكم يشهد الله
انا داير اجيكم
داير اجيكم
وها المدن شن لاقى فيها
انا لانى رائد فى كتيبة
ولانى دكتور فى عيادة
مشتهى الونسة المعاكم
ومانى طمعان فى زيادة
لسة جواى الله واحد
ولسة فى سرى الشهادة
ومانسيتكم مانسيتكم
يشهد الله انا مانسيتكم
لانسيت ريحة بيوتكم ..وحالة الناس التكافح
كسرة الصاج المولع
وخرطة الحوش التصافح ..زير وراكوبة وبرنده...



ميمى النحلة ..