الداخلة من باب الطيـــور!!

الداخلة من باب الطيور ..
من ديوان الشعر :

الفاتحة فينى على البحر ..

للشاعر :
محمداحمدنقد الله

النص:


آسف اذا ماقت فيك
انك ولاشبة الكفاح
على قدرى ماشلعت شموس
جواكى ماشفنا الصباح
ستفنا نضمك بالسكوت
ماخفنا غضبات الرياح
على قدرى مااندفنت بيوت
طالت عمارات السفاح
نرجاكى بس فى ياتو ميل
فى يات بلاد
بى ياتو حيل
والحيل جريح
والليل طويل
فوق أى غيم بتلاقى ريح
الدم على درب الوطن
يرسم على الاحلام ضريح
مسقوفة أزمنة الكلام
عن ساعة القول الصريح
ومفتوحة ابواب الملام
فى ساحة الفال الذبيح
يا داخلة من باب الطيور
فى ايدك الأولى السلام
وفى ايدك التانية الصبر
غشوكى اولاد الضلام
لاقوكى حافرين القبر
آخر مساراتك حريق
أحزانا مجرورة وتجر
يا الحاضنة أوجاع التراب
الراجى غيماتك تدر
دقينا ماخلينا باب
للوجعة فى الزمن الفقر
لا ارتحنا لا غنا السحاب
لا ليل مناحاتك بسر
يا الساكنة فوق خاطر الشموس
اليومى بتجيك بالمغيب
ورينا شن طعم النفوس
المابتوافيك بالحبيب

اتفضلى الناس والشموع
والليل مرايات والنحيب
واتفضلى المطر الدموع
فى حضرة الوطن الغريب
قدرك صباحاتك تموت
مطعونة قبال ماتتم
وقدرك تعانى من اللئام
فى مهرجانات النضم
قدرك تلاقى الامنيات
مرسية قبال تبتسم
وقدرك تخشي على المنام
وتمرقى قبال الحلم
ياغاربة فى لحظة شهيق الكلمة عن ساعة احتضار
وياشارقة فى لحظة ولوج الدنيا
أزمنة التتار
ماغنت الأطيار وراك
الا وكما غنت بكت
وماهزت الامطار سماك
لا الأرض فى الغيم انتكت
يادوب بنكتبلك قصيد
نفتح جراحات القلم
نرجاكى فوق قصر الرشيد
ترجينا فوق آخر ألم
نلقاكى فى دم الشهيد
قدامك التاريخ سهم
فوق نارنا فى البال الشريد
لازلنا بنحبك نعم
ولابد فى الآخر نجيك
نركز اذا مال العلم
ماالشوق بحر
والسكة فى الآخر حنين

والضو وراك يرسم صباحات السنين
يكتل ضلامات البيوت
يفرح قلوب المتعبين
يقفل مسارات الضلال
يفتح براحات اليقين
فى مدخلك
وتخشي من باب أى زول
يمتدا بيناتنا الحنين
زى ضو شبابيك البلد
تغتسلى من وجع الأنين
واقرالك الفى الدين ورد
من شر دروبنا الما بتبين
ومن حاسد اذا حسد
يا مؤمنة الدين الصلاح
والليل اذا طال فى ضراك
لابد بوافيك الصباح
آسف اذا خانى القصيد
فى حضرتك طل النواح
أسف اذا مافى الدروب
مالقيتى للجايين براح
اسف اذا غلطك صبح صاحكواذا غاب الفلاح
اسف اذا ماقت فيك
انك ولاشبة الكفاح
وعلى قدرى ماشلعت شموس
جواكى ماشفنا الصباح
ستفنا نضمك بالسكوت
ماخفنا غضبات الرياح
على قدرى مااندفنت بيوت
طالت عمارات السفاح ..

ميمى النحلة ..