وطن الشروق والنم ..!!

وطن الشروق والنم ..
من ديوان الشعر :
الفاتحة فينى على البحر ..
للشاعر :

محمداحمدنقد الله

النص:



على زمن الشروق والنم
طرد حزنو وركب خيلو
مسح من لون خيالو الهم
طلق شموسو المحت ليلو
نزل مطرو النجيض مو نى
يبشر بى زمن سيلو
صدح يوم مهرجان الكون
وقف واعى وعدل ميلو
كتب فوق صفحة الامجاد
بيحيا عزيز يشيل شيلو
اذا ما لسة فينا نفس بيتردد
واذا متنا بعيش واقف على حيلو
وطن راكز على المبدأ وعلى التاريخ
وكت مايهيج منو البقدر على ويلو
وطن جوانا ماهو كلام ولاكلمات
وقول شاعر وقف يهتف يناديلو
وطن كان صده مننا فات
انحنا بنحبى نمشيلو
وطن كان غطتو الدمعات
بنهدى عيونا نبكيلو
وطن طان هزتو الازمات
برانا نشوف احاويلو
ولابنحتاج يجينا غريب
عشان يعرف تفاصيلو
وطن ضماهم النيلين
وطن لماهم النيلين على المقرن
فكيف بنعيش بلا نيلو
وطنا وطن اذا ضاقت نلاقى سكن
واذا اتوسع نقيف ليهو ونغنيلو
وطنا الساس وطنا اساس وطن نبراس
وطن مادام معانا الروح
قسم بالمولى مابنداس
وطنا وبس
كلام بنقولو نجهر بيهو
بى صوت عالى مابالدس
ولا بندس
وطن جوانا جوة دمانا
بى كل الحواس بنحس
وطنا وطن جد نفديهو
جد نحميهو ونعليهو
لى امجادو نبقى حرس
جبالو ونيلو رملو نخيلو
رفعت جيلو
وطنا عليهو مابنتوص
وطنا الفكرة والتعبير
وطنا النص وطنا المنقة والابنوس
وضل النيم وطنا وبس

وطنا نعم
وطنا المولى كالو نعــم
وطن ماضيهو كم شمسآ منورة بى شعاعا قلم
وطنا علم على الايام وفوق كل البلاد معلم
وطنا الشيخ مع الحيران

الحبوبة والتسبيح
وطن كان جبتا سيرتو نضم
بيركع ليهو كم تاريخ
يقيف حيلو ويصفق كوكب المريخ

وطنا الساقية والطورية والطبشيرة والسبورة
والزول البلاوى الريح
وطنا ضريح على الجايهو
قاصد ازلو قاصد اهينو
يدفن فوق ترابو لغم
وطنا لغم بعرفوهو اللجونا زمان
على كررى ولقو الفرسان
وياما ارضنا شربت دم
وبشهد هكس كيف لاقينا كيف لاوينا
كيف كانت رجالتنا العلى شيكان
افو وحرم
ده انحنا الجانا قاصد خيرنا
نمش نتلقا بالاحضان
وانحنا الجانا قاصد اضيرنا
قسم بلقانا فى الميدان
ويحصد فوق ترابو ندم
وده الدرب عليهو مشينا من تبينا ماغبينا
واتربينا للسودان
عشقناهو وعشقنا حروفو
ألفو ولامو سينو واوو ودالو ونونو
كيف فى يوم انحنا نخونو
مابحصل قسم بالله لابنكون
اذا مازول هبش دينو
وانحنا احياء
واذا متنا بيعيش واقف على حيلو
كريم واصيل
وطنا الشال سماحة أصلو
ضاير بالنهار كم ليل
وطنا الفيهو اتلمينا واتخاوينا واتوحدنا
جيل فوق جيل
وطنا الفيهو جامع وخلوى
ميرى وسلوى
صوت قرآن مع الترتيل
وطن صوت الكنايس فيهو
مابننفيهو مابنخفيهو لينا دليل
يقول للدينا دة السودان مع ناسو
اخوة محبة نور افريقيا تفخر بيهو والعالم
وطنا نبيل ومتسامح
فكيف مابينا نرضي دخيل يخش بينا ويحل وحدة
وطن طامح
وانحنا البينا يتوسط عشان مايحل خلافاتنا
ويصافينا ويكون وافى وكلامو جميل
هو واحد بس
هو واحد بس
هو واحد بس
ولابنقبل سواهو بديل مدى الازمان
يكون هو النيل
يكون هو النيل
يكون هو النيل