النعمةبت ودالفكـــى !!

النعمة بت ود الفكى ...
من ديوان الشعر :
الفاتحة فينى على البحر ..
للشاعر :
محمداحمدنقد الله



اضاءة :


مستفة بى سترة الحال
مغسلة توبا بالأيمان
دعاها المافتر فد يوم
صلاتا التعقب الآذان
تناضم فوق زمن روح
حديثا المانضم نسوان
بتدخل زى مروق الهم
دخول الروح على الانسان
تطلق العافية فى الشارع
اذا مرقت على الجيران


النص :

النعمة بت ود الفكى
سنتين ولاطلع الصباح فى وشها
سنتين يلوح برق الزمان ويقشها
سنتين بتحلم بالأمان
والجمرة فى الايام تذيد وتشها
سنتين ولاشرقت شمس
سنتين ولايوم تشتكى
دى النعمة بت ود الفكى
ركازة قبال الحكى
وتشرق ملامحا كل يوم
فوق ضلها الناس تتكى
فى الحلة زى سعة البيوت
واسع ضميرا كمان زكى
قعدت تورق فى الملاح
تال العصير
نادت على ولدا البكر
بى صوت مستف بالأنين
كان عمرو داب سنتين ونص
قالتو قرب أشكى ياولدى
مادام مافى زول
غيرك بحس وجعى العلى
عارفاك صغير وعمرك دابو نى
مرق الكلام من جوفا كان غابات حزن
صحرا ورمالا بكن سنين
لليلة مازارا المطر
جواها كم رحلة عذاب مابتنتهى
الا وتلاقى وجع جديد
لمعت عيونا النازفة دم
جرت شريط الذكريات بى حرقة لآخر ألم
قالتلو شوف ياولدى كيف حالنا الزمان
والليلة كيف حالنا اصطبح
قبال ابوك يرحل بلاد الاغتراب
كان حالنا ماشي ...وماشي زين
مااحتجنا لى زول بالغلط
عايشين حياتنا ميقنين
والليلة كمل الفى الجراب
ومعاهو كمل الفى الفهم
سنتين ولارسل ابوك
سنتين بنبكى انا واخوك
سنتين عيون كل الرجال الفى الفريق
طمعانة دار تغدر ابوك
سنتين وابوك قاطع الخبر
سنتين بنحلم بالمطر
والليلة غشانا السحاب

وماباقى لينا بلا السفر
دنقر وليدا على التراب
ونزلت دموعو بلا وعى
دى النعمة يوم مااتعودت
تمرق تشوف آخر الفريق
والليلة دولاب الزمن
لاقاها بى زمن الحريق
باعت بويتا من الصباح
بى دمعة ودعت البيوت
ساقت وليداتا .. ومشت جهة المدن
شان ايدا لاتتمدا لى زول بالغلط
للحلة مجبورة بتفوت
حال القمارى الدار تعيش مستورة
فوق ضل الوطن
سندت قفاها على الضياع
وتكلت مناما على الزمن
فاتت ديارا ..وسافرت
نزلت على سوق المدن
قالت تأجر ليها بيت
بس مالقت فى جيبها غير فكة قروش
وحال المدن عارفنها
قاية وتخلى الراس يدوش
نزلت دموعا كاى زول
جواهو مات حلمو الوحيد
والرجعة تانى على البلد قاسية وصعيبة حلم بعيد
والنعمة حار بيها الدليل
واتشر جواها الوجع
يا النعمة ديل شفع معاك
لو كان براك ماكان بهم
غايتو المهم ...الليل دخل
وطردوها ستات البيوت
من جم عماراتم هناك
طرد الكلاب
ضمت شويفعاتا انتكت فوق الرصيف
والبال سرح ...كمين سنة
والعبرة سدت للحلق
وقداما واقفة مكان مكان
يا النعمة دى الدنيا ام قدود
مافيها خير
قدامنا تتعلا السدود
وماباقى لينا بلا نطير
وجنحينا كسرن الزمن
والنعمة فوق وجعا الشديد
يشرق صباحا بلا نفس
والليلة زى ماكان امس
الجوع سكن جوفا
وصغارا بكن كتير
ومافيش طريقة بلا تمد ايدينا
تشحد فى الهجير
تنزلا شان خاطر العيال
داست على قيما وبكت
ومدت ايديها عشان تعيش
دى النعمة بت ود الفكى
حاشاها يوم ما كان هى طيش
مدت ايديها ومالقت غير الاهانات
كلو يوم
داخل بلد مليون عمارة على البحر
وجواهو ناس مالاقية لقمة عشان تعيش
داخل وطن مليون جناح رغم اتساعو
على الارض فى داخلا الاحزان تجيش

النعمة كم اتصبرت
النعمة كم اتعبرت
والنعمة كم قامت بكت
لمت هموما على بعض منكسرة
زى خاطر اليتيم
مرقت تعاين فى الطريق
كان تلقى حل لى محنتا
عربات ملايين البشر
تطلع على وجعا وتفوت
والنعمة ماشبة المدن
دى النعمة ترباية بيوت
مااندلا يوم توبا الاصيل
مابدلت يوم عزتا
الا المرض والجوع وليل الاجتياح
جواها راكى ركن ركن
والنعمة فوق بر العذاب
غرقانة جم كل السفن
والنعمة بالاسرح بعيد
قبل تفوق من سرحتا
عربية وقفت بى عجل
ناداها زول من داخلا
وظاهر عليو مسؤول كبير
والنعمة ماقدرت تقاوم جوعا
غايتو مشت عليهو ..وركبا
قال ليها من وين يا أخت
النعمة ماردت على
قال ليها لى وين يا أخت
النعمة.. ماردت على
ظناها بت زى البسوقن كل يوم من الدروب
غايتو المهم بسرعة كان عربيتو واقفة
على العمارة ودخلا
قعدت على طرف السرير
والنعمة دابا استرجعت
طول قصتا
ومن وين جات هى جات ..من يات بلد
من ياتو دم ..من يات وطن ..من ياتو طين واتذكرت
بت الكرام ..ومؤصلين مابتبقى لى زول غير يكون بس راجلا
عادت حواسة على عجل
قامت على الباب دار تجر
جراها من شعرها الغزير
لاواها ماقدرت على
قاواها قوى عزيمتا
دى النعمة بت طين البلد
مابتبقى لى زول غير يكون بس راجلا
ملصت ايديهو وقام جرت
دخلت على المطبخ هناك
حاواها تانى ..ومن جديد
رفعت على السكين رجع
ومن تانى داير يغافلا
رفعت ايديها على السما
وغزت حديد سكينا فوق قلبو القذر
والدم هدر ...غطى الأرض
ساقوها... ودوها السجن
حكموها بالاعدام قصاص
وقفت على حبل الشنق
راكزة ودمواعا بحر غريق
دى النعمة ترباية الرجال
ركازة ساعة الهم يكيل
جايانا من زمنا محال
دى النعمة بت ود الفكى
كانت حقيقة وماخيال
عاشت قوية كما الجبال
وماتت عشان ماتصون شرف
وكانت ابو وأم للعيال
وكانت ابو وأم للعيال
وكانت ابو وأم للعيال

ميمى النحلة ..