قصيدة السفر محتاج زواده

السَفَرْ محتاج زُوَادَه
مصطفي ود المأمور
بعد عملية العيون
لندن / 17/ مارس/ 2009
ياالحميد حَامْدَكْ زِياده
بي قصيد مِنْ جُوَّه قلبى
ومِنْ عَقُلْ طَايْعَ الاراده
والحَمُدْ عَدَّيتْ وزِدْتُّو
غلبني أحصي كُتُرْ عِدَادَه
****


رَبْ سَقَاني عَسَلْ مَصَفَّي
بي لبن تَرْيَانْ جُمَادَه
وفي خَدَارْ نِعَمُو إنْبَطَحْتَ
حِدَاىّْ نَهَرْ أَخَمِجْ خُواده
و أزيد صلاتي علي مَحَمَّدْ
اِسْمُو بَسْ شُفْعَه وسَعَادَه
صَلَاتِي ليه وقوف و قاعِد
و الجُنُوبْ جَافَتْ رُقَادَه




أَصَلَّيْ و إتْزَوَّدْ لِسَفَرِي
مَا السَفَرْ محتاج زُوَادَه
لو حَجَرْ كان كبدي قَاسِيْ
دَه النَبي الرَطَّبْ كُبَاده
والرحيم سُبْحَانُه حَانِي
أَحَنَّ مِنْ أُمْ في مِهَادَه
شَكيتْلُو كيف ؟أبصاري ضِعْفَتْ
وكيف بَصِيرْتِى الرَاَنْ فُؤَادَه
ياكريم مَغْروضْ في فَضْلَكْ
تَشْفِي عيني تَفِكْ حِدَادَه
*****
بي وسيط نبي الله جِيِتَكْ
يَارَبِّى تَكْرِمْ للوِفَاده
كل مخلوق سآلو فَضْلُو











للبَحَرْ طَلَبْ الزياده
كيف يِضِنْ و أنا من عبيدو
جِيتُو عينِيِ حَلَكْ سَوَادَه
ماشَكيتْ لي غيرو هَميَّ
ولا إِعْتَرضتَّ علي الإراده
بس سألتو النور وضَيُّه
يِضْوِي عيني تْشُوفْ عُوَادَه
و الغني شوف سِرْ خزاينو
يِمْنَحَكْ وهي في زيَادَه
مَاسَألتُو المَالْ ودُنيَا
و لا القروش كانْ لَىّْ سَعَادَه
بل سألتو يداوي بَصَرِي
ما أصل حَدَّ القُوَادَه
*****
يا البصير أَنِعْم بِضَيَّكْ
و العيون أُوْقِدْ زِنَادَه
و أشوف بديع صُنْعَكْ بِعينِى
و اكْتِبْ الغُنَىَ مِنْ مِدَادَه
في الزهور أم طل و ناضْرَه
وزَاَهْيَّه مَجْمُوعَه وفُرَادَه
وكل زهره أريجها يِنْضَحْ
يوم تفوح تَدْلِقْ مِدَادَها
دَه الجَمَالْ في كلِ صُنْعَكْ
يابَدِيعْ حَدَّ الإِجَادَه
أَمْدَحْكْ بالروح و شِعْرِي
و ما أصل عُشْرَ الإِشَادَه
و البصير بى اِسْمُه دَاكَا
هُوْ الوَهَبْ للعين ضَمَادَه
و النزيف الكَانْ مِغَشَّيِ
قَاعْ عيوني وزاد تَمَادَيَ
كُلُه زَاَلْ بى طِبْ ضَمَادُو
والدُعَا … مُخَّ العِبَادَه
واليُومْ أَبَشِّرْ أصْدِقَائِّى
اِنِّى في نِعْمَه و سَعَادَه
و السعاده التانيه بيكُمْ
ويَاهَا دِى الاحْسَنْ سعاده
لأنو اِنْتُو الكُنْتُو جَنْبِيِ
مُتَكَّأ وللرَاسْ وِسَادَه
والبَصَرْ مَا سَادْ عليكم
انتو أصحاب السَيَادَه
أبقو جنبي أَضَوِّي بيكم
و أنتو عيني و نِنْ سَوَادَه
تَبْقُوا لَيَّا و أبْقَي ليكم
في المَصَايِبْ و إشْتِدَادَه
زَرَعْتَّ لىْ مَطْمُورْ دَخِيرْتِى
والزِرُوعْ بِتْلَمْ حَصَادَه
يارَفَاقْتِي حَصَادى بيكم
وعيِشِى دايْمَاً فى زِيَادَه